Revelation 5 - Luaniua New Testament

Punua {sipisipi} ia ma kelauniu elii

¹ Kena anau eꞌike kekama kela enoho iluna kuai hamakua la. Ia kama la ekaohi kelauniu elii la i kelima laua aia. Savahi kelauniu la hakoa ekakaa lia. Ia kelauniu la eisi kauhiku naloꞌi emau.

² Ia kena anau eꞌike ke{enselo} haimahi la ekakala hamaloa keleo aia la ma, “Oai kekama ekau kehana naloꞌi nokalaꞌi kelauniu elii la?”

³ Ia niaina ma nakama i kevaelani, ia ma nakama i kemaalama nei, ia ma nakama i kemaalama ilalo la, sehikama elavaa kekalaꞌi kelauniu la noꞌila iloko.

⁴ Kena anau ekani haeꞌo. Maikinimea sehikama ekau kekalaꞌi kelauniu la noꞌila iloko.

⁵ Kelaa kama hamakua la eme mai anau, “Aꞌoe isekani. Ila aꞌe, salau elahi la. Kama la ehananiu iluna keꞌaha Judah. Kama la hemopuna kekuꞌu David. Ia kama la ehakina hamaoni nokae kehaoki. Kama la elavaa kehana kauhiku naloꞌi la nokalaꞌi kelauniu la.”

⁶ Kena anau eꞌike punua {sipisipi} ekuu i lakonu kuai hamakua la. Ia koahaa nakama eola kahi ia ma nakama hamakua enoho hakiꞌe navahi kuai la. Punua {sipisipi} la ehasula aꞌe poi hemanu ekaia. Ia punua la eisi kauhiku napaki, ma kauhiku naꞌalemaka. Ala koahiku naanana Keakua, kela kama la ehaunalia iho iloko kemaalama nei hakoa.

⁷ Punua {sipisipi} la ehaele noko kelauniu elii la ikaha ma kelima laua kekama kela enoho iluna kuai hamakua la.

⁸ Keualoko punua la niko kelauniu la, koahaa nakama eola kahi ia ma kipulua ma haa nakama hamakua la ukoukuli imua punua {sipisipi} la. Nakama la ekaohi na{kita}, ia ekaohi hoi na{pesoni} pahaku emea, upii ke{incense}. Ia ke{incense} la, ala nilokuloku nakama ekapu Keakua.

⁹ Nakama la hakoa ehuhua kehua vahonei, “Aꞌoe ekau keko kelauniu la, Nohana naloꞌi la ikaha. Mai aꞌoe nikaloa lia, Ia aꞌoe eau aꞌe kokoko, Pela isui nakama komaꞌi, Iau aꞌe ma Keakua. Ala nikama iloko namanava hakoa, Nakama i nakakala hakoa, Lakou ma nakama iloko naꞌaha ia ma naonohenua hakoa,

¹⁰ Aꞌoe ehilihili nakama la Ime mo onohenua Keakua, Imea nakama la mo maakua Iheheaꞌu ma Keakua kakou. Ia kena nakama la meihananiu Iluna nakama kemaalama nei.”

¹¹ Kena anau eꞌike simaka namano na{enselo} hakoa. Nakama la ekuu hakiꞌe kuai hamakua la, ia ekuu hakiꞌe hoi koahaa nakama eola kahi la, ia ma nakama hamakua la. Ia anau elono nakama la hakoa

¹² ehuhua hamaloa ma, “Punua {sipisipi} Ekaia nomake Aꞌoe ekau kehananiu, Ia ekuku laoi, Aꞌoe eakamai, ia eivi lo. Ia kena kakou isau Komale ialuna, Ihamalu i aꞌoe, Ihamaha i aꞌoe.”

¹³ Kena anau elono nakama hakoa i kevaelani, kemaalama nei, kemaalama ilalo, ia ma kemoana. Nakama la hakoa ehuhua penei, “Kama enoho kuai hamakua Ia ma punua {sipisipi} la hoi, Kakou ihamaha namale olua Hamalu namahi naualoko hamau.”

¹⁴ Koahaa nakama eola kahi la eme aꞌe, “Amen.” Ia nakama hamakua la ekoukuli ilalo nohamalu.