OMAPSALOME 112 - Ombibeli Iyapuki

Elao lovatilikalunga

¹ Halleluya! Omulumenhu omunelao ou ha tila Omwene, ndele ta hokwa shili oipango yaye.

² Ovana vaye otava ka kala ovanaenghono moshilongo; oludi lovayuki otali ka punikwa.

³ Meumbo laye omu yadi oinima noupuna, nouyuki waye otau kalele.

⁴ Ovayuki ote va pitile ngaashi ouyelele momulaulu, omunalukeno nomunanghenda nomuyuki.

⁵ Ou ha file onghenda ndele ta yandje nokuhateelela sha, oye omukalinawa. Ta diinine oinima yaye pauyuki;

⁶ shaashi ye iha tengauka nande; okudimbulukiwa kwomuyuki otaku kala alushe.

⁷ Eenghundana dii ye ite di tila; omutima waye itau mbadapala, owe lineekela Omwene.

⁸ Omutima waye owa dja oumbada, ye ita tila nande osha, fiyo ote litadele ovatondi vaye.

⁹ Ta yandje neke lakamutuluka, neehepele ohe di pe oshali; ouyuki waye otau kala po alushe; oluvinga laye otali yeluka pombada la tumbalekwa.

¹⁰ Omulunde ote shi mono, ndele tashi mu twifa ondubo; ota kwesha omayoo ndele ta xulu po; omahalelo ovadinikalunga ihaa wanifwa, taa kala ongaho.