Revelation 11 - Luaniua New Testament

Koꞌolua nakama kela ekakala hamaoni

¹ Ke{enselo} eau mai kelaꞌau ehau poi haꞌike, ia kena ime mai, “Haele nohaꞌike hale kapu Keakua ia ma ke{olta} la hoi. Kena upau ma ehia nakama ehamalumalu iloko hale kapu la.

² Ia aꞌoe isehaꞌike haseꞌe i makahale la. Maikinimea nakama enoho pouli meko keꞌina la ma lakou. Ia kipuhaa ma lua namalama, nakama la mekakaꞌa kemakaꞌina ekapu la nosaꞌino.

³ “Ia kena anau meau aꞌe koꞌolua nakama namahi kehuli aꞌe nakipukipu anau. Kena koꞌolua la mehakae nakakala anau. Ia koꞌolua la meleleu napamalo aupuu,*f12* kena ihakae nakakala anau iloko simaka lua huikalau kipuono naaho.”

⁴ Koꞌolua la ehau poi siaoa nalaꞌau na{oliv}. Ia koꞌolua la ehau hoi poi namea kela ehapipili naahi hakua iluna. Namea la ekuu imua Keakua, kama hananiu iluna kemaalama nei.

⁵ Ia poi alakama ameliloko koꞌolua la, kena ihaꞌike ma ikaa koꞌolua la, kena keahi mesopo iho ikaha ma napuꞌua koꞌolua la nokunia nakama la. Oai kekama ehihai ma ikaa koꞌolua la memake pela hoi.

⁶ Kulana koꞌolua la ehakae nakakala Keakua, koꞌolua la elavaa kepui kevaelani pela isehiua keloꞌu iho. Ia keualoko koꞌolua la ehihai, koꞌolua la elavaa kehuli navai la mo koko, ia elavaa kemea nakama kemaalama nei ilavea namahana hakoa.

⁷ Keualoko koꞌolua la meoki kehakae nakakala Keakua, kena kemanu leikama mehamai ikaha ma kelua enoko kela epouli kakano la. Kemanu la mekaꞌa napohoulu koꞌolua la, kena mekaa koꞌolua la nomake.

⁸ Ia nakinokama koꞌolua la memoe i keala kemakaꞌina hananiu la. Ia Kealiꞌi koꞌolua la umake iluna {kolosi} iloko kemakaꞌina la. Ia namakaꞌina Sodom laua ma Egypt ehuli aꞌe nakipukipu kemakaꞌina la hoi.*f13*

⁹ Ia koukolu naaho ulaꞌa, nakama i naonohenua hakoa, naꞌaha hakoa, nakakala hakoa, ia ma nahenua hakoa meimakamaka nakinokama koꞌolua la emoe keala, ia mesehihai ikanu nakinokama koꞌolua la.

¹⁰ Nakama kemaalama nei meihihia i kemake koꞌolua la, kena meiꞌaveꞌave nahoꞌi lakou ihuli aꞌe kehihia lakou. Maikinimea koꞌolua kela ehakae nakakala Keakua la umake, kena uselavaa kemea nakama kemaalama nei ihalono lihu hoi.

¹¹ Kena kulana koukolu naaho ulaꞌa, Keanana Keakua mehaola muli koꞌolua la. Ia keualoko koꞌolua la umasiꞌe iluna, nakama kela eꞌike koꞌolua la umakaꞌu haeꞌo.

¹² Kena koꞌolua la ulono kahu keleo ekakala iho i kevaelani ma, “Omai inei.” Ia kena nakama eliloko koꞌolua la ukoꞌa aꞌe noꞌike koꞌolua la uo noulu iloko napuleulehu nokaꞌa i kevaelani.

¹³ Saika la, kahu kelulu henua ukili. Ia kena kelaa oina kemakaꞌina la useua, ia hiku simaka nakama keonohenua la umake. Kena nakama oiola la umakaꞌu haeꞌo, kena ihamalumalu Keakua i kevaelani.

¹⁴ Kehalono lihu kana hasiaoa ulaꞌa, ia kehalono lihu kana hakolu mekapili ikae mai.

¹⁵ Kena ke{enselo} kana hahiku uili kepuu aia la. Ia kena nakama i kevaelani ukakala hamaloa iho ma, “Keakua kakou Aliꞌi Laua ma kekama aia ekini la, Koꞌolua la ehananiu iluna nakama kemaalama nei hakoa, Ia meihananiu navahao hamau.”

¹⁶ Kena kipulua ma haa nakama hamakua kela enoho iluna nakuai lakou imua Keakua, nakama la ekoukuli ilalo nohamalumalu kama la,

¹⁷ kena ikakala penei, “Keakua makou Aliꞌi hananiu, Aꞌoe unanoho mai avale imua, Ia enoho vahonei. Makou ehamaha i aꞌoe, Maikinimea aꞌoe eko namahi mouluna Kena uꞌamaka nohananiu iluna naonohenua hakoa.

¹⁸ Nakama enoho pouli la eloko haeꞌo, Ia vahonei aꞌoe eloko i nakama la hoi. Vahonei aꞌoe mehakonukonu nakama umake. Ia aꞌoe meau aꞌe nakuhana I nakama heheaꞌu aꞌoe la Kela ehakakae nakakala aꞌoe. Ia aꞌoe meau aꞌe nakuhana hoi I nakama ekapu aꞌoe la. Ala nikama hananiu ia ma nakama moulalo, Kela ehamalumalu kemale aꞌoe. Ia vahonei aꞌoe mekaa nakama Kela eseu kemaalama nei.”

¹⁹ Kena kokoꞌa hale kapu Keakua i kevaelani la ukalaꞌi. Ia keonohenua la eꞌike kepapa ekapu la, ia nakakala hamaoni Keakua emoe iloko kemela. Kena hakuli la uapihi hamaloa, keꞌemo la ukalaꞌi mai, kelulu henua la ehaimahi lo, ia na{aesi} makau la uloꞌu iho.