Revelation 12 - Luaniua New Testament

Kehine ia ma keuhuki elahi

¹ Kena kehaꞌaku hananiu ehasula aꞌe i kevaelani. Kela hehine naauꞌahu aia la emasina poi kelaa, ia kemaalama emoe ilalo nakapuae aia. Ia sehui ma lua nahekuu la ehakiꞌe poi hehau iluna pohoulu aia.

² Ia kehine la ekapili imamaoha kamaliꞌi, ia kena ekanikani hamaloa i naaisu kamaliꞌi la.

³ Kena kelaa haꞌaku uhasula aꞌe i kevaelani. Kela heuhuki elahi lo, keꞌili aia la emea malama. Ia kama la eisi kauhiku napohoulu, ia sanahulu napaki. Ia kauhiku nahau emau iluna napohoulu keuhuki la.

⁴ Ia kemosuꞌi aia ehakaa keꞌoina elahi nahekuu i kevaelani. Kena ilaku iho nahekuu la nopoꞌu ilalo kemaalama nei. Kena keuhuki la ekuu imua kehine la, pela aia iꞌai kamaliꞌi la, keualoko kehine la mehanau kamaliꞌi la.

⁵ Kena kehine la ehanau kamaliꞌi kanaka, kela melolosi naonohenua hakoa i kemaalama nei. Ia kama la meisi namahi elahi iluna nakama la. Ia kena ke{enselo} eko kamaliꞌi la ikaha noꞌave i kenoholana Keakua ialuna.

⁶ Kena kehine la ukele ikaha nokae keꞌina kukuaha, keꞌina kela Keakua ekanakana maia. Ia nakama keꞌina la melolosi kehine la nokae simaka lua huikalau kipu ono naaho.

⁷ Kena kaua uꞌamaka i kevaelani. Michael ia ma na{enselo} aia la uvuhu lakou ma keuhuki elahi la. Ia keuhuki ia ma na{enselo} aia la uvuhu muli hoi.

⁸ Ia keuhuki la uvalaꞌina. Kena kama la ma na{enselo} aia la usehiꞌina elave i kenoho i kevaelani.

⁹ Ia kena keuhuki ia ma na{enselo} aia la hakoa ulakua iho ilalo nokae kemaalama nei. Keuhuki la nikipu mai imua lo. Kama la emale ma Kipua Saꞌino, ia kelaa male aia la Satan. Ia kama la eusuusu nakama hakoa i kemaalama nei.

¹⁰ Kena anau elono keleo ekakala hamaloa i kevaelani penei, “Vahonei Keakua mekonaꞌi kakou iola. Kena mehuli mai namahi aia, Ihamakua iluna naonohenua hakoa. Ia kama la mehuli mai hoi Namahi kekama aia ekini la. Ia kipua saꞌino la ekuu imua Keakua kakou, Nohakaukau ma nakaina kakou keaho ma kepo. Ia Keakua melaku kama la ikaha ma kevaelani.

¹¹ Ia nakaina kakou la ekaꞌa pohoulu kama saꞌino la I namahi kekoko punua {sipisipi} Keakua. Ia nakama la ekaꞌa pohoulu kama la hoi i namahi nakakala Keakua kela lakou ekaukaꞌu la. Nakama la esehakaꞌoko maha i naola lakou, Ia eaunahie kemake oia.

¹² Ia kena okou nakama kela enoho i kevaelani, Okou ikau kehihia. Ia alohai kemaalama nei ia ma kemoana, Maikinimea kipua saꞌino la Ehaele iho nonoho ilaa. Ia kama la eloko haeꞌo, Maikinimea kama la eailoa Pela aia menoho kamasaika oia.”

¹³ Keualoko keuhuki la emakino pela aia ulakua iho i kemaalama nei, kama la uhakiꞌe kehine kela emamaoha kamaliꞌi kanaka la.

¹⁴ Kena kehine la eko siaoa napaꞌau elahi, kela kemanu ko moa elahi. Kena kama la elee iloko keꞌina kukuaha, i keꞌina Keakua ekanakana maia. Pela nakama keꞌina la amelolosi hakaualeꞌa kehine la nokae koukolu nahekau ma kalunaoa namalama. Pela ihaluu ikaha ma namahi keuhuki la.

¹⁵ Ia kena keuhuki la eluaꞌi kevai ehau ma ke{liva} ikaha ma puꞌua aia, imuli kehine la, imea kevai elahi la ihakahe kehine la ikaha.

¹⁶ Ia Keakua ekonaꞌi kehine la. Kama la ekalaꞌi kaꞌele la noholo kevai kela keuhuki la eluaꞌi ikaha ma puꞌua aia la.

¹⁷ Ia kena keuhuki la uloko haeꞌo i kehine la. Kena ihaele novuhu ma nahaimopuna kehine la. Ala nikama kela ehalono nakuaa Keakua, ia ehakina hamaoni nakakala Jesus.

¹⁸ Kena keuhuki la ukuu iluna kaunakai.