OMAPSALOME 116 - Ombibeli Iyapuki

Eimbilopandulo lomuxupifwa

¹ Ondi hole Omwene, osheshi oha udu ondaka yange nokwiilikana kwange;

² okutwi kwaye, oko okwe ku endekela nge; onghee nda hala oku mu ifana omafiku ange aeshe.

³ Omiyo defyo okwa li da yula nge, noutile woshovafi owa hangelela nge; onda hangikile koupyakadi noluhodi.

⁴ Opo nee onda lalekida edina lOmwene: “Akutu, Omwene, xupifa omwenyo wange!”

⁵ Omwene Oye omunanghenda nomuyuki, ndele Kalunga ketu Ye omunalukeno.

⁶ Omwene oha amene ovalininipiki. Ame nda ngona, ndelenee Ye okwa kwafa nge.

⁷ Omwenyo wange, alukila ketulumuko loye, osheshi Omwene e ku ninga nawa.

⁸ Heeno, Ove wa xupifa omwenyo wange mefyo, nomesho ange aha lile, nomhadi yange iha fenungute;

⁹ ohandi ende koshipala shOmwene medu lovanamwenyo.

¹⁰ Onda itavela, onghee handi popi: “Onda findilwa unene poshi;”

¹¹ melimbililo lange onda tile: “Ovanhu aveshe ovanaipupulu.”

¹² Omwene ohandi mu ningile shike, ndi mu alulile ouwa aushe, ou a longela nge?

¹³ Onda hala okuyelula eholo lexupifo, ame ndi fimaneke edina lOmwene pombada;

¹⁴ omaudaneko ange onda hala ndi a wanifile Omwene, heeno, ndi a wanifile moipafi yoshiwana shaye ashishe.

¹⁵ Momesho Omwene efyo lovayuki vaye ola nhendipalekwa.

¹⁶ Akutu, Omwene, aame omupiya woye, ondi mona womwalikadi omupiya woye. Omapando ange we a pandukulula.

¹⁷ Onda hala ndi ku etele eyambo lolupandu nokwiifana edina lOmwene;

¹⁸ omaudaneko ange onda hala ndi a wanifile Omwene, heeno, ndi a wanifile moipafi yoshiwana shaye ashishe,

¹⁹ momikala deumbo lOmwene, meni loye, Jerusalem. Halleluya!