Revelation 13 - Luaniua New Testament

Siaoa namanu leikama

¹ Ia kena anau eꞌike kemanu leikama ehamai ikaha ma kemoana. Kemanu la eisi kauhiku napohoulu ia ma sanahulu napaki. Ia kaihau kaikahi emau iluna napaki la. Ia namale kela ekakala lihu aꞌe Keakua emau iluna napohoulu la.

² Ia kemanu la ekipu poi salau leikama. Ia nakapuae aia la eisi namoiꞌuu loloa. Ia naniho puꞌua aia la eloloa, ehau poi salau leikama elahi. Ia keuhuki la eau aꞌe kemanu la namahi aia, ia eau aꞌe hoi kenoholana aia la. Pela kemanu la mehananiu iluna nakama aia la hakoa.

³ Ia eꞌila pela pohoulu hokahi i napohoulu kemanu leikama la emele nomake. Ia pohoulu la ukaualeꞌa muli. Ia kena nakama kemaalama nei umasalo kena ikaukali kemanu la.

⁴ Ia nakama la ehamalu keuhuki la, maikinimea kama la eau aꞌe namahi aia i kemanu leikama la. Ia kena nakama la ehamalu kemanu la hoi, kena ime aꞌe, “Sehikama ehaimahi poi kemanu la. Ia kena sehikama elavaa kevuhu ma kama la.”

⁵ Kemanu leikama la uko namahi aia kekakala ahu, ia ekakala lihu aꞌe Keakua. Ia kemanu la eko namahi hoi pela ihananiu kipuhaa ma lua namalama.

⁶ Ia kena kemanu la uꞌamaka nokakala lihu aꞌe Keakua. Ia kama la ekakala saꞌino aꞌe i kemale Keakua ia ma keꞌina Keakua enoho la. Ia kemanu la ekakala saꞌino aꞌe nakama kela enoho i kevaelani hoi.

⁷ Ia kemanu la eko namahi ivuhu kaua, pela aia ikaꞌa napohoulu nakama ekapu Keakua la. Ia kemanu la eko namahi hoi ihananiu iluna nakama namanava hakoa, naꞌaha hakoa, lakou ma nakama i nakakala hakoa, ia ma naonohenua hakoa.

⁸ Amaka mai imua lo, keualoko kemaalama nei nipena iho, Keakua emakino pela punua {sipisipi} aia la memake. Ia punua la eisi kelauniu emau namale nakama eola kahi. Ia komaꞌi namale nakama kemaalama nei esemau iloko kelauniu la, kena nakama la hakoa mehamalumalu kemanu leikama la.

⁹ “Amea okou hihai ailoa, kena halono mai.

¹⁰ Poi Keakua ehakaꞌoko pela hekama mepono kia, Kena kama na mepono kia. Ia poi hekama eko penisi ikaa kama. Kena kama na memake pela hoi. Ia kena nakama ekapu Keakua ikau kenoho havalekoa, kena ikauhano kehakina Keakua.”

¹¹ Kena anau eꞌike kelaa manu leikama ehamai ikaha ma kaꞌele kemaalama nei. Kemanu la eisi siaoa napaki aia, ehau poi napaki punua {sipisipi}. Ia keleo kama la ehau poi keleo keuhuki elahi la.

¹² Ia kemanu amaka la eau aꞌe namahi aia la i kemanu hasiaoa la i hananiu iluna naonohenua hakoa. Ia kena kemanu hasiaoa la emea nakama kemaalama nei ihamalumalu kemanu amaka kela nikapili imake, ia ukaualeꞌa muli.

¹³ Ia kemanu hasiaoa la ehuli aꞌe nahaꞌaku hananiu. Ia kama la emea keahi nohaele iho ikaha ma kevaelani, nokae kemaalama nei imua namaisu naonohenua hakoa.

¹⁴ Ia kemanu hasiaoa la eko namahi ihuli aꞌe nahaꞌaku haimahi imua namaisu kemanu amaka la, pela iusuusu nakama hakoa kela enoho i kemaalama nei. Ia kena kama la eme aꞌe naonohenua la ipena hekipu kemanu amaka, kena ihamaha kemela. Kemanu amaka la nikaia i kepenisi nomele, ia oiola oia.

¹⁵ Ia kemanu hasiaoa la eko namahi aia iili kemakani aia iloko kekipu kemanu amaka la. Pela kekipu la amelavaa kekakala. Ia poi hekama sehamalumalu kekipu la, kena kekipu la eme aꞌe keonohenua la ikaa kama na imake.

¹⁶ Kemanu hasiaoa la eusuusu nakama hakoa, nakama hananiu ma nakama moulalo, nakama haimoni ma nakama haaloha, nakama hamakua ia ma nakama heheaꞌu. Pela nakama la hakoa amehamakino nalima laua lakou, ma namualae lakou.

¹⁷ Ia nakama kela sehamakino la meselavaa kesui nimea ma lakou, ia selavaa keau aꞌe nimea i alakama isui. Kehamakino la o kemale kemanu leikama, ia ma keꞌoina kemale aia la.

¹⁸ Okou nakama eakamai amemakino kehakaꞌoko nakakala nei. Oai kekama emakonu elavaa kepau keꞌoina kemanu leikama la. Maikinimea kemela o keꞌoina kekama. Ia keꞌoina aia la eono huikalau kipuono ma ono.