OMAPSALOME 101 - Ombibeli Iyapuki

Omupangeli wopahalo laKalunga

Epsalome laDavid.

¹ Onda hala okwiimba ouwanghenda nouyuki. Omwene, Oove, nda hala ndi ku shikile.

² Mokweenda kwange onda hala ndi diinine ouyuki. Akutu, onaini to uya kwaame? Meumbo lange onda hala ndi kale mo nomutima wa yela.

³ Omesho ange inandi hala oku a talifa oinima ilengifa; ohandi tondo okuliikifa omatauluko, aha ehene kwaame a kanyatele nge.

⁴ Ekonda nali kale kokule nomutima wange, owii inandi u hala nande.

⁵ Ou ta ambe mukwao meholeko, oye handi mu nyonauna po; ou e nomesho taa nyikifa oukengeli nomutima wa nyika elitumbaleko, ye ota nyonyodolifa nge.

⁶ Omesho ange otaa tale ovadiinini vomoshilongo, vo va kale pwaame; omweendi wondjila ya yuka, oye na kalele nge.

⁷ Meumbo lange inamu kala ou ta ende nekonda; omupopi woipupulu ita kala koshipala shange.

⁸ Keshe tuu ongula onda hala okudima po ovadudu aveshe vomoshilongo, ame ndi kombolole po moshilando shOmwene ovaningi vowii aveshe.