OMAPSALOME 10 - Ombibeli Iyapuki

Ekuwo longhuwo molwokupopilwa kovamonifi voixuna

¹ Omwene, oshike u li kokule ngaho ndele to hondama pomafimbo oudjuu?

² Moumbudilinenepeko otava taataa epongo; nave likwatife neemhangela davo vene edi va tota.

³ Osheshi omukehenakalunga ote litadele oiningwa yokahalu kaye; ndele omunalwisho ta sheke Omwene.

⁴ Omukehenakalunga mokufulalala kwaye ita kongo Kalunga; Omadiladilo aye aeshe osho: “Kaku na Kalunga.”

⁵ Meendjila daye efimbo alishe ota mono ouwa; nomatokolo oye a fa e li kokule naye ngaashi eulu, ovakondjifi vaye aveshe ote va tauluka.

⁶ Ote lipopile momutima waye, ta ti: “Itandi ka punduka nande; fiyo alushe itandi ka hangika komupya.”

⁷ Mokanya kaye omwa yada efingotukano, nomaketuketu omafininiko; koshi yelaka laye oku nehanauko nowii.

⁸ Ota hondjaunine pomikunda meenhele da fita, opo a dipae omuyuki; omesho aye otaa mono omunamupya.

⁹ Oye ta hondama mengade ngaashi onghoshi monhele yayo; ta nangele a kwate epongo; ta kwata epongo moku li yula meendjadja daye;

¹⁰ ta hondjaunine, te livate po, nomunamupya ota wile momakasha aye.

¹¹ Te lipopile momutima waye nokutya: “Kalunga ote shi dimbwa, Oye okwe likwata komesho, Ye ite shi mono nande.”

¹² Omwene, yambuka! Kalunga, yelula okwooko kwoye! Ove ino dimbwa ovanamupya!

¹³ Omukehenakalunga, oshike ta dini Kalunga ndele ta ti momutima waye: “Ito shi yavala.”

¹⁴ Ove we shi mona nokuli; osheshi okuningwa nai nokulilifwa, oto shi dimbulukwa, noto shi tambula shi kale momake oye; to lineekelwa kwaau, ehe nomukwafi, Oove omukwafi weefiye.

¹⁵ Teyaula okwooko kwomukolokoshi nomuhenakalunga, u yukife owii waye, fiyo ito u mono vali.

¹⁶ Omwene, Ove ohamba fiyo alushe; mouhamba woye ovapaani ova pwa mo.

¹⁷ Omwene, Ove ho udu odjuulufi yovalininipiki; Oove ho pameke omitima davo; nokutwi kwoye to ku ehenifa kuvo,

¹⁸ opo u yandjele ouyuki keefiye nokeehepele, paha kale vali omukwadu ta eta po etilifohaluko.