Revelation 21 - Luaniua New Testament

Kevaelani vahonei ia ma kemaalama vahonei

¹ Kena kevaelani amaka la ia ma kemaalama amaka la uo noseai. Ia kemoana useai hoi. Ia kena anau eꞌike kevaelani vahonei, ia ma kemaalama vahonei.

² Ia anau eꞌike kemakaꞌina ekapu Jerusalem vahonei la ehaele iho ikaha ma Keakua i kevaelani. Keꞌina la ekanakana hakaualeꞌa, ehau poi kaupu kela ehalaꞌei ikili keꞌavana aia.

³ Kena anau elono keleo ekakala hamaloa ikaha ma kuai hamakua la ma, “Ila aꞌe. Keakua enoho ma nakama kemaalama nei, ia mekauhano kenoho ma nakama la. Nakama la meme mo onohenua Keakua. Ia kama la menoho ma nakama la, ia meme mo Akua lakou.

⁴ Ia kama la meisolo naleimaka nakama la ikaha. Ia kena sehikama memake, ia sehikama mepali. Sehikama mekanikani, ia sehikama mehalono lihu. Maikinimea nakipukipu imua la uo nolano.”

⁵ Ia kama kela enoho iluna kuai hamakua la ekakala penei, “Ila aꞌe. Anau emea namea hakoa i vahonei. Kakaa nakakala anau nei. Maikinimea nakakala nei mehuli aꞌe nohamaoni.”

⁶ Kena kama la ekakala mai anau, “Namea hakoa uoki. Anau o keꞌamaka ia ma kehaoki, Alpha ia ma Omega. Ame hekama hiunu, anau meau aꞌe maluu kevai keola kela eola kahi iunu kama la.

⁷ Ame hekama ehakina hamaoni nokae kehaoki, anau meau aꞌe kama na namea la hakoa. Ia anau meme mo Akua aia, ia kama na meme mo kama hamaoni anau.

⁸ Ia nakama saꞌino meinoho iloko keꞌina keahi. Ala nikama makaukaꞌu nahie, nakama kela sehakina, nakama ehaisala haeꞌo, nakama kela ekaa kama, nakama ehai huli, nakama kela ehai paꞌava, nakama kela ehamalumalu nahakipua, ia ma nakama kela ekakala nuku laoi hakoa. Nakama la menoho iloko keꞌina keahi. Keꞌina la elahi poi kemoana, ia keꞌohu keꞌina la esauna haeꞌo.*f23* Kela kemake hasiaoa.”

Jerusalem vahonei

⁹ Kena anau eꞌike he{enselo} hokahi i koahiku na{enselo} kela elolosi napaumeke euku kauhiku naluꞌuna. Ia ke{enselo} la ehamai nokakala mai anau penei, “Hamai. Anau mehuli aku aꞌoe kekama meiꞌavana Punua Keakua.”

¹⁰ Ia kena ke{enselo} la esau anau iluna i namahi Keanana Kapu, noꞌave iluna kemouna ehokuu, kena ihuli mai anau kemakaꞌina ekapu Jerusalem kela ehaele iho ikaha ma Keakua i kevaelani.

¹¹ Namahi Keakua ehamasina kemakaꞌina la. Kena keꞌina la eꞌivaꞌiva poi kemasina kehaku emale ma heJasper. Ia keꞌina la emasina poi he{kalasi} malama.

¹² Kuepapa makolu ehokuu epui hakiꞌe kemakaꞌina la. Ia kuepapa la eisi sehui ma lua nakokoꞌa. Ia sehui ma lua na{enselo} elolosi nakokoꞌa la. Ia nakokoꞌa la emau namale sehui ma lua naꞌaha Israel.

¹³ Ia koukolu nakokoꞌa la ekuu i kevahi keanaꞌe, ia kela koukolu ekuu i kevai koꞌolau, ia kela koukolu ekuu i kevahi keꞌupu, ia kena kela koukolu ekuu i kevahi kelaꞌi.

¹⁴ Kuepapa kemakaꞌina la ehakuu iluna sehui ma lua nahakupaa. Ia nahakupaa la emau namale sehui ma lua nakama kela eheheaꞌu ma Punua Keakua.

¹⁵ Ia ke{enselo} kela ekakala mai anau la ekaohi kehaꞌike pahaku mea, ihaꞌike kemakaꞌina la, ma nakokoꞌa la, ia ma kuepapa keꞌina la.

¹⁶ Ia navahi kemakaꞌina la ehau hakoa. Maikinimea kemouluna kemakaꞌina la, ia ma kelaha kemakaꞌina la, ia ma keloloa kemakaꞌina la ehau. Ia ke{enselo} la elave pela hevahi hokahi kemakaꞌina la ekae lua simaka haa huikalau na{kilomita}.

¹⁷ Kena ke{enselo} la ehaꞌike kuepapa la hoi, kaukali kehaꞌike kekama. Ia kemakolu kuepapa la ekae pela kipuono ma ono na{mita}.

¹⁸ Ia kuepapa kemakaꞌina la epena i kehaku emale ma Jasper. Ia kemakaꞌina la epena i pahaku mea kela emalama poi he{kalasi}.

¹⁹ Kuepapa la ekuu iluna sehui ma lua nahakupaa. Ia nahakupaa la eꞌuhi lia nahaku eꞌivaꞌiva nei, Kehaku amaka heJasper, Kehaku hasiaoa heSapphire, Kehaku hakoukolu heAgate, Kehaku kana haluaoa heEmerald,

²⁰ Kehaku kana halima heOnyx, Kehaku kana haono heCarnelian, Kehaku kana hahiku heChrysolite, Kehaku kana havalu heBeryl, Kehaku kana hasivo heTopaz, Kehaku kana hasanahulu heChalcedony, Kehaku kana sehui ma kahi heTurquoise, Kehaku kana sehui ma lua heAmethyst.

²¹ Ia sehui ma lua nakokoꞌa la epena i kehaku kela eꞌivaꞌiva poi naalea. Ia naala kemakaꞌina la epena i pahaku mea, ia emalama poi he{kalasi}.

²² Keꞌina la seisi kehale kapu aia. Kela hea anau seꞌike hale la. Maikinimea Keakua Kealiꞌi hananiu ia ma Punua aia la ehakapu keꞌina la hakoa.

²³ Kelaa ia ma kemaalama iluna semasina i kemakaꞌina la. Maikinimea namahi Keakua ehamasina iloko keꞌina la. Ia Punua Keakua hoi ehamasina kemakaꞌina la poi heahi.

²⁴ Kena naonohenua hakoa meikaꞌa i kemasina kemakaꞌina la. Ia nakuꞌu kemaalama nei hakoa mekaꞌa iloko kemakaꞌina la i namahi lakou.

²⁵ Nakokoꞌa kemakaꞌina la mesepui. Maikinimea keꞌina la memalama kahi, seisi kepo.

²⁶ Ia naonohenua hoi mekaꞌa i kemakaꞌina la i namahi lakou nohamaha Keakua.

²⁷ Ia sehimea saꞌino mekae aꞌe kemakaꞌina la. Ia nakama kela epena namea saꞌino, ia ma nakama kela ekakala nukulaoi mesenoho ilaa hoi. Emeia nakama eisi namale lakou emau iloko kelauniu keola kela Punua Keakua, kena nakama na menoho iloko kemakaꞌina la.