Revelation 3 - Luaniua New Testament

Keloku i Sardis

¹ “Aꞌoe ikakaa nakakala nei i ke{enselo} kela elolosi keloku i Sardis. “Anei nikakala anau. Anau ekaohi kauhiku naanana Keakua, ia ma kauhiku nahekuu. Anau eailoa nakipukipu okou la. Alakama emea pela ma okou eola, ia okou unamake avale.

² Okou ilolosi hamakonu nokuu mau nahakina okou, aoki nahakina okou la meo nomake. Anau emakino namea okou epena la. Ia namea la eseꞌakoa i namaisu kauAkua.

³ Alakama niaoaꞌo okou nakakala Keakua imua. Vahola, okou elono nakakala la, kena ipena kaukali hea okou nilono la. Ia vahonei, okou ihalono halaoi nakakala la, kena ikiꞌe ikaha ma nahaisala okou la. Ia poi okou seala kahi, kena anau mehaele aku saika okou esekanakana, ehau poi kama ailalao amehaele aku la. Kena okou mesemakino saika hee anau amehaele aku.

⁴ “Nikamaa kama okou i Sardis semea napamalo lakou noꞌele. Ia kena nakama la meleleu napamalo maꞌini nokaꞌa manau. Maikinimea nakama la ekau.

⁵ Nakama kela ehakina hamaoni nokae kehaoki meileleu napamalo maꞌini la hoi. Ia anau mesesolo namale lakou ikaha ma kelauniu keola eola kahi. Emeia anau meikapa namale nakama la imua namaisu Kamana anau ia ma na{enselo} aia la, ihuli aꞌe pela nakama la ekaukali hamaoni anau.

⁶ “Amea okou hihai ailoa, kena halono hea Keanana Kapu ekakala aꞌe nakama keloku.

Keloku i Philadelphia

⁷ “Aꞌoe ikakaa nakakala nei i ke{enselo} kela elolosi keloku i Philadelphia. “Anei nikakala anau. Anau ekapu, ia anau ekakala kahi kehamaoni. Anau ekaohi ke{kii} kekuꞌu David. Poi anau ekalaꞌi, kena sehikama melavaa kepui. Ia poi anau epui, kena sehikama melavaa kekalaꞌi.*f4*

⁸ Anau eailoa nakipukipu okou la. Anau eailoa pela namahi okou esoliꞌi. Ia okou ekaukali nakakala anau. Kena okou senapa kekakala pela okou heonohenua anau. Ila aꞌe. Anau unakalaꞌi kokoꞌa la imua okou. Ia sehikama elavaa kepui kemela.

⁹ Halono. Keukulana Satan la emea ma lakou ni{Jiu}. Ia seai. Nakama la enuku laoi oia. Ila aꞌe. Anau meimea nakama la io mai nohamalu imua okou. Ia kena nakama la memakino laoi pela anau elaoi okou.

¹⁰ Nakapahala mekili nakama kemaalama nei, nohaꞌikeꞌike nakama la. Ia okou ekaohi mau nakakala anau, kena inoho havalekoa. Ia kena anau melolosi hakaualeꞌa okou keualoko nakapahala la mekili nakama la.

¹¹ “Anau kapili ivaꞌai mai. Kena okou ikaohi mau nahakina okou la. Pela sehikama amelavaa keko nakuhana okou la ikaha.

¹² Poi hekama ehakina hamaoni nokae kehaoki, anau mehakuu kama na poi hepou iloko hale kapu kauAkua. Ia kena kama na menoho kahi iloko hale kapu la. Anau meikakaa kemale Keakua ia ma kemale kemakaꞌina Keakua iluna kama la. Kela kemakaꞌina Jerusalem vahonei kela meihaele iho ikaha ma kevaelani kauAkua. Ia anau meikakaa kemale anau vahonei iluna kama la hoi.

¹³ “Amea okou hihai ailoa, kena halono hea Keanana Kapu ekakala aꞌe nakama keloku.

Keloku i Laodicea

¹⁴ “Aꞌoe ikakaa nakakala nei i ke{enselo} kela elolosi keloku i Laodicea. “Anei nikakala anau. Anau o kehamaoni. Anau ekauhano kehaꞌali hamaoni aꞌe nakipukipu Keakua. Ia keualoko Keakua nipena keumea hakoa, anau ehananiu iluna namela hakoa.

¹⁵ Anau eailoa nakipukipu okou. Anau eailoa pela okou sevela ia sesamalio. Ia anau ehihai pela okou ivela. Ia poi seai, anau ehihai pela okou isamalio.

¹⁶ Ia okou sevela ia sesamalio. Emeia okou emahana oia.*f5* Kela hea anau mesavale nopesia okou ikaha ma puꞌua anau.

¹⁷ Okou emea ma okou ehaimoni, pela okou ekuku laoi hoi. Ia okou semakino pela naola okou la esaꞌino. Okou ehaaloha, ia ekuku haeꞌo. Naꞌalemaka okou la eseni, ia okou sehipamalo eleleu.

¹⁸ Anau eme aku okou io mai nosui pahaku mea kela ehakuu lia keahi noꞌivaꞌiva. Pela okou mekuku laoi hamaoni. Ia okou isui nipamalo maꞌini ileleu okou. Imea okou isenapa. Ia sui hoi ni{malaseni} nopalai naꞌalemaka okou ilavaa okou keꞌike.

¹⁹ “Anau ehakonukonu nakama kela anau elaoi la, kena ipolopolo hakaualeꞌa nakama la. Kena okou ihai namahi okou ikiꞌe ikaha ma nahaisala okou la.

²⁰ Halono mai. Anau ekuu i kokoꞌa noanaa. Ame hekama elono kauleo, ia kena ekalaꞌi kokoꞌa la, kena anau mehaele iloko hale noꞌai ma kama la. Ia kama la meꞌai manau.

²¹ “Poi hekama ehakina hamaoni nokae kehaoki, kena anau mehanoho kama la i kenoholana anau la. Anau ehakina hamaoni nokae kehaoki pela hoi, kena enoho i kenoholana Kamana anau la.

²² “Amea okou hihai ailoa, kena halono hea Keanana Kapu ekakala aꞌe nakama keloku.”