LEVITIKUS 1 - Ombibeli Iyapuki

Exwikiloyambo

¹ Ndele Omwene okwa ifana mo Moses metwali leongalo nde te mu pe eemhango edi:

² “Umwe ngeenge a hala okweetela Omwene eyambo, ota dulu okweeta eyambo moimuna, ngeenge ongobe ile odi ile oshikombo.

³ “Eyambo laye ngeenge exwikiloyambo lomeengobe, ye e nokweeta ongobe yomhedi ihe noshipo. Ye e noku i eta koshivelo shetwali leongalo, opo e li monene okuhokiwa koshipala shOmwene.

⁴ Ndele ye e nokutenheka eke laye komutwe wexwikiloyambo, opo nee tali ka tambulwa nohokwe ngaashi eyambo laye, ndele tali mu etele ekwatafano.

⁵ Opo nee ye e nokudipaa ongobe onyasha yomhedi koshipala shOmwene, novapristeli, ovamati vaAron, ve nokweeta ohonde noku i shamina keembinga adishe doaltari oyo i li komesho yoshivelo shetwali leongalo.

⁶ Opo nee ye e nokuyuva ongobe yexwikiloyambo noku i tetaula oinhimbu;

⁷ novana ovamati vomupristeli Aron ve nokushakala omundilo koaltari nokutula oikuni momundilo opo uha dime.

⁸ Nosho yo vali ovapristeli, ovana ovamati vaAron ve nokulongela ko oinhimbu nomutwe nomakaadi koikuni ya longelwa komundilo wokoaltari.

⁹ Ndelenee omandjadja nomakondo vo ve noku a kosha nomeva, nomupristeli e noku i xwika po aishe koaltari exwikiloyambo nokutya, omundiloyambo wedimba liwa kOmwene.

¹⁰ “Ndele ye ngeenge ta yambe odi ile oshikombo exwikiloyambo, e nokweeta odi yondume ihe na oshipo:

¹¹ ndele ye e noku i dipaela kombinga yokoumbangalanhu woaltari koshipala shOmwene; novapristeli, ovana ovamati vaAron, ve nokutila ohonde keembinga adishe doaltari.

¹² Opo nee e noku i tetaula oinhimbu, nomutwe nomakaadi, novapristeli ve noku i longela ko koikuni ya longelwa momundilo koaltari.

¹³ Ndelenee omandjadja nomakondo e noku a kosha nomeva, nomupristeli e noku a eta aeshe noku a xwikila po koaltari. Olo exwikiloyambo nokutya, omundiloyambo wedimba liwa kOmwene.

¹⁴ “Ndele ngeenge ta yambele Omwene exwikiloyambo lomeedila, ye e nokuyamba elyamono ile onghuti yonyasha.

¹⁵ Nomupristeli e noku i eta koaltari nokufingonona ko omutwe wayo noku i xwika po koaltari, nohonde yayo nai fininwe kombinga yokoaltari,

¹⁶ opo nee ye na kufe oshikutunino noshandja shayo noku i ekela momute kombinga yokoushilo woaltari.

¹⁷ Opo nee ye te i tande pomavava ndele haku a teta ko. Omupristeli ye e noku i xwikila po koaltari okoikuni ya longelwa komundilo. Olo exwikiloyambo nokutya, omundiloyambo wedimba liwa kOmwene.