Revelation 6 - Luaniua New Testament

Punua {sipisipi} ehana naloꞌi kelauniu elii

¹ Kena anau eꞌike punua {sipisipi} ehana keloꞌi amaka i kehakauhiku naloꞌi la. Ia kena anau elono kekama amaka i kehaluaoa nakama eola kahi la ekakala. Ia keleo aia la ehau poi hakuli. Kama la emea ma, “Hamai.”

² Kena iko anau iꞌila noꞌike he{hosi} maꞌini. Kekama kela enoho iluna ke{hosi} la epiꞌi kealololo. Ia kama la eko kehau hamakua, kena ikele novuhu kaua.

³ Kena punua {sipisipi} la ehana keloꞌi hasiaoa la. Ia kena anau elono kekama kanahasiaoa kela eola kahi la ekakala ma, “Hamai.”

⁴ Kena ke{hosi} emea la uhaele iho ikaha. Ia kekama kela enoho iluna ke{hosi} la eko namahi imea naonohenua kemaalama nei inonoho haeꞌo. Pela nakama la hakoa amekaa solakou nomake. Ia kama la eko penisi elahi.

⁵ Kena punua {sipisipi} la ehana keloꞌi hakoukolu. Ia kena anau elono kama kana hakoukolu eola kahi ekakala ma, “Hamai.” Ia kena anau uꞌila noꞌike ke{hosi} palaa. Ia kekama enoho iluna ke{hosi} la ekaohi kemea ehamamaha i kelima aia.

⁶ Anau elono keleo ekakala iho ikaha ma koahaa nakama eola kahi la ma, “Kekama ameheheaꞌu keaho hokahi noko keꞌupu hao halaoa hokahi. Ia kela kama ameheheaꞌu keaho hokahi noko koukolu naupu hao {laisi}. Ia okou isememe puamu nasunu ia ma namesai.”

⁷ Kena punua {sipisipi} la ehana keloꞌi kanahahaa la. Ia kena anau elono kama kanahahaa eola kahi la ekakala ma, “Hamai.”

⁸ Kena iko anau iꞌila noꞌike ke{hosi}. Keili aia la ehau poi hemanu ekapili imake. Kemale kekama kela enoho iluna ke{hosi} la esui ma Kemake. Ia kela kama emale ma Keꞌina Kemake ekaukali vamuli. Koꞌolua la eko namahi laua nohavaꞌee nakama kemaalama nei hakoa ehaa naukulana. Kena ikaa ukulana hokahi nomake. Pela alakama amemake kulana kaua, ia alakama amemake kulana keone. Ia alakama memake i namahana. Ia namanu leikama kemalama nei la amekaa alakama nomake.

⁹ Kena punua la ehana keloꞌi kanahalima. Ia kena anau uꞌila noꞌike naanana nahakina ana enoho ilalo ke{olta}. Nakama la nikaia lia, maikinimea lakou ekaukaꞌu kahi nakakala Keakua.

¹⁰ Nakama la ekakala hamaloa i naleo lakou ma, “Keakua hananiu. Aꞌoe ekapu, kena ikakala kahi kehamaoni. Nakama kemaalama nei la nikaa makou nomake. Ea? Aꞌoe mehakonukonu nakama la vahohee, isui muli nakoko makou nei.”

¹¹ Ia kena Keakua eau aꞌe nahakina ana la naauꞌahu loloa maꞌini, kena ime aꞌe nakama la ihakali kama ualoko. Alakama heheaꞌu Keakua, ehau poi nakaina lakou keloku la. Ia nakama la mekaia nomake hoi. Ehau poi nahakina ana la nikaia lia imua. Ia keualoko keꞌoina nakama emake la ulanakia, kena Keakua mehakonukonu nakama kemaalama nei la.

¹² Kena anau eꞌike punua la ehana keloꞌi kanahaono. Ia vahola, keꞌina la ukii lia kelulu henua haimahi. Ia kelaa la upouli kakano, epalaa poi keloulu na{nanikoti}. Ia kemaalama la umea poi hekoko.

¹³ Kena nahekuu kevaelani la umaoha sala ilalo. Ehau poi nahua emoko emaoha, keualoko kemakani la emaili haimahi nolulu nalaꞌau la.

¹⁴ Kevaelani la uhakeꞌi nolano, poi hemoena elii nosau ikaha. Ia namouna ia ma nahenua hakoa uꞌene ikaha ma naꞌina lakou la.

¹⁵ Kena nakuꞌu kemaalama nei, ma nakama hamakua naonohenua, ma nakama hamakua napulepule, nakama haimoni, nakama haimahi, nakama moulalo, ia ma nakama hamakua, nakama la hakoa emuni solakou iloko nalua i navahi namouna, ia lakonu nahakupaa iluna namouna la.

¹⁶ Nakama la eanaa aꞌe namouna ia ma nahakupaa la, “Maoha iluna makou. Ia hamuni makou ikaha ma kekama kela enoho iluna kuai hamakua la, ia ma punua {sipisipi} la. Aoki punua la ameliloko makou.

¹⁷ Maikinimea keaho nei, makou mehalono lihu lo i keliloko koꞌolua la. Ia sehikama meola.”