Titus 1 - Luaniua New Testament

¹ Anau Paul, hekama heheaꞌu ma Keakua. Jesus Christ ehaunalia anau ikonaꞌi nakama kela Keakua ehilihili la ihakina i aia, kena imakino laoi kehamaoni. Pela nakama la ikaukali nakipukipu Keakua.

² Keakua selavaa kekakala nukulaoi. Imua aia nipena kemaalama nei, kama la ekakala hamaoni pela nakama aia la meiola naualoko hamau. Ia nakama la oihakina nakakala aia la.

³ Keakua ekonaꞌi naonohenua la penei. Kama la ekuꞌu saika aia nihaunalia anau ikaukaꞌu nakakala aia la.

⁴ Anau ekakaa aku kelauniu nei i aꞌoe Titus. Pela aꞌoe ehau poi hekama anau, maikinimea nahakina kaua ehanakahi. Keakua Kamana ia ma Jesus Christ kekama ekonaꞌi kakou, ilolosi hakaualeꞌa aꞌoe inoho laoi.

Nakama hamakua nahale loku

⁵ Anau ehanoho aꞌoe i Crete, pela aꞌoe ihaoki mai naheheaꞌu inaa kela seioki la. Aꞌoe ikini nakama ihamakua nahale loku i namakaꞌina la hakoa, ehau poi anau nime aku imua la.

⁶ Aꞌoe ikini nakama ekonu kahi ihamakua naloku la. Ala nikama kela seꞌavana huli. Ia nakamaliꞌi lakou la ehakina Christ, ia kena sehakapanaka, ia sekahao puamu.

⁷ Kama hamakua la ikau kekonu kahi, maikinimea kama la meilolosi nakama keloku. Kama la iseahu, selokoloko nahie, sehiunu mevale, sehivuhu, ia semanaꞌo namoni.

⁸ Emeia kama hamakua la ikau keaumalie, kena ihihai nakipukipu kaualeꞌa. Kama la ikuꞌu konu keola aia, ia halono nakuaa. Kama la hekama hamaoni Keakua, ia ihavalekoa kelolosi soia.

⁹ Kama la ikaohi mau naaoaꞌo ekonu kela kakou ekau kehakina. Ilavaa aia kepolopolo aꞌe naonohenua la naaoaꞌo ekonu, pela ihapulupulu aꞌe nakama la. Ia ihakonu nakama kela ekaumaluu naaoaꞌo la.

Nakama ehakapanaka

¹⁰ Nakama hamakua la ikaohi mau naaoaꞌo ekonu, maikinimea komaꞌi nakama ehakapanaka. Kaohi mua nakama kela epolopolo keonohenua ikaukali nakipukipu na{Jiu} la. Nakama la ehailavaꞌa keonohenua la, ia ekakala puꞌua oia.

¹¹ Ia okou ipui nakama la isekakala aꞌe nakama keloku. Nakama la epolopolo keaoaꞌo esala, ihailavaꞌa komaꞌi nahaleaina ikiaꞌi nahakina lakou la. Ia nakama saꞌino la hihai iko namoni oia.

¹² Kela hekaulaiku, hekama i Crete. Kama la eme aꞌe, “Kakou nakama Crete enukulaoi haeꞌo. Kakou ehau poi napoi leikama saꞌino. Kakou emakananae, ia aiꞌai vale.”

¹³ Kakala aia la ekonu. Kena aꞌoe ikakala hamakaꞌu aꞌe nahakina ana Crete la, ihakina kahi keaoaꞌo ekonu,

¹⁴ ia sehakina naꞌai nukulaoi na{Jiu} la imua, ia sehalono hoi naaoaꞌo nakama kela ehulihuli nakakala hamaoni nosala.

¹⁵ Nakama kaualeꞌa ehakaꞌoko pela namea hakoa ekaualeꞌa. Ia nakama saꞌino la sehakina Keakua. Emeia nakama la ehakaꞌoko pela namea hakoa esaꞌino. Ia kehakaꞌoko lakou la esaꞌino oia. Ia kena nakama la semakino hea ekonu, ia hea esala.

¹⁶ Nakama la eme aku pela lakou emakino Keakua, ia naola lakou ehuli aku pela lakou enukulaoi oia. Nakama la esaꞌino, ia hakapanaka haeꞌo, kena selavaa kepena namea kaualeꞌa.