Romans 12 - Luaniua New Testament

Keola Keakua hihai

¹ Aukaina. Keakua ehaialoha mai kakou. Ia kena anau eme aku okou ihoꞌi aꞌe nakinokama okou i Keakua, pela naola okou mekapu, ia kaualeꞌa i namaisu aia. Kenei kipukipu kehamalumalu kela kama la hihai.

² Ia okou isekaukali nakipukipu kemaalama nei. Emeia okou ihakiꞌe konu nahakaꞌoko okou, pela ihakea naola okou. Kena okou memakino laoi namea kela Keakua ehihai. Ala nikipukipu kaualeꞌa kela ekonu i namaisu aia.

³ Keakua elolosi laoi anau. Ia kena anau eme aku okou hakoa, pela okou isekau keahu soꞌokou. Emeia okou ikuꞌu konu nahakaꞌoko okou, ikau ma kehakina kela Keakua niau aku maꞌokou.

⁴ Nakinokama kakou ekomaꞌi nakamaꞌina. Ia kela kinokama hokahi oia. Ia nakamaꞌina la eꞌee i nakipukipu lakou.

⁵ Kakou nahakina ana eme pela hoi. Niaina ma kakou ekomaꞌi, kakou esuꞌui ma Christ pela kinokama hokahi. Ia kena kakou hakoa nikamaꞌina iloko kinokama hokahi la.

⁶ Keakua elolosi laoi kakou, kena iau aꞌe kakou namahi eꞌee. Poi Keakua eau mai namahi kehakae nakakala aia, kena kakou ikakala, ikau ma kehakina kakou la.

⁷ Ia poi kama la eau mai namahi kekonaꞌi alakama, kena kakou ikonaꞌi nakama la hoi. Poi kama la eau mai namahi keaoaꞌo, kena kakou iaoaꞌo.

⁸ Ia poi kama la eau mai namahi kehapulupulu alakama, kena kakou ihapulupulu nakama la hoi. Ia poi kama la eau mai namahi kevavae naheheaꞌu kakou, kena kakou iaumalie kevavae aꞌe namea la. Ia poi kama la eau mai namahi kelolosi alakama, kena kakou ilolosi hakaualeꞌa nakama la. Ia poi kama la eau mai namahi kememe halaoi alakama, kena kakou ihihia kememe halaoi nakama la.

⁹ Okou ilaoi hamaoni alakama. Ia kiaꞌi namea saꞌino, kena ikaohi mau namea kaualeꞌa.

¹⁰ Okou ihaikaina laoi kama ma kekama, kena ihamaha nakama la ilaꞌa iluna maꞌokou.

¹¹ Okou isemakananae. Ia hapulupulu soꞌokou noheheaꞌu ma Kealiꞌi i namahi Keanana Kapu.

¹² Okou ihihia, keualoko okou enoho kali Kealiꞌi. Ia okou ihavalekoa, keualoko nakapahala la mekae aku okou, kena kauhano kelokuloku.

¹³ Okou ivavae aꞌe naheaꞌu okou la, ikonaꞌi nakama ekapu Keakua kela ehaaloha. Ia okou iaumalie nokonaꞌi nakama hakoa.

¹⁴ Kakala hakaualeꞌa i nakama kela ekahao sala ma okou. Okou ikakala hakaualeꞌa, ia sesalu haeꞌo nakama la.

¹⁵ Keualoko alakama ehihia, kena okou ihihia hoi. Ia keualoko alakama ekanikani, kena okou ikanikani hoi.

¹⁶ Okou inoho laoi ma alakama. Okou iseahu, ia sehanaꞌino nakama kela emoulalo. Okou isemea pela maꞌokou nikama eakamai.

¹⁷ Aukaina. Poi hekama ehai saꞌino i okou, kena okou isehuli aꞌe nohai saꞌino kama la. Emeia okou ihai namea ekonu kela ekau ma nahakaꞌoko nakama hakoa.

¹⁸ Poi okou elavaa kenoho laoi ma alakama, kena ekaualeꞌa pela okou inoho laoi ma nakama na.

¹⁹ Okou isesui muli namea saꞌino kela alakama ehai aku okou. Kelaa hevahi Keakua soia. Nakakala Kealiꞌi nei emau iho iloko kelauniu kapu, “Anau sonau mesui muli namea saꞌino Kela nakama la ehai la.”

²⁰ Emeia okou ipena penei avale, “Poi hekama eliloko i okou la ehiꞌai, Kena okou ihanai kama na. Ia poi kama na ehiunu, Kena okou ihaunu kama na. Poi okou ekonaꞌi kama na penei, Kena okou mehanapa kama na.”*f3*

²¹ Nakipukipu saꞌino la esekau kehaimahi iluna okou. Ia okou ikaukali nakipukipu kaualeꞌa kela elaꞌa iluna ma nakipukipu saꞌino la.