OMAPSALOME 136 - Ombibeli Iyapuki

Panduleni Omwene, osheshi ouwanghenda waye otau kalelele

¹ Panduleni Omwene, osheshi Oye omuwa! Osheshi alushe ouwanghenda waye tau kala po.

² Panduleni Kalunga kookalunga, osheshi alushe ouwanghenda waye tau kala po.

³ Panduleni Omwene woovene, osheshi alushe ouwanghenda waye tau kala po.

⁴ Oye ou, ha longo oikumwifalonga, Oye aeke, osheshi alushe ouwanghenda waye tau kala po.

⁵ Oye tuu ou, a shita omaulu nounongo waye, osheshi alushe ouwanghenda waye tau kala po.

⁶ Oye tuu ou, a valela edu kombada yomeva, osheshi alushe ouwanghenda waye tau kala po.

⁷ Ou omushiti womaminikilo manene, osheshi alushe ouwanghenda waye tau kala po.

⁸ Etango li pangele omutenya, osheshi alushe ouwanghenda waye tau kala po.

⁹ Ohani neenyofi oyo i pangele oufiku, osheshi alushe ouwanghenda waye tau kala po.

¹⁰ Oye tuu, a denga oiveli yOvaegipiti, osheshi alushe ouwanghenda waye tau kala po;

¹¹ nOvaisraeli okwe va pitifa mokati kavo, osheshi alushe ouwanghenda waye tau kala po;

¹² neke la li li neenghono, nokwooko kwa tanganana, osheshi alushe ouwanghenda waye tau kala po;

¹³ Oye tuu, a taula Efuta Litilyana pokati, osheshi alushe ouwanghenda waye tau kala po;

¹⁴ novaIsraeli okwe va tokolifa mo mokati kalo, osheshi alushe ouwanghenda waye tau kala po;

¹⁵ ndele Farao nongudu yaye yovakwaita okwe va undulila mo mEfuta Litilyana, osheshi alushe ouwanghenda waye tau kala po;

¹⁶ Oye tuu, a taululifa ovanhu vaye mombuwa, osheshi alushe ouwanghenda waye tau kala po;

¹⁷ Oye tuu, a denga eehamba dinene, osheshi alushe ouwanghenda waye tau kala po;

¹⁸ neehamba da li da tumbala okwe di dipaa, osheshi alushe ouwanghenda waye tau kala po.

¹⁹ Sihon, ohamba yOvaamori, osheshi alushe ouwanghenda waye tau kala po,

²⁰ naOg, ohamba yomuBasan, osheshi alushe ouwanghenda waye tau kala po.

²¹ Noilongo yado okwe i yandja efyuululo, osheshi alushe ouwanghenda waye tau kala po;

²² i ninge efyuululo lomupiya waye Israel, osheshi alushe ouwanghenda waye tau kala po.

²³ Oye tuu ou, e tu dimbulukwa mediniko letu, osheshi alushe ouwanghenda waye tau kala po.

²⁴ Nokwe tu kulila kovafininiki vetu, osheshi ouwanghenda waye tau kala po alushe.

²⁵ Oye ou, omupaluli woinamwenyo aishe, osheshi alushe ouwanghenda waye tau kala po.

²⁶ Panduleni Kalunga komeulu! Osheshi alushe ouwanghenda waye tau kala po.