OMAPSALOME 25 - Ombibeli Iyapuki

Ekufilepo netuvikilo lomuhepaululi

Epsalme laDavid.

¹ Omwene, omwenyo wange ohandi u yelula kwoove.

² Kalunga kange, Oove tuu, handi lineekele; ino efa nge ndi fifwe ohoni, opo ovayelani vange vaha hafele nge.

³ Heeno, nande umwe ou te ku teelele, ita ka fifwa ohoni. Ovaamuki epwanga aveke tava ka fifwa ohoni.

⁴ Omwene, ulikile nge eendjila doye, Ove u longe nge omalila oye,

⁵ ame ndi ende moshili yoye, Ove u longe nge, osheshi Oove Kalunga, omuxupifi wange, ohandi ku teelele efiku alishe.

⁶ Omwene, dimbulukwa efilonghenda loye nolukeno loye, osheshi oyo oya kala po nalenale.

⁷ Omatimba omounyasha, nomanyono ange, nowii wange ino u dimbulukwa. Dimbulukwe nge panghenda nomolwouwa woye, Omwene.

⁸ Omwene omuwa nomuyuki, onghee ta longo ovalunde okushiiva ondjila.

⁹ Ovalininipiki ote ke va endifa payuki, novalininipiki ote va longo ondjila yaye.

¹⁰ Omalila aeshe Omwene onghenda noudiinini kwaava hava diinine ehangano nehepaululo laye.

¹¹ Omwene, molwedina loye, kufa po etimba lange, nande olo linene.

¹² Ou ha tila Omwene, ye olyelye? Ye ote mu longo ondjila ei ye e nokuhoolola.

¹³ Oye ta ka kala nelao, noludalo laye otali ka fyuulula edu.

¹⁴ Eendafano lOmwene oli li naava have mu tila; ndele te va shiivifa ehangano laye.

¹⁵ Omesho ange alushe onde a ameka kOmwene, osheshi neemhadi dange ote di yululula momwiyo.

¹⁶ Alukila kwaame, u file nge onghenda, osheshi ondi li omufiwapo nepongo.

¹⁷ Omatilifohodi omomutima wange a hapupala; kufe nge mo moudjuu wange.

¹⁸ Tala omupya wange, noshiponga shange, u dimine nge po omatimba ange aeshe.

¹⁹ Tala ovatondi vange, osheshi ovo ovahapu, ve noutondwe naame, tava tondo nge nai.

²⁰ Diinina omwenyo wange, u xupife nge; ino efa ndi fifwe ohoni; Oove, nde lineekela.

²¹ Oukoshoki noukalinawa nau amene nge, osheshi Omwene, Oove, nda teelela.

²² Akutu Kalunga, kulila Israel momaudjuu aye aeshe!