OMAPSALOME 111 - Ombibeli Iyapuki

Epandulo molwoilonga iwa yOmwene

¹ Halleluya! Onda hala okutanga Omwene nomutima aushe mongudu yovayuki nomeongalo.

² Oilonga yOmwene oinene, oya wana okukonakonwa kovahokwi vayo aveshe.

³ Oilonga yaye oya tumbala noya fimana, nouyuki waye otau kala po alushe.

⁴ Oye okwa dika oshidimbulukifo shoikumwifalonga yaye; Omwene Oye omunamutimanghenda nomunalukeno.

⁵ Ava have mu tila, ote va pe eendja, alushe oha dimbulukwa ehangano lavo naye.

⁶ Eenghono doinenelonga yaye okwe di shiivifa oshiwana shaye, eshi e shi fyuululifa oilongo yovapaani.

⁷ Oilonga yomake aye, oyo oudiinini nouyuki, omapangelo aye aeshe oku shii kulineekelwa,

⁸ ihaa hekuka nande, taa kalelele fiyo alushe, taa wanifwa noudiinini nouyuki.

⁹ Oshiwana shaye okwe shi tumina ekulilo, nehangano laye navo okwe li dika li kalelele; edina laye oliyapuki nola tilika.

¹⁰ Okutila Omwene oko efina lounongondunge, aveshe ava tava kala mulo, otava nongopalelele; efimano laye ohali kala fiyo alushe.