OMAPSALOME 21 - Ombibeli Iyapuki

Epandulo molwefindano

Epsalme laDavid, la pewa enyakwa lolwiimbo.

¹ Omwene, ohamba otai hafele eenghono doye, nehafo la tya ngahelipi tai hafele ekwafo loye!

² Omahalelo omutima woye Ove we i pa, naashi omilungu dayo da indila, ino shi i shilika. Sela

³ Ove wa shakena nayo u nomanangeko noupuna ouwa, nowe i dika oshishani shoshingoldo komutwe wayo.

⁴ Oyo ye ku indila okukalamwenyo; Ove nowe i pa omido dihapu, itadi xulu po fiyo alushe.

⁵ Molwekwafo loye etumbalo layo la ninga linene; owe i tula eenghonopangelo noshinge.

⁶ Fiyo alushe owe i tula po i ninge enangeko noupuna, nowe i hafifa nenyaku linene koshipala shoye.

⁷ Osheshi ohamba oi li po hai lineekele Omwene, nomolwefilonghenda laau wOkombadambada yo itai ka tengauka.

⁸ Eke loye itali kalele okuhanga ovatondi voye aveshe, nolulyo loye tali ka kwata aveshe ava tave ku tondo.

⁹ Mokuholoka kwoye oto va ningi divadiva va fa ediko la hanya; mekeshuko laye Omwene te va pona po hamudilu, nomundilo tau ke va lungwinifa po.

¹⁰ Oiimati yavo Ove to i kombolola po kombada yedu noludalo lavo omovana vovanhu.

¹¹ Ngeenge tave ku dutile owii, ndele tave ku ningi oukululufi, itave shi dulu.

¹² Osheshi Ove to va te po, va ye onhapo, ndele to shoneke oipala yavo noikuti.

¹³ Omwene, yambuka po meenghono doye, opo nafye ohatu ku imbile nokufimaneka ouladinghono woye.