OMAPSALOME 24 - Ombibeli Iyapuki

Oivelo nye, yeluleni omitwe deni!

Epsalme laDavid.

¹ Edu olOmwene, naashishe shi yadi mo,

² osheshi Ye okwe a shita kombada yomeva efuta, nokwe a pameka kombada yomilonga.

³ Elipipo ta itavelwa okuya kombada yomhunda yOmwene? Elipipo a wana okukala ofika ponhele youyapuki waye?

⁴ Oyou e nomake inaa nyata owii, noku na omutima wa yela, noiha ameke nande omwenyo waye koungaho, noiha fufya mokwaana kwaye.

⁵ Oye tuu ou ta nangekwa noupuna kOmwene ndele ta pewa ouyuki kuKalunga kexupifo laye.

⁶ Ava ve li ngaha, ovo epata laava, tave ku pula, ndele tave uya koshipala shaKalunga kaJakob. Sela

⁷ Oivelo nye, yeluleni omitwe deni, nye mu yeluke, oivelo nye yaalushe, ohamba yefimano opo i shiive okupitila mo!

⁸ Ohamba yefimano olyelye hano? Omwene, omunaenghono omuladi, Omwene omuladi moita.

⁹ Oivelo nye, yeluleni omitwe deni, nye mu yeluke, oivelo nye yonalenale, ohamba yefimano opo i shiive okupitila mo.

¹⁰ Ohamba yefimano olyelye hano? Omwene weengudu dovakwaita, Oye tuu ohamba yefimano. Sela