Revelation 22 - Luaniua New Testament

¹ Ke{enselo} la ehuli mai anau ke{liva} emalama lo. Ia kevai la elavaa keau aꞌe keola eola kahi. Ke{liva} la eꞌo iho ikaha ma kuai hamakua kela Keakua ia ma Punua aia la enoho.

² Ia ke{liva} la eꞌo iho i lakonu keala kemakaꞌina la. Kelaꞌau keola esomo i savahi ke{liva} la hakoa. Ia kelaꞌau la ehapili nahui aia iloko sehui ma lua namalama hakoa. Ia nalaumea kelaꞌau la eisi namahi kekonaꞌi naonohenua hakoa ikaualeꞌa.

³ Ia kaivela mesekae aꞌe keꞌina la. Keakua ia ma Punua aia la menoho ilaa, iluna kuai hamakua laua la. Ia nakama heheaꞌu Keakua mehamalu i aia.

⁴ Nakama la meꞌike namaisu Keakua. Ia kemale aia memau iluna namualae nakama la.

⁵ Ia keꞌina la meselavaa kepouli. Niaina ma nakama la mesehaula keahi, ia niaina ma kelaa la seꞌini, nakama la meꞌike oia. Maikinimea Keakua Kealiꞌi mehamasina iluna nakama la. Ia nakama la mehananiu naualoko hamau.

Christ mevaꞌai mai imuli

⁶ Kena ke{enselo} la eme mai anau, “Nakakala nei meo nohamaoni. Keakua Kealiꞌi elolosi naola kela nakama hakae nakakala aia la. Ia kena kama la ehaunalia iho ke{enselo} aia la ihuli aꞌe nakama heheaꞌu aia la hea meapihi mai.”

⁷ Kena Jesus ekakala ma, “Halono mai. Anau ukapili ihamai. Nakakala kelauniu nei ehuli aku namea kela meapihi mai imuli. Ia nakama kela epena kaukali nakakala nei mehakapu lia Keakua.”

⁸ Anau John. Anau elono ia eꞌike namenei. Ia keualoko anau elono ia eꞌike namea nei hakoa, kena anau ekoukuli ilalo nohamalu ke{enselo} kela ehuli mai anau namea nei.

⁹ Ia ke{enselo} la ekakala penei, “Sehamalu mai anau. Anau hekama heheaꞌu ehau poi aꞌoe na. Kaua ehapaa ma nakaina aꞌoe la nohakae nakakala Keakua, kena ikaukali nakakala kelauniu nei. Hamalumalu Keakua avale.”

¹⁰ Ia kena ke{enselo} ekakala mai anau penei, “Aꞌoe iseloꞌi kelauniu la. Nakakala la ehuli aꞌe namea kela meapihi mai imuli. Ia namela mekapili iapihi mai.

¹¹ Nakama kela epena namea sala mekauhano kepena namea sala. Ia nakama saꞌino, mekauhano kekaukali nakipukipu saꞌino. Ia nakama ekonu kahi mekauhano kekonu kahi. Ia nakama ekapu mekauhano kekaukali nakipukipu ekapu.”

¹² Kena Jesus ekakala ma, “Halono mai. Anau ukapili ihamai. Ia anau eisi nakuhana kevavae aꞌe. Kena keualoko anau mehamai, anau mesui muli aꞌe kekama ma kekama, ikau ma namea lakou epena la.

¹³ Anau o keꞌamaka ia ma kehaoki, Alpha ia ma Omega.”

¹⁴ Keakua mehakapu nakama kela ehakea naola lakou. Kama la meau aꞌe nakama la kekonu iꞌai nahua kelaꞌau keola. Kena nakama la melavaa keulu iloko nakokoꞌa kemakaꞌina la.

¹⁵ Ia alakama menoho ikaha ma kemakaꞌina la. Ala nikama enoho pouli,*f24* nakama haipaꞌava, nakama ehai huli, nakama kela ekaa kama, nakama kela ehamalumalu nakamaaiku, ia ma nakama hakoa kela ehihai nakakala nukulaoi.

¹⁶ Kena Jesus ekakala ma, “Anau Jesus. Anau ehaunalia aku ke{enselo} anau la ihaꞌali aku okou nakakala anau nei. Pela okou mekakala aꞌe nakama keloku la hoi. Anau kipuna kekuꞌu David, ia hemopuna aia hoi. Ia anau kekapao kela emasina lo.”

¹⁷ Kena Keanana Kapu ia ma Keꞌavana Punua la ekakala ma, “Omai.” Nakama hakoa kela elono kemenei, ikau kekakala pela, “Omai.” Ame okou ehiunu, omai nounu. Ia ame okou hihai iola, omai noko maluu kevai kela meau aku keola eola kahi.

Nakakala haoki

¹⁸ Anau ekakala hamakaꞌu aku i okou hakoa kela elono nakakala kelauniu nei. Namenei hakoa meapihi mai. Ia ame hekama ehapaa aꞌe nikakala iluna nakakala kelauniu nei, kena Keakua meau aꞌe kama na naluꞌuna kela nikakaa iho iloko kelauniu nei.

¹⁹ Nakakala kela nikakaa iho iloko kelauniu nei meapihi mai imuli. Ia ame hekama esolo nikakala ikaha ma kelauniu nei, kena Keakua meko kuhana kama na ikaha. Pela kama na meselavaa keꞌai nahua kelaꞌau keola. Ia meselavaa kenoho iloko kemakaꞌina ekapu.

²⁰ Kama kela ehaꞌali aꞌe namea nei ekakala penei, “Ino. Anau ukapili ihamai.” Amen. Hamai Kealiꞌi Jesus.

²¹ Kealiꞌi Jesus ilolosi laoi okou hakoa.