OMAPSALOME 122 - Ombibeli Iyapuki

Jerusalem tashi halelwa ombili

Eimbilo lomolweendo lokuya kouyapuki, laDavid.

¹ Osha hafifa nge, eshi nda lombwelwa: “Tu yeni kongulu yOmwene.”

² Eemhadi detu tadi kala ofika moivelo yoye, Jerusalem.

³ Jerusalem, omutungululwa oove, oshilando wa pakwa kumwe wa pamekwa,

⁴ omo tuu omo ovanhu vOmwene tava i oku mu fimaneka pamhango ya pewa Israel, okupandula edina lOmwene,

⁵ osheshi omo mwa yalwa oipundi yetokolelo, oyo yomeumbo laDavid.

⁶ Haleleni Jerusalem ombili! “Ava ve ku hole, nava kale nepunapalo.

⁷ Ombili nai kale momakuma oye, nengungumano omomauhamba oye.”

⁸ Molwovamwatate nookaume kange nda hala, ndi ku halele ombili;

⁹ molwongulu yOmwene, Kalunga ketu, onda hala, ndi ku kongele ouwa.