Revelation 4 - Luaniua New Testament

Hamalumalu i kevaelani

¹ Kena anau eꞌike kelaa mea hoi. Kokoꞌa i kevaelani la ukalaꞌi. Ia anau elono keleo ehau poi healana kepuu eili. Kela keleo anau nilono imua, ia kama la emea ma, “Hamai inei. Ia kena anau meihuli aku aꞌoe hea meiapihi mai imuli.”

² Vahola namahi Keanana Kapu ukau iloko anau. Ia anau eꞌike kuai hamakua i kevaelani. Ia kekama kela enoho ilaa ekipu penei.

³ Namaisu aia eꞌivaꞌiva poi nalolo kelaa. Ia keumaka la ehakiꞌe navahi kuai la. Ia nalaꞌei keumaka la ehau poi kemasina kemoana.

⁴ Ia anau eꞌike kipulua ma haa nakuai hoi ekuu hakiꞌe navahi kuai hamakua la. Ia kipulua ma haa nakama hamakua enoho iluna nakuai la. Nakama la eleleu napamalo maꞌini, ia ihapili nahau pahaku mea ialuna napohoulu lakou.

⁵ Ia keꞌemo la ekalaꞌi mai i keꞌina kuai hamakua la. Kena anau ulono hakuli la eapihi hamaloa. Ia kauhiku naahi eula la ekuu imua kuai hamakua la. Ala kauhiku naanana kaualeꞌa Keakua la.

⁶ Ia anau eꞌike kemoana malinoꞌii imua kuai hamakua la, ia kemoana la emasina lo. Kena anau eꞌike koahaa nakama eola kahi la ekuu hakiꞌe navahi kuai hamakua la. Nakama la ehau poi nimanu elahi. Nakinokama nakama la euhi lia hakoa naꞌalemaka lakou.

⁷ Kama amaka la ehau ma salau leikama elahi. Ia kama hasiaoa la ehau poi he{bulumakau}. Ia namaisu kama hakoukolu la ehau poi namaisu kekama. Ia kama kanahahaa la ehau poi kemanu lelele elahi lo.

⁸ Ia kama ma kekama eisi eono napaꞌau aia. Ia nakinokama nakama la euhi lia hakoa naꞌalemaka lakou. Ilalo napaꞌau lakou la eme pela hoi. Ia keaho ma kepo, nakama la ehuhua kahi ma, “Ekapu, ekapu, ekapu. Keakua Kealiꞌi hananiu Unanoho mai avale, Ia enoho vahonei, Ia meinoho naualoko hamau.”

⁹ Nakama eola kahi la ehamalumalu kekama kela enoho iluna kuai hamakua la, kekama kela eola kahi. Nakama la ehuhua kahi nohamaha kama hananiu la. Ia kulana nakama la ehuhua,

¹⁰ kipulua ma haa nakama hamakua la ekoukuli imua kekama kela enoho kuai la, kena ihamalumalu kama eola kahi la. Ia nakama hamakua la eui nahau lakou nokuꞌu imua kuai la, kena ihuhua penei,

¹¹ “Kealiꞌi, Keakua makou, Namahi aꞌoe la ehananiu. Kena naonohenua hakoa ekau Kehamaha nohamalu i aꞌoe. Maikinimea aꞌoe epena keumea hakoa. Ia namea la eapihi mai vahonei, Ikaukali hea aꞌoe ehihai.”