Revelation 8 - Luaniua New Testament

Keloꞌi kanahahiku

¹ Keualoko punua {sipisipi} la ehana keloꞌi kanahahiku la, nakama i kevaelani la enoho semuu.*f6*

² Kena anau uꞌike koahiku na{enselo} kela ekuu imua Keakua. Ia nakama la eko kauhiku napuu iliili.

³ Kela {enselo} ehamai nokuu imua ke{olta}. Kama la ekaohi kaneꞌo pahaku mea. Ia kama la eko ke{incense} komaꞌi nohapaa aꞌe ma naloku keonohenua Keakua la. Kena kama la ehoꞌi aꞌe namea la iluna ke{olta} pahaku emea kela ekuu imua kuai hamakua la.

⁴ Keꞌohu ke{incense} la ehapaa ma naloku keonohenua Keakua nohaele sala iluna ikaha ma nalima ke{enselo} la imua namaisu Keakua.

⁵ Kena ke{enselo} la eko kaneꞌo la ihao namalamala keahi ke{olta}, ia kena ilakua iho ilalo kemaalama nei. Kena hakuli la uapihi hamaloa, keꞌemo la ukalaꞌi, ia kelulu henua la ehaimahi lo.

Eili napuu

⁶ Kena koahiku na{enselo} la ukanakana iili napuu lakou la.

⁷ Ke{enselo} amaka eili kepuu aia la. Kena na{aesi} makau ia ma namalamala keahi la ehilo ma kekoko ekeiho mai ilalo kemaalama nei. Ia kena komaꞌi naꞌina i kemaalama nei la ukunia novela. Ia komaꞌi nalaꞌau ukunia novela hoi. Ia naveve kemaalama nei la uvela hakoa.

⁸ Ke{enselo} hasiaoa eili kepuu aia la. Ia kena kemea ehau poi hemouna eulaula keꞌahi ulakua iho iloko kemoana. Ia kena kamaꞌi keꞌina kemoana uhuli sia mo koko.

⁹ Ia komaꞌi naiꞌa kemoana la umake. Kena komaꞌi navaꞌa hakua la useua lia.*f7*

¹⁰ Ke{enselo} hakoukolu uili kepuu aia la. Ia kena hekuu elahi emasina poi heahi kela usopo iho ikaha ma kevaelani, nokeiho iluna komaꞌi na{liva} ia ma namakavai.

¹¹ Kemale hekuu la esui ma Emala. Ia kemela emea komaꞌi kevai la nomala. Ia komaꞌi kekama emake kulana lakou niunu kevai la. Maikinimea kevai la uhuli nomala.

¹² Ke{enselo} kanahaluaoa uili kepuu aia la. Ia kena kemea ekili heꞌoina elahi kelaa la, ia ekili heꞌoina elahi kemaalama iluna, ia ekili komaꞌi nahekuu la. Kena heꞌoina namela epouli. Ia kena heꞌoina keao la epouli, ia heꞌoina kepo la upouli kakano hoi.

¹³ Vahola, anau eꞌike kemanu ko moa elahi elelele valuna. Kena anau elono kemanu la ekakala iho keleo elahi penei, “Alohai. Alohai. Alohai nakama kela enoho i kemaalama nei la. Keualoko kela koukolu na{enselo} la meili napuu lakou la, kena nakama kemalama nei la mehalono lihu haeꞌo.”