Romans 13 - Luaniua New Testament

Halono nakama hamakua

¹ Okou ihalono nakama hamakua hakoa. Maikinimea Keakua soia ehanoho nakama la. Ia kama la ekini nakama hamakua kakou la hoi.

² Ia poi hekama ehakauoki ma nakama hamakua la, kena kama na ehakauoki ma nakama kela Keakua nikini la. Ia kena Keakua mehakonukonu kama na.

³ Poi hekama epena namea ekonu, kena kama na mesemakaꞌu nakama hamakua la. Ia poi kama na epena namea esala, kena kama na ekau kemakaꞌu nakama la. Ia poi okou ehihai isemakaꞌu nakama hamakua la, kena okou ipena kahi namea ekonu. Kena nakama la mehakaꞌoko pela okou nikama kaualeꞌa.

⁴ Kama hamakua la eheheaꞌu ma Keakua pela ilolosi hakaualeꞌa okou. Ia poi okou epena namea saꞌino, kena okou ikau kemakaꞌu kama la. Maikinimea kama la eisi namahi aia kekaa okou imake. Kama la eheheaꞌu ma Keakua, kena meilakia nakama kela epena namea saꞌino.

⁵ Ia kena okou ihalono nakama hamakua la. Maikinimea nakama la elavaa kelakia okou. Ia okou namakino avale pela kipukipu kehalono la ekonu.

⁶ Kela hea okou esui aꞌe na{kakisi}. Maikinimea nakama hamakua la eheheaꞌu ma Keakua, kena eko namoni la nopena hea lakou ekau kepena la.

⁷ Okou iau aꞌe nakama hamakua la namea kela ekau ma nakama la. Poi nakama la eainoa aku na{kakisi}, kena okou iau aꞌe na{kakisi} la. Ia poi nakama la eme aku okou isui na{lasini}, kena okou isui namea la hoi. Poi okou ikau kemakaꞌu nakama la, kena okou imakaꞌu nakama la. Ia poi okou ikau kehamaha nakama la, kena okou ihamaha nakama la hoi.

Okou ilaoi alakama

⁸ Okou isui muli namea okou eko la. Ia okou ivaꞌai halaoi kelaoi alakama. Poi hekama elaoi alakama, kena kama na ekaukali hamaoni nakuaa hakoa, pela

⁹ “Okou iseꞌalemaka ailalao Okou isekaa alakama nomake. Okou iseailalao. Okou isemanaꞌo namea alakama.” Ia nakuaa la ia ma alakuaa hoi esuꞌui hakoa iloko kuaa hokahi. Emea ma, “Aꞌoe ilaoi alakama, ihau poi aꞌoe elaoi soꞌoe.”

¹⁰ Poi hekama elaoi alakama, kama na meselavaa kehai saꞌino nakama la. Keualoko kama la elaoi, kena kama la ekaukali hamaoni nakuaa la hakoa.

¹¹ Kela mea hoi. Kakou ehakina pela Christ mevaꞌai mai nokonaꞌi kakou. Ia okou ikau kemakino pela kama la ukapili ikae mai. Ia kena okou iala kahi.

¹² Kepo ulaꞌa, kena vahonei ukae kahaka. Kena okou ikiaꞌi nakipukipu kepouli, kena uko nahana eꞌiva la.

¹³ Okou ikaukali nakipukipu kaualeꞌa keao. Ia okou isekahao haeꞌo, ia seunu mahi namevale, ia sehai huli. Okou isehakaukau, ia semanava sano.

¹⁴ Emeia okou ikaukali nakipukipu kakou Aliꞌi Jesus Christ. Ia okou isehakaꞌoko kekaukali nakipukipu saꞌino kela nakinokama okou la hihai.