Romans 16 - Luaniua New Testament

Kakala kaualeꞌa

¹ Anau ehihai okou imakino pela keꞌave makou Phoebe la hekama ekaualeꞌa. Kama la eheheaꞌu nokonaꞌi nahakina ana i kemakaꞌina Cenchrea.

² Kehine la eheheaꞌu ma Kealiꞌi, ia kena okou ikolia halaoi kehine la, ehau poi okou ekolia halaoi nakama ekapu Keakua la hakoa. Okou isapai kehine la noau aꞌe kama la nia aia ehihai. Maikinimea kehine la ekonaꞌi komaꞌi kekama, ia ekonaꞌi anau hoi.

³ Kakala hihia ia Priscilla laua ma Aquila. Makou koꞌokolu eheheaꞌu hakoa ma Jesus Christ.

⁴ Koꞌolua la eaunahie kemake nokonaꞌi anau. Ia seai anau oia. Nahakina ana hakoa kela ninoho pouli imua ehamaha koꞌolua la hoi.

⁵ Kakala hihia hoi i nakama keloku kela eꞌuku iloko hale kehale koꞌolua la. Kakala hihia ia kausoa Epaenetus. Kama la o kekama amaka kela ehakina Christ iloko Asia.

⁶ Kakala hihia ia Mary. Kama la niheheaꞌu mahi ikonaꞌi okou.

⁷ Kakala hihia hoi ia Andronicus laua ma Junias, nakaina hamaoni anau la. Koꞌolua la esuꞌui ma Christ imua anau. Kena koꞌolua uo noheheaꞌu ma Christ. Ia kena nahakina ana hakoa ehamaha koꞌolua la. Ia koꞌolua la nipono kia manau iloko kelokapu hoi.

⁸ Kakala hihia ia Ampliatus. Maua esuꞌui ma Kealiꞌi, kena esoa laoi.

⁹ Kakala hihia ia Urbanus. Kama la eheheaꞌu ma Christ hoi. Ia kakala hihia hoi ia kausoa Stachys.

¹⁰ Kakala hihia ia Apelles. Christ ehihai anakipukipu. Ia kakala hihia ia haikina kela Aristobulus.

¹¹ Kakala hihia i kaina hamaoni anau Herodion. Kakala hihia i nakama kela esuꞌui ma Christ iloko haleaina kela Narcissus.

¹² Kakala hihia ia Tryphaena laua ma Tryphosa. Koꞌolua nahine la eheheaꞌu haimahi ma Kealiꞌi. Ia kakala hihia ia kausoa Persis. Kama la eheheaꞌu mahi ma Kealiꞌi hoi.

¹³ Kakala hihia ia Rufus, kama kela Kealiꞌi ekini ihamakua. Kakala hihia ia kina aia la hoi. Kehine la ehau poi kina anau.

¹⁴ Kakala hihia ia Asyncritus, Phlegon, Hermes, Patrobas, Hermas, ia ma alakaina kakou kela enoho ma nakama la.

¹⁵ Kakala hihia ia Philologus, Julia, Nereus, ia ma keꞌave aia la, ia ma Olympas, ma nakama ekapu Keakua hakoa kela enoho ma lakou.

¹⁶ Au aku kevaisoni ekapu i nahakina ana la. Nahakina ana Christ hakoa ekakala aku okou kehihia lakou hoi.

Nakakala haoki

¹⁷ Aukaina. Anau epolopolo aku okou ilolosi hamakonu, pela alakama meo mai nohavaꞌee nakama keloku okou, kena iseu nahakina okou la. Ia nakipukipu nakama la esekau ma keaoaꞌo kela okou nilono mai imua. Kena okou ihaluu i kevahi.

¹⁸ Nakama la seheheaꞌu ma Christ Kealiꞌi kakou. Emeia nakama la ehihai namea lakou emanaꞌo la oia. Ia alakama keloku semakino hea ekonu ia hea esala. Kela hea nakama saꞌino la elavaa kekakala hakalavale ikaoleole nakama keloku la.

¹⁹ Ia nakama hakoa emakino pela okou ehalono Keakua. Kela hea anau ehihia lo. Ia anau hihai okou imakonu kekaukali namea kaualeꞌa, ia seapaꞌe namea saꞌino.

²⁰ Keakua ekonaꞌi okou inoho laoi, kena emea okou ikaꞌa pohoulu Satan. Jesus kakou Aliꞌi ilolosi laoi okou.

²¹ Maua ma Timothy eheheaꞌu ma Keakua. Kama la ekakala hihia aku i okou. Ia nakaina hamaoni anau la Lucius, Jason, lakou ma Sosipater ekakala hihia aku i okou hoi.

²² Anau Tertius kekama kela ekakaa nakakala Paul iloko kelauniu nei. Anau ekakala hihia aku i okou i kemale Kealiꞌi hoi.

²³ Gaius ekakala hihia aku i okou. Makou nahakina ana eꞌuku hakoa iloko hale kehale aia nei. Erastus elolosi namoni kemakaꞌina nei. Kama la laua ma Quartus kaina makou ekakala hihia aku i okou.

²⁴ Kakou Aliꞌi Jesus Christ ilolosi laoi okou hakoa naualoko hamau. Amen.

Keloku haoki

²⁵ Kakou ihamaha i Keakua. Anau nikaukaꞌu aku okou kelono kaualeꞌa Jesus Christ, kena Keakua elavaa kemea okou ikuu mau i kehakina la. Nakakala la nihunaa lia mai imua lo.

²⁶ Ia Keakua nime aꞌe alakama imua la ikakaa nilauniu pela ihakae nakakala aia la, ilavaa nakama kemaalama nei hakoa ihakina nohalono i aia. Ia vahonei Keakua ehaꞌali aꞌe kehakaꞌoko namela. Keakua eola kahi.

²⁷ Kama la soia eakamai. Ia Jesus Christ ekonaꞌi kakou ihamalumalu kama la naualoko hamau. Amen.