HOSEA 14 - Ombibeli Iyapuki

Israel te lidilulula ndele ta filwa onghenda

¹ Israel, alukila kOmwene Kalunga koye, osheshi wa pundukifwa komanyonauno oye.

² Indeni neendjovo nye mu alukile kOmwene mu tye: “Dima po omatimba aeshe. Tu tambulila mefilonghenda loye, opo nee hatu ke ku yambela eyambo lomilungu ponhele yeengobe.

³ Asiria itashi dulu oku tu kwafa. Fye inatu hala vali okulonda eenghambe, fye ihatu lombwele vali oilonga yomake etu: Kalunga ketu! Osheshi mwoove ofiye tai mono onghenda.”

⁴ Eliteeko leni ohandi li velula. Okehalo lange mwene ondi mu hole. Osheshi ehandu lange ole mu pilamena.

⁵ Ohandi ka ninga kuIsraeli ngaashi omume. Oye ta ka wapala ngaashi onhemo yomado, nomidi daye otadi ka twama ngaashi omuti womupopel.

⁶ Oitutumine yaye otai ka tandavela, newapalo laye otali ka kala ngaashi olo lolumono, nedimba laye ngaashi olo laLibanon.

⁷ Oonakukalamo momudile waye tava longo vali oilya, ndele voovene tava ka hapa ngaashi omuviinyu. Netumbalo laye tali ka kala ngaashi omaviinyu aLibanon.

⁸ Efraim! Ondi na shike vali noikalunga? Onde mu uda, ndele eisho lange ole mu tala. Ame ndi li ngaashi omukipresi mutalala. Oiimati yoye tai di mwaame.

⁹ Olyelye omunandunge ndele ta udu oinima ei? Olyelye omunamayele ndele ta koneke ei? Osheshi eendjila dOmwene da yuka. Novayuki ohava ende nado, ndelenee ovahenakalunga ohava pundukile mudo.