Romans 11 - Luaniua New Testament

Keakua eko muli nakama Israel

¹ Ia anau evasili aku okou. Ea? Keakua ekiaꞌi keonohenua aia la? Seai. Anau hekama Israel hoi. Anau ekeiho i keꞌaha kela Abraham, ia anau hekama kela kemanava Benjamin.

² Keakua sekiaꞌi keonohenua aia la. Kama la emakino nakama la imua lo. Ia okou emakino nakakala kela emau mai iloko kelauniu kapu. Pela Elijah nikaumaluu aꞌe Keakua i nakipukipu nakama Israel la penei,

³ “Kealiꞌi. Alakama ekaa nakama hakakae nakakala aꞌoe la, Kena iseu na{olta} aꞌoe la. Kenei anau sonau ekoe, Ia alakama ehaꞌikeꞌike ma ikaa anau imake hoi.”

⁴ Ia Keakua esui nakakala kama la penei, “Anau ekini hiku simaka nakama, Ia nakama la esehamalumalu hakipua Baꞌal.”

⁵ Ia vahonei, eme pela hoi. Keakua ehilihili nakama kela aia ehihai ilolosi la.

⁶ Ia seme pela nakama la ehai namahi lakou pela Keakua amelolosi lakou. Seai. Keakua elolosi nakama kela aia ehihai ilolosi la.

⁷ Emea pela ma nakama Israel la hihai ikonu i namaisu Keakua, ia nakama la selavaa ikonu. Emeia nakama kela Keakua ehilihili la, nakama la ekonu i namaisu aia. Ia alakama ehakapanaka oia.

⁸ Ehau poi nakakala kela emau iho iloko kelauniu kapu, “Keakua emea nahakaꞌoko nakama la nopouli, Ia emea naꞌalemaka nakama la noseꞌike, Ia epui nakalina nakama la noselono, Hanokae keaho nei.”

⁹ Ia David ekakala hoi ma, “Nakama la enoho noꞌai, Ia namea la mekaiꞌi lakou oia. Imea nakama la imaoha ilalo, Pela isui muli nahaisala lakou la.

¹⁰ Naꞌalemaka nakama la meseni, Iselavaa lakou keꞌike. Ia naanakua lakou mepiꞌo, I naola lakou ame hainakaa naualoko hamau.”

¹¹ Anau eme aku hoi. Ea? Keualoko na{Jiu} la nimaoha ilalo, emea pela nakama la ehavaꞌee ikaha ma Keakua? Seai. Na{Jiu} la epena namea esala, ia kena Keakua ekonaꞌi nakama enoho pouli, imea na{Jiu} la isano haeꞌo.

¹² Na{Jiu} la epena namea saꞌino, kena iko Keakua ihoꞌi aꞌe namea kaualeꞌa i nakama kemaalama nei. Keakua eko namea na{Jiu} elano la, kena iau aꞌe namela i nakama enoho pouli. Ia keualoko na{Jiu} la mevaꞌai muli aꞌe Keakua, kena kama la mevavae aꞌe komaꞌi namea kaualeꞌa hoi, ilaꞌa iluna ma namea kaualeꞌa imua.

Keakua ekonaꞌi nakama enoho pouli

¹³ Ia kena vahonei, anau ekakala aku okou nakama enoho pouli. Keakua ehaunalia anau ikaukaꞌu aku okou. Kela hea anau eahu pela anau ekonaꞌi okou.

¹⁴ Anau ehihai pela nakama makou la isano i okou, imea nikamaa kama makou ivaꞌai muli Keakua. Pela ikonaꞌi nakama la iola hoi.

¹⁵ Keualoko Keakua nikiaꞌi na{Jiu} la, kena kama la ehapoꞌi halaoi alakama iloko kemaalama nei. Ia keualoko Keakua meko muli na{Jiu} la, nakama la meola muli ikaha ma kemake hoi.

¹⁶ Keualoko na{Jiu} la ehoꞌi aꞌe kemuli halaoa ekapu la i Keakua, kena halaoa la hakoa ekapu. Ia apoi napakiaꞌa kelaꞌau la ekapu, kena nalala kelaꞌau la ekapu hoi.

¹⁷ Na{Jiu} kela sehakina la ehau poi nalala kelaꞌau ke{oliv} kela Keakua ekuu ikaha nopesia. Ia okou nahakina ana ehau poi nalala ke{oliv} vao. Keakua esuꞌui aꞌe okou ma pulapula ke{oliv} hamaoni la. Ia kena vahonei okou eko namea kaualeꞌa ke{oliv} hamaoni la.

¹⁸ Ia okou iseahu. Okou isemea ma okou ihananiu iluna nalala ke{oliv} hamaoni imua la. Maikinimea okou nilala oia. Poi okou eahu, kena okou ilolosi hamakonu. Okou sekaohi pulapula la. Pulapula la ekaohi okou avale.

¹⁹ Ia okou amekakala pela, “Keakua ekuu ikaha nalala ke{oliv} hamaoni la, ilavaa makou kesuꞌui aꞌe naꞌina nalala la nimau.”

²⁰ Hamaoni. Keakua ekuu nalala la ikaha, maikinimea nakama la esehakina hamaoni. Ia okou esuꞌui aꞌe ke{oliv} la, maikinimea okou ehakina. Ia okou iseahu. Okou ikau kemakaꞌu avale.

²¹ Keakua ekuu nalala hamaoni la ikaha, kena kama la elavaa kesepe okou i kevahi hoi.

²² Okou ihakaꞌoko maha pela Keakua ehaialoha alakama, ia mehakonukonu alakama hoi. Kama la mehakonukonu nakama kela ekiaꞌi nahakina lakou. Ia poi okou ekauhano kekaukali aia, kena kama la mekauhano kehaialoha aku okou. Ia poi okou sekaukali, kena kama la mekuu kia okou ikaha hoi.

²³ Ia poi na{Jiu} la evaꞌai muli nokaukali hoi, kena Keakua mesuꞌui muli aꞌe nakama la i ke{oliv} la. Maikinimea Keakua eisi namahi kesuꞌui muli aꞌe nakama la i ke{oliv} hamaoni la.

²⁴ Okou nilala ke{oliv} vao la, ia kena nakipukipu okou la eꞌe ikaha ma ke{oliv} hamaoni la. Ia niaina ma nakipukipu okou la eꞌe, Keakua ekuu okou ikaha ma kelaꞌau okou la, kena isuꞌui aꞌe okou i ke{oliv} hamaoni la. Ia kena ehainahie haeꞌo Keakua kesuꞌui muli aꞌe nalala hamaoni i kelaꞌau lakou hamaoni la.

Keonohenua Keakua

²⁵ Aukaina. Anau hihai okou iailoa kemea kela ehunaa lia imua. Aoki okou ameahu maꞌokou eakamai. Eme penei. Alakama i nakama Israel la mehakapanaka, nokae keualoko nakama enoho pouli la mehakina Keakua. Ia Keakua soia emakino ehia nakama enoho pouli mehakina.

²⁶ Kena keualoko la, Keakua mekonaꞌi nakama hamaoni Israel la hakoa iola. Ehau poi nakakala aia nimau mai iloko kelauniu kapu ma, “Kekama kela meikonaꞌi kakou, Mehamai Zion, Noui nahaisala kela haleaina Jacob la ikaha.

²⁷ Anau ekakala hamaoni aꞌe nakama la, Pela anau mesolo nahaisala lakou la ikaha.”

²⁸ Na{Jiu} la sehihai kelono kaualeꞌa. Ia kena Keakua ekonaꞌi okou nakama enoho pouli. Ia kama la ehaikama laoi na{Jiu} la, maikinimea aia nikini nakipuna nakama la imua.

²⁹ Ia Keakua selavaa kehuli kehakaꞌoko aia la. Kama la selavaa kekiaꞌi nakama kela aia nikini la. Ia kama la selavaa keko muli namea aia nihoꞌi aꞌe la.

³⁰ Imua, okou sehalono Keakua. Ia vahonei, na{Jiu} la sehalono kama la. Ia kena Keakua ehaialoha aku okou.

³¹ Na{Jiu} emea pela hoi. Niaina ma nakama la sehihalono Keakua, kama la mehaialoha aꞌe nakama la imuli, ehau poi kama la nihaialoha aku okou imua.

³² Keakua ekiaꞌi nakama hakoa ihakapanaka. Pela aia mehaialoha muli nakama la.

Nakakala hamaha Keakua

³³ Namea kaualeꞌa Keakua la ehananiu haeꞌo! Keakamai ia ma keailoa Keakua enoko lo! Selavaa hekama kemakino hea kama la ehakaꞌoko. Ia selavaa hekama keailoa nakipukipu kama la. Nakakala kelauniu kapu emea ma,

³⁴ “Oai kekama emakino kehakaꞌoko Kealiꞌi? Oai kekama elavaa kekakala aꞌe kama la?

³⁵ Ia sehikama ehoꞌi aꞌe kama la nimea, Pela kama la isui muli aꞌe.”

³⁶ Keakua epenapena namea hakoa, kena elolosi namea la. Pela namea hakoa mehamaha i aia. Kena kakou ihamaha kama la naualoko hamau! Amen.