Philippians 4 - Luaniua New Testament

Keola nakama keloku

¹ Aukaina. Anau elaoi okou, kena hihai ihaele aku nomaka okou. Okou emea anau ihihia, kena ihuli aꞌe pela naheheaꞌu anau la ekaualeꞌa. Ia kena okou ikuu mau i namahi Kealiꞌi.

² Ia anau eme aꞌe Euodia laua ma Syntyche inoho laoi, poi nikama Kealiꞌi.

³ Hamaoni kausoa, anau hihai aꞌoe ikonaꞌi sakoꞌolua la. Koꞌolua la eheaꞌu manau ikekaukaꞌu kelono kaualeꞌa. Clement ia ma alakama eheaꞌu ma makou hoi. Namale lakou emau iloko kelauniu keola eola kahi.

⁴ Okou esuꞌui ma Kealiꞌi, ia kena okou ikau kehihia. Ia anau eme aku halaoi pela okou ikau kehihia lo.

⁵ Okou inoho pasemuu imua namaisu nakama hakoa, maikinimea Kealiꞌi ukapili hamai.

⁶ Okou isekipuaina. Emeia okou iloku kahi aꞌe Keakua, noainoa namea okou hihai la. Kena hamaha kama la i namea aia eau aku maꞌokou.

⁷ Kena Keakua melolosi okou inoho laoi. Okou mehakaꞌoko kahi ia Jesus Christ, kena ilaoi hamaoni i aia. Kipukipu Keakua la elaꞌa iluna ma namea kakou eailoa iloko kemaalama nei la.

⁸ Aukaina. Kakala haoki anau eme penei. Okou ihakaꞌoko kahi i namea hamaoni, ia ma namea masemu. Hakaꞌoko i namea ekonu, ia namea makahua. Hakaꞌoko i namea kela imea okou ilaoi hamaoni, ia namea kela okou ehalono ekaualeꞌa. Nakama hakoa ikau kehihai namea kaualeꞌa la. Okou ihakaꞌoko kahi namea la.

⁹ Okou ikaukali nakipukipu kela anau eaoaꞌo aku i okou, ia ma namea anau ehuli aku i okou, kela okou elono anau ekakala aku, ia eꞌike anau epena. Okou ipena kaukali namea la. Kena Keakua memea okou inoho laoi maia.

Paul ehamaha nakama i Philippi

¹⁰ Anau ehihia lo, kena ihamaha Kealiꞌi. Maikinimea okou ehakaꞌoko kekonaꞌi anau, ehau poi okou nikonaꞌi anau imua. Niaina okou sehiala elave ikonaꞌi anau vahonei, anau emakino pela okou ehakaꞌoko kahi i anau.

¹¹ Anau ekakala aku okou ikonaꞌi anau. Ia seme pela anau ekuku haeꞌo. Niaina keola anau eme pehe, anau elavaa kenoho havalekoa oia.

¹² Alaualoko anau eꞌai nopohu, ia ekuku laoi. Ia alaualoko anau hiꞌai, ia ekuku haeꞌo. Niaina keola anau eme pehe, anau emakino laoi kenoho havalekoa oia.

¹³ Anau eivi kepena namea hakoa, maikinimea Christ eau mai anau namahi aia.

¹⁴ Ia ekaualeꞌa pela okou ikonaꞌi anau keualoko nakapahala la ekae mai anau.

¹⁵ Okou nakama Philippi, okou emanaku keualoko anau nikaukaꞌu aku kelono kaualeꞌa i okou imua. Keualoko anau nikiaꞌi Macedonia, alahale loku okou la seau mai nimea ikonaꞌi anau, okou soꞌokou ekonaꞌi anau.

¹⁶ Keualoko anau ninoho i Thessalonica, okou eau mai kahi namea ikonaꞌi anau.

¹⁷ Ia seme pela anau eainoa aku alamea hoi. Anau hihai pela Keakua mesui muli aku okou.

¹⁸ Vahonei anau ekuku laoi, maikinimea Epaphroditus eau mai anau nahoꞌi okou la. Namea la ehau poi nihoꞌi esauna laoi, kela emea Keakua ihihia.

¹⁹ Ia kena Keakua eaumalie keau aku namea okou hihai, ikau ma namea kaualeꞌa aia la. Maikinimea okou esuꞌui ma Jesus Christ.

²⁰ Kena kakou ihamalumalu Keakua kakou Kamana naualoko hamau. Amen.*f2*

Nakakala haoki

²¹ Anau hihai okou ikakala hihia i nakama ekapu Keakua hakoa kela esuꞌui ma Jesus Christ. Ia nakaina inei ekakala aku kehihia lakou hoi.

²² Nakama ekapu Keakua hakoa inei ekakala hihia aku i okou. Kaohi mua nakama kela enoho iloko hale kehale kekuꞌu hamakua i Rome.

²³ Kealiꞌi Jesus Christ ilolosi laoi okou.