OMAPSALOME 108 - Ombibeli Iyapuki

Eindilo, Kalunga a xupife movafininiki

Eimbilo, Epsalome laDavid.

¹ Kalunga, omutima wange owa tiluluka. Onda hala okwiimba nokushika. Penduka, omwenyo wange!

² Yambukeni, onyalilo nokaxumbafeta! Onda hala okupendula eluwa.

³ Omwene, onda hala oku ku tanga mokati koiwana yoilongo, onda hala ndi ku imbile komaludi ovapaani;

⁴ osheshi ouwanghenda woye otau lundu eulu, noudiinini woye otau koya oilemo.

⁵ Kalunga, fikama u liyeke fiyo okombada yeulu, nefimano loye kombada yedu alishe!

⁶ Tu kwafa nolulyo loye, ovaholike voye fye opo tu xupifwe, tu uda.

⁷ Mouyapuki waye Kalunga okwa tonga ta ti: “Onda hala, ndi kaluke nda findana, onda hala okutavaula Sekem nokuyeleka, apa pe fike oule wolufilu laSukkot.

⁸ Gilead oshange naManasse oshange naEfraim oshikelelifo shokomutwe wange, naJuda odibopangelo yange.

⁹ Moab oshiyaxa shange shokulikoshela, kombada yaEdom ohandi ekele ko eenghaku dange; nohandi nyakukilwa Filistia.”

¹⁰ Olyelye ta twala nge mbela koshilando sha pama? Olyelye wokufindikila nge kuEdom?

¹¹ Haave ou, we tu ekelashi, Kalunga, haave ito ende vali pamwe neengudu d ovakwaita detu, Kalunga?

¹² Tu xupifa kovatondi vetu; osheshi ekwafo lomunhu olongaho.

¹³ Pamwe naKalunga ohatu ka ninga oilonganghono; osheshi naYe mwene ota ka lyataula ovatondi vetu.