Revelation 16 - Luaniua New Testament

Napaumeke keloko Keakua

¹ Kena anau elono kekama iloko hale kapu ekakala hamaloa i kauhiku na{enselo} la, “Okou io nonini kauhiku napaumeke epii keloko Keakua la iloko kemaalama nei.”

² Ia kena ke{enselo} amaka la ehaele nonini paumeke aia la iloko kemaalama nei. Ia vahola, nakama kela eisi nahamalona kemanu leikama la, ia ehamalumalu kamaaiku la, nakama la euhi lia nasanuꞌu saꞌino nohalono lihu.

³ Kena ke{enselo} hasiaoa enini paumeke aia la iloko kemoana, nomea kelokai la ihuli mo koko, ehau poi kesunu kinokama kekama emake. Ia namea kela eola iloko kelokai la umake hakoa.

⁴ Kena ke{enselo} kanahakoukolu enini paumeke aia la iloko na{liva} ia ma namakavai. Ia vahola, navai la uhuli mo koko hoi.

⁵ Kena anau elono ke{enselo} kela lolosi navai la ekakala aꞌe Keakua penei, “Aꞌoe ekonu kahi, Uola imua, ia eola vahonei. Aꞌoe ehakonukonu nakama saꞌino la. Ehuli aꞌe pela aꞌoe o kekama ekapu,

⁶ Nakama la ekaa naonohenua ekapu aꞌoe, Ia ma nakama kela ehakae nakakala aꞌoe la nomake, Ia kena inini iho nakoko nakama la. Ia aꞌoe ehuli navai nakama saꞌino la mo koko, noau aꞌe nounu nakama la, Kena nakama la ulave laoi.”

⁷ Ia kena anau elono ke{olta} la ekakala aꞌe Keakua ma, “Hamaoni, Keakua Kealiꞌi ehananiu. Kehakonukonu aꞌoe la ekonu kahi hamaoni.”

⁸ Kena ke{enselo} kanahahaa enini paumeke aia la iluna kelaa. Ia kena kelaa la eko namahi aia nohavela naonohenua, ehau poi keahi.

⁹ Kena nakama kela evela sia kelaa la hakoa ekakala lihu aꞌe kemale Keakua. Maikinimea kama la eau aꞌe lakou naluꞌuna saꞌino la. Ia nakama la sehihai kekiꞌe ikaha ma nahaisala lakou la nohamaha Keakua.

¹⁰ Kena ke{enselo} hakaulima enini paumeke aia la iluna kenoholana kemanu leikama la. Ia vahola, kenoholana la epouli kakano. Ia kena keonohenua kemanu la ehalono lihu, kena iukiuki namunuku lakou.

¹¹ Ia eꞌamaka nokakala lihu aꞌe Keakua kela elolosi kevaelani. Maikinimea nakama la ehalono lihu haeꞌo i nasanuꞌu lakou. Ia nakama la sekiaꞌi namea saꞌino lakou epena la.

¹² Kena ke{enselo} kanahaono enini paumeke aia la iluna ke{liva} emale ma Euphrates. Kena ke{liva} la upaupaꞌu halaa, pela ikanakana keala nakuꞌu keanaꞌe la io mai valuna.

¹³ Kena anau eꞌike koukolu nakipua saꞌino ehau poi ni{frogo} elee iho ikaha ma puꞌua keuhuki, ia ikaha ma puꞌua kemanu leikama, ia ikaha ma puꞌua kekama kela enukulaoi maia ehakae nakakala Keakua.

¹⁴ Ia nakipua saꞌino la eisi namahi lakou nohuli aꞌe nahaꞌaku. Nakama la eo nohaꞌuku nakuꞌu kemaalama nei hakoa, novuhu kaua i keaho kela Keakua hananiu mehuli aꞌe namahi aia la.

¹⁵ Kena Jesus eme aꞌe, “Hamakonu. Okou semakino keualoko hee anau mevaꞌai mai. Ehau poi okou semakino keualoko hee nakama ailalao mekae aku i okou. Kaualeꞌa pela okou iala kahi, leleu mau napamalo okou. Aoki napamalo okou mesopo keualoko okou ehulo mai, kena okou menapa haeꞌo imua namaisu keonohenua.”

¹⁶ Kena nakipua saꞌino la ehaꞌuku nakuꞌu la i keꞌina emale ma Armageddon i nakakala na{Jiu}.

¹⁷ Kena ke{enselo} kanahahiku enini iho paumeke aia la iluna napulehulehu. Ia kena keleo ekakala hamaloa ikaha ma kenoholana iloko hale kapu, “Uoki hakoa.”

¹⁸ Kena keꞌemo la ukalaꞌi mai, ia hakuli la uapihi hamaloa, ia kelulu henua la ehaimahi haeꞌo. Ia sehikama kemaalama nei nilono helulu henua pela imua.

¹⁹ Ia Keakua emanaku nahaisala kemakaꞌina Babylon, kena imea nakama la iunu ke{uaen} keloko haimahi aia. Ia kemakaꞌina elahi Babylon la umavae i koukolu napavahi. Ia kena nahale nahenua kemaalama nei hakoa usina ilalo.

²⁰ Kena Keakua eseu nahenua la hakoa, ia namouna nahenua la useai.

²¹ Kena na{aesi} makau elahi haeꞌo*f18* emaoha ikaha ma kevaelani iluna naonohenua. Ia kena nakama la ekakala lihu aꞌe Keakua, maikinimea lakou ehalonolihu haeꞌo i na{aesi} makau kela ekeiho la.