Revelation 18 - Luaniua New Testament

Babylon umaseu

¹ Ia kena anau eꞌike kelaa {enselo} ehamai ikaha ma kevaelani. Kama la ehananiu haeꞌo. Kena namahi aia la ehamasina kemaalama nei hakoa.

² Kama la ekakala hamaloa ma, “Babylon hananiu la umaseuseu. Ia vahonei, nakipua saꞌino enoho iloko kemakaꞌina la. Ia komaꞌi namahunani epono kia iloko keꞌina la. Ia namanu lelele kela nakama hakoa ehanaꞌino la, Namanu la epono kia iloko kemakaꞌina la hoi.

³ Keualoko naonohenua la ehai huli ma kehine la. Nakama la uvale haeꞌo, Ehau poi nakama kela eunu komaꞌi kealeve novale. Ia nakuꞌu kemaalama nei emomoe ma kehine la hoi. Ia nakama kela esusui naheheaꞌu la ekuku laoi, Mai namea kaualeꞌa kehine la ekomaꞌi lo.”

⁴ Kena anau elono kelaa leo i kevaelani ekakala penei, “Keonohenua anau, okou isopo nohulo ikaha ma Babylon, Pela okou mesesuꞌui iloko nahaisala kehine la. Kena okou mesehalono lihu Keualoko naluꞌuna mekae aꞌe kama la.

⁵ Maikinimea nahaisala kehine la ehaꞌuku noho kuu, Nokae pela i kevaelani. Ia Keakua emanaku namea saꞌino kehine la epena.

⁶ Okou isui muli namea saꞌino kehine la, Elaꞌa iluna ma namea kama la niau aku maꞌokou. Okou iau aꞌe kehine la navai emala iunu, Elaꞌa iluna ma navai kama la niau aku okou nounu la.

⁷ Kama la ehihia lo pela aia ekuku laoi, Kena ikakala ahu penei, ‘Anau eꞌavana kekuꞌu, Kena anau mesemea poi hekaukuaha. Ia anau meselavaa kekipuaina.’ Kehine la ehailavaꞌa komaꞌi namea kaualeꞌa, Ia kena okou imea kehine la ikipuaina nohalono lihu. Ikau ma namea saꞌino aia epena la.

⁸ Ia kena Keakua Kealiꞌi mehakonukonu kehine la I namahi hananiu aia la. Kena naluꞌuna mekae aꞌe kehine la, Iloko keaho hokahi. Kama la mehiꞌai nokipuaina lo, ia kena memake. Kena kinokama kama la mevela sia i keahi.”

⁹ Nakuꞌu kemaalama nei emomoe ma kehine la, ia esuꞌui ma kama la nokuku laoi. Ia keualoko nakama la meiꞌike keꞌohu keahi kela ekuni kinokama kehine la novela, kena nakama la mekanikani nopali solakou, kena meialoha haeꞌo i kemake kehine la.

¹⁰ Ia kehalono lihu kehine la meihamakaꞌu nakuꞌu la. Ia kena nakama la meikuu i keꞌina emao, kena ikanikani penei, “Alohai. Alohai. Kemakaꞌina elahi Babylon. Aꞌoe ehaimahi imua. Ia vahonei, Keakua ehakonukonu aꞌoe.”

¹¹ Nakama kemaalama nei esusui naheheaꞌu lakou la nohaimoni. Ia nakama la meikanikani haeꞌo nopali i kemake kehine la. Maikinimea sehikama hoi amesui naheheaꞌu lakou la.

¹² Ala nipahaku mea, napahaku iva, nalilani esuinaka, ia ma naalea. Ala napamalo emau, napamalo emea pouli, ia ma napamalo kaualeꞌa emole, ia ma napamalo emea malama. Napamalo la esuinaka lo. Nakama la esusui hoi nalaꞌau manoni, ia ma namea epenapena i napumakali, nalaꞌau esuinakaa, naꞌakana kea, napolepole, ia ma nahakupaa maꞌini.

¹³ Nakama haimoni la esui nalehu manoni ehau poi naꞌauna, ia ma alalehu manoni keumu. Ia nakama esui hoi naꞌohu manoni,*f20* ke{uaen}, keloo halaa na{oliv}, nahalaoa emole, ia ma nahua na{uit} la. Nakama la esui na{bulumakau}, na{sipisipi}, na{hosi}, ia ma navaꞌa. Ia nakama la esui hoi nakinokama ia ma naola nakama.

¹⁴ Kena nakama haimoni la mekakala penei, “Namea hakoa aꞌoe emanaꞌo la, Uhulo nolano ikaha maꞌoe. Naheheaꞌu ia ma namea hamanaꞌo aꞌoe la useai, Ia aꞌoe meselavaa keko muli namela.”

¹⁵ Nakama kela esui naheheaꞌu kehine la nokuku laoi meikuu i keꞌina emao, maikinimea nakama la memakaꞌu kehalono lihu kehine la. Kena nakama la mekanikani nopali solakou.

¹⁶ Nakama la mekani hamaloa ma, “Alohai. Alohai. Kemakaꞌina hananiu. Kehine la eleleu napamalo emole, Ia ma napamalo emea pouli, Ia ma napamalo emea malama. Kehine la ekau nakua pahaku mea, Nalilani suinaka, ia ma naalea eꞌivaꞌiva.

¹⁷ Ia vahonei oia, Nahaimoni la ulano hakoa.” Nakama hamakua navaꞌa, ia ma nakama kela enoho iluna navaꞌa la, ia ma nakama kela eheheaꞌu iloko navaꞌa la, nakama la hakoa mekuu nomao, hakoa ma nakama haimoni kela esusui naheheaꞌu iloko navaꞌa la.

¹⁸ Keualoko nakama la meiꞌike keꞌohu keahi kela ekuni kinokama kehine la novela, nakama la meanaa hamaloa, “Kenei o kemakaꞌina ehananiu soia.”

¹⁹ Kena nakama la mekani hamaloa, kena inini nalehu iluna napohoulu lakou ihuli aꞌe kealoha lakou, kena ikakala penei, “Alohai. Alohai. Kemakaꞌina hananiu. Nakama hakoa kela eisi navaꞌa lakou, Uo mai nohaimoni i naheheaꞌu kehine la. Ia vahonei oia, kama la ekuku haeꞌo.”

²⁰ Okou nakama i kevaelani ekau kehihia. Okou nakama ekapu Keakua, ia ma nakama heheaꞌu aia la, ia okou nakama ehakae nakakala aia la, okou ikau kehihia hakoa. Vahonei, Keakua ehakonukonu kehine la. Maikinimea kama la ememe haeꞌo kia okou imua.

²¹ Kena ke{enselo} haimahi esau hakupaa elahi iluna, kena ilaku nopoꞌu iloko kemoana. Ia kena ke{enselo} la ekakala penei, “Kemakaꞌina hananiu Babylon, Meilakua iho nopoꞌu ilalo pela hoi, Ia sehikama melave kemakaꞌina la imuli.

²² Ia sehikama kemakaꞌina la mehakani na{kita} nohuhua, Ia sehikama meili napuu ia ma napulonu Ia sehikama menoho ilaa Nopena namea lakou eailoa kepena. Ia sehikama hoi melono kelaa kama evalu naamaku.

²³ Sehikama mehaꞌaa keahi iloko Babylon, Nohamasina kemakaꞌina la. Ia sehikama hoi melono keleo nakama kela esoa iꞌavana. Imua, nakama kela nisusui naheheaꞌu okou la, Ehananiu iluna nakama kemaalama nei. Vahola, napaꞌava nakama kemakaꞌina la Ehailavaꞌa naonohenua hakoa.”

²⁴ Nakama kemakaꞌina la ekaa komaꞌi kekama kemaalama nei nomake. Kaohi mua nakama kela ehakae nakakala Keakua, lakou ma nakama ekapu Keakua.