JESAJA 15 - Ombibeli Iyapuki

Ehanauno laMoab tali xunganekwa

¹ Moab tashi xunganekwa. Oshili, moufiku wehanauno Ar-Moab osha hanaunwa, sha xula po. Oshili, moufiku wehanauno Kir-Moab osha hanaunwa, sha xula po:

² Otava i kuBait nokuDibon, keemhunda diyapuki, va ka lile. Moab ota lili pombada muNebo nomuMedeba; komitwe davo adishe ope na omapalu, neendjedi adishe oda kululwa ko.

³ Momapandavanda avo ova djala eeshako, ndele tava keme aveshe kombada yeengulu nomeendabo dokulandela, ndele tava ngabuka mokulila.

⁴ Hesbon naEleale otava ingida; nokulila kwavo okwa udika fiyo okuJahas; onghee hano ovalumenhu ovahomoni vaMoab otava keme nomwenyo waye otau kakama.

⁵ Omutima wange otau ingida omolwaMoab, noonakufaduka po vavo ova ya fiyo okuSoar, fiyo okuEglat-Selisija. Noikulundudu yaLuhit otave i londo nokukwenauka, heeno, mondjila yaHoronaim otava kuu onghuwo omolwehanauno.

⁶ Omeva omuNimrim otaa ningi ombuwa, heeno, nomwiidi owa kukuta, nombidi oya fya, kape na nande oshimeno shitalala.

⁷ Opo nee keshe tuu eliko ve li lilikolela nakeshe oshituvikilwa shavo otave i twala kombada yokamulonga kOmumbalandongo.

⁸ Eenghuwo oda kuwanena keengaba daMoab, muEglaim omwa udika ekweno laye, nofiyo Beer-Elim elilaano laye.

⁹ Osheshi omeva omuDibon oku yadi ohonde; ndele ame onda hala okuundulila Dibon oshiponga shikwao: ovatembuki Ovamoab noixupe yomoshilongo otava ka hangika konghoshi.