Revelation 10 - Luaniua New Testament

Ke{enselo} ia ma kelauniu soliꞌi

¹ Kena anau eꞌike kelaa {enselo} haimahi ehaele iho ikaha ma kevaelani. Puleulehu la elepo hakiꞌe kama la, ia keumaka la epili iluna pohoulu aia. Namaisu aia emasina poi kelaa. Ia navae aia ehau ma sapou elahi kela emalaa poi heahi.

² Kama la ekaohi kama launiu elii emoe kalaꞌi i kelima aia. Ia kapuae laua aia ekaꞌa iluna kemoana, ia kapuae selaua aia ekaꞌa iluna henua.

³ Kama la eanaa hamaloa poi salau leikama elahi, kena kauhiku nahakuli eapihi hamaloa.

⁴ Vahola, nahakuli la ekakala iho, kena anau ukapili ikakaa nakakala lakou la. Ia anau elono keleo ekakala iho i kevaelani ma, “Huu nakakala nahakuli la. Aꞌoe isekakaa namea la.”

⁵ Kena anau eꞌike ke{enselo} kela ekaꞌa iluna kemoana, ia ekaꞌa iluna henua. Kama la esau nohakuu kelima laua aia i kevaelani,

⁶ kena ekakala hamaoni i kemale Keakua kela eola kahi, kekama kela epena kevaelani, kemaalama nei, kemoana ia ma namea hakoa iloko lakou. Kama la ekakala ma, “Namea la mesenase.

⁷ Keualoko ke{enselo} kana hahiku la meili kepuu aia la, kena Keakua mehuli mai namea kela nihunaa lia imua. Ehau poi aia nihuli aꞌe nakama kela eheheaꞌu maia, nohakakae nakakala aia la.”

⁸ Kena keleo anau nilono la ukakala iho hoi ikaha ma kevaelani ma, “Haele noko kama launiu elii la kela emoe kalaꞌi iluna kelima ke{enselo}, kekama kela ekaꞌa iluna kemoana ia ma henua la.”

⁹ Kena iko anau ihaele noainoa aꞌe ke{enselo} la iau mai kama launiu elii la. Ia kama la eme mai ma, “Ko kelauniu nei. Aꞌoe meꞌai kemenei emalie poi hemea hamoa. Ia keme nei memea kemanava aꞌoe nokaꞌoko make.”

¹⁰ Ia kena anau uko kama launiu la ikaha ma kelima ke{enselo} la noꞌai. Ia kemela emalie kepuꞌua anau, poi hemea hamoa. Ia keualoko anau niꞌai nooki la, kena kemanava anau ukaꞌoko make.

¹¹ Kena kama la eme mai anau, “Aꞌoe ikakala hoi, ihuli aꞌe namea kela meapihi aꞌe naonohenua komaꞌi, kela ekakala komaꞌi nakakala eꞌe. Ia ehuli aꞌe namea kela meapihi aꞌe nakuꞌu lakou la hoi.”