Revelation 14 - Luaniua New Testament

Jesus ma keonohenua aia

¹ Kena anau eꞌila noꞌike punua {sipisipi} ekuu iluna kemouna Zion. Ia keꞌoina nakama kela ekuu ma kama la, ekae pela huikalau kipuhaa ma haa nasimaka. Kemale aia ia ma kemale kamana aia emau iluna namualae nakama la.

² Kena anau elono kenana i kevaelani. Ia kenana la ehau poi keꞌoki nahua peau la. Ia ehau hoi poi kekanunu hakuli. Ia kenana la ehau poi kenana nakama kela ehakani na{kita} lakou.

³ Huikalau kipu haa ma haa nasimaka nakama ekuu imua kenoholana la, ia imua koahaa namanu eola kahi ia imua nakama hamakua. Keakua ehakana nakama kemaalama nei la ikaha ma namahi kemake. Ia keonohenua la ehuhua kehua vahonei, kela lakou solakou elavaa keaꞌo.

⁴ Ala nikama kela ehakea naola lakou, ia sepaa huli ma nahine. Nakama la ekaukali punua la i keꞌina hee kama la ehaele. Ia Keakua esui nakama la ikaha ma kemake. Pela nakama la meme mo kama amaka kela esuꞌui iloko keonohenua aia, ia iloko keonohenua punua aia la hoi.

⁵ Nakama la selavaa kenukulaoi, ia ekonu kahi imua namaisu Keakua.

Koukolu na{enselo}

⁶ Kena anau eꞌike kela {enselo} elee valuna kemalama nei, nokaukaꞌu aꞌe nakama hakoa. Ala nikama naonohenua hakoa, namanava hakoa, nakama i nakakala hakoa, ia ma nakama naꞌaha hakoa. Ke{enselo} la ehaꞌali aꞌe kelono kaualeꞌa kela seisi kehaoki.

⁷ Kama la ekakala hamaloa ma, “Hamaha Keakua, ia hamalumalu kama la. Maikinimea kama la ukapili ihakonukonu nakama hakoa. Kama la epena kevaelani ia ma kemaalama nei, kemoana ia ma namakavai hakoa. Ia kena okou ihamalu kama la.”

⁸ Kena ke{enselo} hasiaoa ekaukali ke{enselo} amaka la nokakala ma, “Kehine la ukeiho. Kemakaꞌina hananiu Babylon la unakeiho avale. Naonohenua hakoa evale haeꞌo ikepaa huli ma kehine la. Ia kena Keakua meloko haeꞌo i nakama la.”

⁹ Kena ke{enselo} kanahakoukolu uhamai nokakala hamaloa, “Alakama ehamalumalu kemanu leikama la, ia ma kamaaiku aia la. Ia nakama la eko kehamakino kemanu leikama la iluna nalima ma namualae lakou la.

¹⁰ Ia kena Keakua meloko haeꞌo i nakama la, ia nakama la mehalonolihu i keloko aia la. Nakama la mehalono lihu iloko keahi ia ma kemalaa keahi la,*f14* imua namaisu na{enselo} ekapu ia ma namaisu Punua Keakua.

¹¹ Ia nakama kela ehamalumalu kemanu leikama la, ia ma kamaaiku la, ia kena iko kehamakino kemale kemanu la, nakama la mehalono lihu haeꞌo iloko keahi. Ia keꞌohu kevela nakinokama lakou la mehaele pela iluna naualoko hamau. Ia keaho ma kepo, nakama la meselavaa kehamalolo.”

¹² Ia kena nakama ekapu Keakua ikau kenoho havalekoa. Nakama la ikaohi mau nakakala Keakua, kena ikauhano kehakina ia Jesus.

¹³ Kena anau elono keleo ekakala iho ikaha ma kevaelani, “Aꞌoe ikakaa nakakala nei. Keualoko nakama kela ehakina Kealiꞌi la memake, kena nakama na mehakapu lia Keakua.” Ia Keanana Kapu ekakala iho penei, “Hamaoni. Naheaꞌu nakama la uoki laoi hakoa. Ia kena nakama la mehamalolo, noko nakuhana lakou la.”

Kemaalama nei ia ma kehuaka aia

¹⁴ Kena anau eꞌila noꞌike kepuleulehu maꞌini. Ia kekama kela enoho iluna puleulehu la ehau poi ke{kama ekipu kama}. Ia kama la ehapili kehau pahaku mea iluna pohoulu aia, ia ekaohi keiꞌai enavali i kelima aia. Ia keiꞌai la eꞌaa haeꞌo.

¹⁵ Ia kelaa {enselo} ehaele iho ikaha ma kehale kapu, kena ianaa aꞌe hamaloa i kekama kela enoho iluna puleulehu la, “Vahonei ukae kehuaka. Nahua hakoa iluna kemaalama nei la uleu.*f15* Ia kena aꞌoe iko keiꞌai aꞌoe nosepe namela.”

¹⁶ Ia kena iko kekama kela enoho iluna puleulehu la isepe keiꞌai aia la, nohaꞌuku nahua kemaalama nei la hakoa.

¹⁷ Kena kelaa {enselo} eko keiꞌai eꞌaa la hoi, kena ihaele ikaha ma kehale kapu i kevaelani.

¹⁸ Kena kelaa {enselo} hoi ehaele ikaha ma ke{olta}. Kama la elolosi keahi ke{olta} la. Kena kama la eanaa aꞌe hamaloa i ke{enselo} kela ekaohi keiꞌai eꞌaa la, “Nahui naleikuu kemaalama nei la uleu hakoa. Kena aꞌoe eko keiꞌai aꞌoe eꞌaa la. Aꞌoe isepe nahui la nohaꞌuku.”

¹⁹ Kena iko ke{enselo} la isepe keiꞌai aia la iluna kemaalama nei nokuu nahui la hakoa ikaha. Kena kama la ehaꞌuku namela hakoa, nolaku iho iloko kelua. Kena nahui la ekakaꞌa lia nopela. Haꞌaku la ehuli aꞌe keloko Keakua.

²⁰ Ia kena keualoko nahui ekakaꞌa lia nopela imaka hale kemakaꞌina la, kevai la eꞌo iho ikaha ma nahui la, poi hekakahe ke{liva}. Ia kevai la o kekoko keonohenua la. Ia kekoko la uhanopii nokae napohoulu na{hosi} lakou la. Ia ke{liva} la eloloa haeꞌo.*f16*