Revelation 9 - Luaniua New Testament

¹ Kena ke{enselo} kana hakaulima eili kepuu aia la. Ia kena anau eꞌike hekuu ekeiho ikaha ma kevaelani nopoꞌu ilalo kemaalama nei. Ia hekuu la eko ke{kii} kokoꞌa kela kelua enoko lo. Kelua kela epouli kakano la.*f8*

² Kena hekuu la ukalaꞌi kokoꞌa kelua la. Kena keꞌohu kelua la uꞌohu aꞌe ikaha. Keꞌohu la ehau poi keꞌohu keumu elahi ekahu. Kena keꞌohu kelua la euhi namaisu kelaa ia ma kevaelani la nopouli.

³ Namanu hamakaꞌu ulee iho ikaha ma keꞌohu la nokoꞌo iluna kemaalama nei. Namanu la ekipu poi nikama kelauniu. Ia namanu la ehaimahi poi heunu.

⁴ Keakua epui namanu la isekahao puamu nalaꞌau, ma naveve, ia ma namea hakoa kela esomo iloko kemaalama nei. Ia Keakua ehakana namanu la ikahao puamu nakama kela seisi kehamakino aia i namualae lakou la.

⁵ Keakua seau aꞌe namanu la namahi kekaa nakama la nomake. Emeia namanu la elavaa kemea nakama la ihalono lihu kaulima namalama. Ia kelihu la ehau poi kelihu heunu, keualoko kemela eꞌuu kekama.

⁶ Vahola, nakama la mesee keala lakou imake, ia mesehiala elave. Nakama la mehihai imake, ia meselavaa kemake.

⁷ Namanu hamakaꞌu la ekipu poi na{hosi} kela ekanakana kevuhu. Ia namea kela epili iluna napohoulu lakou la ehau poi nahau pahaku mea. Ia namaisu lakou la ehau poi namaisu kekama.

⁸ Nalaulu lakou la ehau poi nalaulu kehine. Ia naniho lakou la ehau poi naniho salau leikama.

⁹ Ia napolepole emau i nahakahaka lakou. Ia kealana napaꞌau lakou la ehau poi kealana na{hosi} komaꞌi ehulo. Ia ehau poi navaꞌa*f9* kela eulu kaua novuhu.

¹⁰ Nalolosuꞌi i namosuꞌi lakou la emakaꞌai ehau poi namosuꞌi naheunu. Ia namosuꞌi namanu la eisi namahi kemea keonohenua la nohalono lihu kaulima namalama.

¹¹ Ke{enselo} kela elolosi kelua enoko la ehananiu iluna namanu hamakaꞌu la. Kemale aia i nakakala na{Jiu} eme ma Abaddon. Ia kemale aia i nakakala haGreek eme ma Apollyon.*f10*

¹² Kehalono lihu amaka la ulaꞌa, ia seiai siaoa nahalono lihu meio mai.

¹³ Kena ke{enselo} kana haono uili kepuu aia la. Ia kena anau elono keleo ekakala iho ikaha ma keluaoa namaka ke{olta} pahaku mea la kela ekuu imua Keakua.

¹⁴ Keleo la eme aꞌe ke{enselo} kana haono la ma, “Hakana koahaa na{enselo} kela nipono kia i ke{liva} elahi emale ma Euphrates.”

¹⁵ Na{enselo} la unakanakana mai imua pela ikaa heꞌoina elahi nakama kemaalama nei la imake. Ia keaho nei, kama la uhakana na{enselo} la io.

¹⁶ Kena anau elono lua huikalau namano nakama kela ehulo iluna na{hosi} lakou la novuhu kaua.

¹⁷ Ia nakama la ekipu penei. Napolepole kela emau nahakahaka lakou emea nomalaa poi heahi, ia ekea poi kemoana, ia ehelo poi kapuꞌe. Napohoulu na{hosi} la ehau poi napohoulu nasalau leikama. Ia naahi, naꞌohu, ia ma nahakuolaa malaa*f11* esopo iho ikaha ma napuꞌua lakou.

¹⁸ Keꞌoina elahi nakama i kemaalama nei ukaia nomake i naahi, naꞌohu ia ma nahakuolaa malaa kela esopo iho ikaha ma napuꞌua na{hosi} la.

¹⁹ Namahi na{hosi} la emoe iloko napuꞌua lakou, ia emau i namosuꞌi lakou la hoi. Ia namosuꞌi lakou la ehau poi niꞌaka kela elavaa kekaa kama ma naniho lakou.

²⁰ Niaina ma alakama kemaalama nei la esemake i nahalono lihu la, nakama la sekiꞌe ikaha ma nahaisala lakou la. Nakama la oihamalumalu nakipua ia ma naaiku lakou la. Naaiku la epena mai i napahaku mea, napahaku eꞌiva, keakana kea, nahaku, ia ma nalaꞌau. Ia namela selavaa keꞌike, ia selavaa kelono, ia selavaa kehahaele.

²¹ Naonohenua la ekauhano kekaukali nakipukipu lakou saꞌino la. Nakama la ekaa nakama nomake, ia epenapena napanamu lakou la. Ia nakama la ekauhano kepaa huli, ia eailalao oia.