Revelation 19 - Luaniua New Testament

¹ Kena iko anau ilono keonohenua komaꞌi i kevaelani ekakala hamaloa penei, “Kakou ihamaha Keakua. Keakua kakou la ehananiu, Kena ekonaꞌi kakou i namahi aia.

² Ia Keakua ehai aꞌe kehine la, Ia kehakonukonu aia la ekonu hamaoni. Maikinimea kehine la ehai huli Ma nakama kemaalama nei la, Pela imea naola nakama la nosaꞌino. Ia Keakua mesui muli kehine la, I kemake nakama heheaꞌu aia la.”

³ Kena nakama kevaelani la ekakala hamaloa hoi ma, “Kakou ihamaha Keakua. Keahi ekuni kinokama kehine la novela, Ia keꞌohu keahi la esula mai iluna naualoko hamau.”

⁴ Kena kipulua ma haa nakama hamakua, ia ma koahaa namanu kela eola kahi la ekoukuli ilalo nohamalumalu Keakua kela enoho iluna kuai hamakua la, kena ikakala penei, “Amen. Kakou ihamaha i Keakua.”

Keꞌai keꞌavana Punua Keakua

⁵ Kena keleo ekakala ikaha ma kuai hamakua la penei, “Okou nakama heheaꞌu Keakua, Nakama moulalo ia ma nakama hananiu, Nakama kela ehamalumalu kama la, Okou hakoa ihamaha kama la.”

⁶ Kena anau elono naleo keonohenua komaꞌi, kela enana poi keoki peau, ia ekanunu poi hakuli kela uapihi hamaloa. Ia nakama la ekakala penei, “Hamaha i Keakua. Keakua kakou Aliꞌi Ehananiu i namahi aia la.

⁷ Kena kakou ihihia lo, Ia ihamalumalu kama la. Maikinimea Punua Keakua meꞌavana vahonei, Ia kaupu aia meꞌavana la uoki kehalaꞌei,

⁸ Kena eleleu pamalo makahua emasina.” Ia napamalo kaupu la emea pela namea ekonu hakoa kela nakama ekapu Keakua epena la.

⁹ Kena ke{enselo} la eme mai anau, “Kakaa kemenei, ‘Keakua mehakapu nakama hakoa kela aia ealu io mai i keꞌai keꞌavana Punua aia la.’ ” Ia ke{enselo} la ekakala penei hoi, “Anei nikakala hamaoni Keakua.”

¹⁰ Keualoko anau nilono nakakala ke{enselo} la, anau ekoukuli imua kama la nohamalumalu i aia. Ia ke{enselo} la eme mai, “Aꞌoe isehamalu mai anau. Anau hekama heheaꞌu ehau poi aꞌoe na. Aꞌoe ihamalumalu Keakua la avale. Kaua ehapaa ma nakaina aꞌoe la ikaohi mau nakipukipu Jesus. Nakipukipu la ehuli mai kakou kehakaꞌoko nakakala Keakua la hakoa.”

Kekama ekele iluna ke{hosi} maꞌini

¹¹ Kena anau eꞌila noꞌike kevaelani ekalaꞌi. Ia ke{hosi} maꞌini ekuu imua anau. Ia kama enoho iluna ke{hosi} la emale ma Kaukali Kahi Kehamaoni. Ia kama la ekonu kahi keualoko aia ehakonukonu naonohenua, ia ekonu kahi hoi keualoko aia evuhu kaua.

¹² Naꞌalemaka aia ehau pela poi keula keahi. Ia kama la ehapili nahau komaꞌi. Eisi kemale emau iluna kama la. Ia kama la soia eailoa kemale la.

¹³ Kama la eleleu pamalo epilipili nakoko. Ia kama la emale ma “Nakakala Keakua.”

¹⁴ Ia nakama kevaelani ekaukali kama la novuhu kaua. Nakama la ehulo iluna na{hosi} maꞌini, ia eleleu napamalo maꞌini makahua.

¹⁵ Ia penisi eꞌaa esula iho ikaha ma puꞌua kama la nokaa naonohenua la imake. Kama la eisi namahi aia ihananiu iluna naonohenua la, kena mehuli aꞌe nakama la keloko Keakua hananiu.

¹⁶ Kemale nei emau pamalo aia, ia emau iluna navae aia, “KEKUꞌU EHAMAKUA ILUNA NAKUꞌU HAKOA IA KEALIꞌI EHAMAKUA ILUNA NAALIꞌI HAKOA”

¹⁷ Kena anau eꞌike ke{enselo} ekuu iluna kelaa. Kama la eanaa hamaloa i namanu lelele valuna hakoa penei, “Omai hakoa nohapaa noꞌai keꞌai Keakua hananiu.

¹⁸ Okou meꞌai naanohi nakuꞌu, naanohi nakama hamakua kaua, ia naanohi nakama hananiu, naanohi na{hosi}, ia ma nakama kela ehulo iluna na{hosi} la. Okou meꞌai naanohi naonohenua komaꞌi, nakama moulalo ia ma nakama mouluna, nakama vale ia ma nakama hananiu.”

¹⁹ Kena anau eꞌike kemanu leikama ia ma nakuꞌu kemaalama nei, ia ma naonohenua lakou kela evuhu kaua. Nakama la ehapaa hakoa novuhu ma kekama kela ekele iluna ke{hosi} aia, ia ivuhu ma nakama kela evuhu i kevahi aia la hoi.

²⁰ Ia kena nakama la ekaohi kemanu leikama, ia ma kekama kela enukulaoi maia ehakae nakakala Keakua. Imua, kama la nihuli aꞌe namahi kemanu leikama la, pela ihailavaꞌa nakama kela eko nahamalona kemanu leikama la, ia ehamalu kamaaiku aia la. Niaina koꞌolua la oiola, koꞌolua la ulakua iho iloko keꞌina keahi. Keꞌina la elahi poi kemoana, ia keꞌohu keꞌina la esauna haeꞌo.*f21*

²¹ Ia kena penisi la esopo iho ikaha ma puꞌua kekama kela ekele iluna ke{hosi}, nokaa naonohenua la hakoa nomake. Ia kena namanu lelele la eꞌai naanohi nakama umake la nopohu.