Revelation 20 - Luaniua New Testament

Simaka nahekau

¹ Kena anau eꞌike ke{enselo} ehaele iho ikaha ma kevaelani. Ia kama la ekaohi ke{kii} kelua enoko kela epouli kakano la, ia ekaohi hoi ke{seni} elahi.

² Kama la eoso nokaohi keuhuki la. Kela keuhuki kuai emale ma Kipua Saꞌino, ia emale hoi ma Satan. Kena ke{enselo} la eko ke{seni} la noꞌavekiveki keuhuki la, nonoho pela simaka nahekau.

³ Kena ilakua keuhuki la iloko kelua enoko la. Ia kena iloꞌi kokoꞌa kelua la nomau. Imea keuhuki la iselavaa kehailavaꞌa naonohenua la. Ia kena imuli simaka nahekau, keuhuki la mekana kama saika oia.

⁴ Kena anau eꞌike nakama enoho iluna nakuai lakou la. Ia Keakua eau aꞌe nakama la namahi kehakonukonu naonohenua. Ia anau eꞌike hoi naanana keonohenua kela ehuli aꞌe nakipukipu Jesus, ia ehalono nakakala Keakua. Keualoko nakama la niola i kemaalama nei, nakama la sehamalumalu kemanu leikama ia ma kamaaiku aia la. Ia nakama la seko kehamalona aia la nohamau i nalima lakou ia ma namualae lakou. Kela hea nakama la nikaia lia nomake.*f22* Ia nakama la eola muli ma Christ, nohananiu simaka nahekau.

⁵ Nakama la emasiꞌe mai ikaha ma kemake imua. Ia alakama memasiꞌe mai ikaha ma kemake imuli simaka nahekau la.

⁶ Ia nakama amaka kela eola muli la mehihia lo. Nakama la ekapu i namaisu Keakua. Kena nakama la meme mo maakua Keakua, ia meme mo maakua Christ hoi. Ia nakama la mesuꞌui ma Christ nohananiu nokae simaka nahekau. Ia kemake hasiaoa seisi namahi iluna nakama la.

Satan uvalaꞌina

⁷ Kena imuli simaka nahekau, ke{enselo} la mehasao Satan ikaha ma kelokapu aia la.

⁸ Kena Satan mehaele nohailavaꞌa naonohenua Gog ia ma Magog. Ala naonohenua hakoa kemaalama nei. Ia kama la mehaꞌuku naonohenua la iulu kaua. Ia nakama la mekomaꞌi, ehau poi nakaꞌele iluna kahua.

⁹ Nakama la mepoleni valoko naꞌina hakoa kemaalama nei, nohakiꞌe keonohenua Keakua iloko kemakaꞌina kela Keakua elaoi la. Ia kena keahi Keakua mekeiho ikaha ma kevaelani novela sia nakama evuhu la hakoa.

¹⁰ Ia kipua saꞌino kela ehailavaꞌa nakama la, melakua lia iloko keꞌina keahi eula malaa la. Kama na menoho ilaa ma kemanu leikama ia ma kekama kela enukulaoi maia ehakae nakakala Keakua. Ia nakama la hakoa mehalono lihu ilaa keao ma kepo, naualoko hamau.

Kehakonukonu haoki

¹¹ Kena anau eꞌike kekama enoho iluna kuai hamakua maꞌini. Ia kena kemaalama nei ia ma kevaelani uhulo ikaha ma kama la. Kena koꞌolua la sehiꞌina elave.

¹² Ia kena anau eꞌike nakama umake, ala nikama hananiu ia ma nakama moulalo hakoa. Nakama la ekuu imua kuai hamakua la. Kena nalauniu ilaa la ukalaꞌi. Ia namea hakoa nakama la epena la emau iloko nalauniu la. Ia kelaa launiu ukalaꞌi hoi. Kela o kelauniu namale nakama meola kahi. Ia kena Keakua ehakonukonu nakama emake la, kaukali nia emau iloko nalauniu la.

¹³ Kena kemoana ukiaꞌi hua nakama emake kela emoe iloko aia. Ia kemake ia ma keꞌina kemake hoi ukiaꞌi hua nakama emake kela emoe iloko laua la. Ia kena Keakua ehakonukonu nakama la, kaukali nia lakou epena.

¹⁴ Kena kemake ia ma keꞌina kemake la ulakua lia iloko keꞌina keahi, keꞌina elahi poi kemoana. Kela kemake hasiaoa.

¹⁵ Ame kemale kekama esemau iloko kelauniu keola, kena kama na melakua lia iloko keꞌina keahi la hoi.