OMAPSALOME 17 - Ombibeli Iyapuki

Omutwikwatimba te liameke kOmwene

Eilikano laDavid.

¹ Omwene, uda ondjovo ya yuka! Pwilikina okweehela kwange, Ove u tambule eindilo lange, inali dja komilungu di noipupulu!

² Kwoove naku dje oshitokolifo shokutokola nge; omesho oye taa tale eshi sha yukilila.

³ Ove ho tale omutima wange, moufiku to u shipaashipa, Ove ho konakona nge, ndele ito mono sha. Keshe eshi handi diladila yo itashi piti mokanya kange.

⁴ Keshe osho ovanhu tave shi longo, ame handi kanyatele kondjovo yomilungu doye, nohandi kukuma omalila ovahanauni.

⁵ Omanha ange onde a diinina momufinda woye, neenghatu dange inadi pumha mo nande.

⁶ Ohandi ifana kwoove, osheshi Kalunga Ove to udu nge, ehenifa okutwi kwoye kwaame, u pwilikine ondaka yange.

⁷ Monifa onghenda yoye ikumwifa, Oove omuxupifi waava tava kongo okuhondama kolulyo loye molwovashindi vavo.

⁸ Diinine nge ngaashi omuni yeisho loye, u holeke nge momudidimbe womavava oye,

⁹ molwovakolokoshi, hava nhukile nge, nomolwovatondadi vange, hava dingilile nge.

¹⁰ Omitima davo dihe na eudito ve di idila po nomakanya avo taa popi nelitumbaleko.

¹¹ Mokweenda kwetu ve tu dingilila paife; ohave tu tele opo ve tu shate poshi.

¹² Ovo va fa onghoshi ya hala oshihondjauninwa, ngaashi onghoshona tai hondjaunine mehondamo.

¹³ Omwene, fikama, u va lomhokele ndele to va shate po! Xupife nge kovahenakalunga neongamukonda loye

¹⁴ neke loye kovanhu, heeno Omwene, kovanhu vounyuni ou, ve noshitukulwa shavo shi li mokukalamwenyo omu, omadimo avo ho a yadifa noipewa yoye, ovana ovamati vavo tava kuta, ndele tava fiile oludalo lavo oupuna wavo.

¹⁵ Ndelenee ame handi ka tala oshipala shoye mouyuki; ame ohandi ka mona ekuta mokutala ondjelo yoye ngeenge handi penduka.