Revelation 17 - Luaniua New Testament

Kehine ma kemanu leikama

¹ Kena he{enselo} hokahi i koahiku na{enselo} kela elolosi napaumeke la ehamai, kena ikakala mai anau penei, “Hamai. Anau mehuli aku kemenei. Keakua mehakonukonu kehine kela ehai huli la, kehine hananiu kela enoho i kevahi namoana komaꞌi.*f19*

² Nakuꞌu kemaalama nei emomoe ma kehine la. Ia nakama hakoa kemaalama nei evale keualoko lakou ehai huli ma kehine la, ehau poi nakama kela eunu kealeve novale.”

³ Kena ke{enselo} la esau anau iluna i namahi Keanana Kapu, noꞌave iloko keꞌina kukuaha. Kena anau eꞌike kehine kela enoho i keꞌina la. Kehine la enoho iluna kemanu leikama emea. Ia namale kela ekakala lihu aꞌe Keakua eꞌuhi kinokama kemanu la. Ia kemanu la eisi kauhiku napohoulu, ia sanahulu napaki.

⁴ Kehine la eleleu napamalo nakama hananiu, napamalo emea malama ia ma napamalo emea pouli. Ia kama la ekau nakua pahaku mea ia ma nalilani esuinakaa lo. Ia kaukuu aia la eꞌivaꞌiva poi naalea eꞌiva. Ia kehine la ekaohi ke{kapu} pahaku mea. Ia ke{kapu} la epii nakipukipu saꞌino kela kehai huli kehine la.

⁵ Ia kemale hunaa emau iluna kemualae kehine la, “BABYLON HANANIU. KINA NAKAMA HAI HULI IA MA NAMEA SAꞌINO HAKOA ILOKO KEMAALAMA NEI.”

⁶ Ia anau eꞌike pela kehine la eunu kekoko keonohenua ekapu Keakua la novale. Ala nikama ekaia lia keualoko lakou ehuli aꞌe nakipukipu Jesus. Ia keualoko anau eꞌike kehine la, anau emasalo haeꞌo.

⁷ Ia ke{enselo} la ekakala mai anau penei, “Okea aꞌoe emasalo? Anau meihuli aku kehakaꞌoko namea aꞌoe eꞌike la, kehakaꞌoko kehine la, ia ma kehakaꞌoko kemanu aia ninoho la, kemanu kela eisi kauhiku napohoulu, ia sanahulu napaki.

⁸ Kemanu kela aꞌoe eꞌike la ninoho imua, kena useai. Ia imuli, kemanu la mevaꞌai mai ikaha ma kelua enoko kela epouli kakano. Ia kena Keakua meseu namahi kemanu la. Alakama kemaalama nei la meꞌike kemanu leikama la mevaꞌai mai muli. Ia keualoko Keakua nipena kemaalama nei, kama la sekakaa namale nakama la iloko kelauniu keola. Nakama la memasalo haeꞌo. Maikinimea kemanu la ninoho imua, kena useai. Ia kena kama la mevaꞌai mai muli.

⁹ “Nakama eakamai amemakino kehakaꞌoko nakakala nei. Kauhiku napohoulu la, eme pela kauhiku namouna. Ia kehine la enoho iluna namouna la. Ia napohoulu la eme pela kauhiku nakuꞌu hoi.

¹⁰ Kaulima nakuꞌu la umake. Ia kelaa kuꞌu ehamakua vahonei. Ia kelaa kuꞌu seikae mai. Keualoko kama la mekae mai, kama la mehamakua kamasaika oia.

¹¹ Ia kekuꞌu kanahavalu meihamai hoi. Kela kemanu leikama ninoho imua, ia kena useai. Kemanu la mehapaa ma kauhiku nakuꞌu la. Ia kena Keakua meseu namahi kama la hoi.

¹² “Aꞌoe niꞌike sanahulu napaki. Ala sanahulu nakuꞌu. Ia nakama la seilolosi naonohenua lakou. Ia nakama la mehapaa ma kemanu leikama la noko namahi lakou nohamakua kamaualoko oia.

¹³ Nakama la mehaio hakaꞌoko hokahi, pela iau aꞌe namahi lakou i kemanu leikama la, imea kama la ilolosi naonohenua lakou la.

¹⁴ Ia nakuꞌu la hakoa mehapaa ma kemanu la novuhu ma Punua {Sipisipi} Keakua. Ia Punua la mekaꞌa napohoulu nakama la hakoa, maikinimea aia soia o Kealiꞌi iluna naaliꞌi hakoa, ia Kekuꞌu iluna nakuꞌu hakoa. Ia nakama aia la ekakaꞌa maia. Ala nikama aia ehilihili, kela ekaukali hamaoni i aia.”

¹⁵ Kena ke{enselo} la eme mai anau hoi, “Aꞌoe eꞌike kehine ehai huli la. Kama la enoho iluna namoana komaꞌi. Ala nikama naꞌaha ia ma naukulana hakoa, lakou ma naonohenua ia ma nakama i nakakala hakoa.

¹⁶ Aꞌoe eꞌike kemanu leikama hoi, kemanu kela eisi sanahulu napaki. Ia kemanu la meliloko kehine la, kena meko naheheaꞌu kehine la ikaha, pela kama la menapa, ekuu pela sehipamalo leleu. Kena nakama la meiꞌai keanohi kehine la, kena ilaku namekoe la iloko keahi.

¹⁷ Keakua soia emea nakuꞌu la ikaukali kehakaꞌoko aia la. Kela hea nakama la enuu hakoa pela iau aꞌe namahi lakou i kemanu leikama la, imea kama la ilolosi naonohenua lakou la. Haele nokae keualoko nakakala Keakua la mehuli mai nohamaoni.

¹⁸ “Ia kehine kela aꞌoe eꞌike la, kama la o kemakaꞌina elahi kela ehamakua iluna nakuꞌu hakoa i kemaalama nei.”