Matthew 9 - Luaniua New Testament

Kekama navae emake

¹ Jesus eꞌae iluna kemonoui nokele i kelaa vahi kemoana la nokae kemakaꞌina aia enoho la.

² Nakama kemakaꞌina la esau aꞌe kekama navae emake kela emoe iluna kelomoena. Keualoko Jesus eꞌike nakama la, Jesus eailoa pela nakama la ehakina i aia, kena ime aꞌe kama navae emake la, “Kaukama. Aꞌoe isehakekele. Anau esolo nahaisala aꞌoe la ikaha.”

³ Ia nakama epolopolo nakuaa la ekakala solakou pela ma, “Kama nei ekakala poi aia Keakua.”

⁴ Ia Jesus emakino nahakaꞌoko nakama la, kena ime aꞌe, “Aiea okou hakaꞌoko saꞌino naea?

⁵ Okou ehakaꞌoko pela ehainahie i keme aꞌe kama navae emake la, ‘Anau esolo nahaisala aꞌoe ikaha.’ Ia hainakaa i keme aꞌe kama la, ‘Kuu iluna nohaele.’

⁶ Kena anau ehuli aku okou pela {kama ekipu kama} eisi namahi aia iloko kemaalama nei i kesolo nahaisala ikaha.” Kena Jesus eme aꞌe kama navae emake la, “Kuu iluna, ko kelomoena aꞌoe na. Aꞌoe uhaele i hale aꞌoe la.”

⁷ Kena kama la ukuu iluna nohaele i hale.

⁸ Keualoko keonohenua eꞌike kama la uhaele, nakama la umakaꞌu, kena ihamaha Keakua pela aia eau aꞌe namahi la i kekama.

Jesus eanaa aꞌe Matthew ikaukali aia

⁹ Kulana Jesus ehaele, kama la eꞌike hekama emale ma Matthew, enoho iloko keꞌina eaoao na{kakisi}. Kena Jesus eme aꞌe kama la, “Kaukali mai anau.” Kena iko Matthew imasiꞌe iluna nokaukali aꞌe Jesus.

¹⁰ Jesus ma nakama kaukali aia la uo nonoho iloko hale kehale Matthew la noꞌai. Ia komaꞌi nakama eaoao na{kakisi} ia ma nakama haisala enoho lakou noꞌai hoi.

¹¹ Kulana naFarasi eꞌike nakama la ehapaa hakoa, naFarasi la eme aꞌe nakama kaukali Jesus la, “Aiea keRabai okou la eꞌai ma nakama eaoao {kakisi} ia ma nakama haisala laea?”

¹² Keualoko Jesus elono nakakala nakama la, kama la eme aꞌe, “Nakama selavea la meseo nomaka ke{tresa}. Emeia nakama elavea la ehihai io nomaka ke{tresa} la.

¹³ Okou iaꞌo hakaꞌoko iloko nakakala Keakua, ‘Anau semanaꞌo nahoꞌi okou. Emeia anau hihai okou ihaialoha alakama.’ Anau ehamai noanaa nakama kela eailoa pela lakou ehaisala. Ia anau sehamai noanaa nakama kela hakaꞌoko pela lakou ekonu kahi.”

Keaoaꞌo Jesus vahonei

¹⁴ Nakama kaukali John Baptist uo nome aꞌe Jesus, “Aiea makou ma naFarasi ehasese hiꞌai, ia nakama kaukali aꞌoe la eꞌai oia?”

¹⁵ Ko Jesus ime aꞌe, “Nakama ealu mia i keꞌai keꞌavana sekau kealoha kulana kekama hananiu la oinoho ma lakou. Keualoko alakama meiko kama hananiu la ikaha ma lakou, kena nakama la meihasese hiꞌai.

¹⁶ “Sehikama amekui kemepamalo vahonei iluna pamalo kuai. Maikinimea pamalo vahonei la amemasae ikaha ma pamalo kuai la. Ia kena keꞌina masae la ulahi.

¹⁷ Sehikama euku nahaupu mevale iloko kelo kuai, maikinimea kulana kealeve la mepia, kealeve la meihaa kelo kuai la nomahaa, ia kealeve la umanini puamu. Ia nahaupu la ekau keuku iloko nalo vahonei. Pela kealeve la ia ma nalo la mekaualeꞌa hakoa.”

Kamaliꞌi hine umake ia ma kehine eosooso haeꞌo

¹⁸ Kulana Jesus ekakala aꞌe nakama la, kela hekama hamakua na{Jiu} uhaele aꞌe nokoukuli imua Jesus, kena ime aꞌe “Kealiꞌi, kamaliꞌi hine anau la umake. Hamai nohaapili nalima aꞌoe iluna kamaliꞌi la iola muli.”

¹⁹ Kena Jesus umasiꞌe iluna io laua. Ia nakama ekaukali Jesus la ukaꞌa lakou hoi.

²⁰ Kulana nakama la nio, kelaa hehine ekuu ilaa. Kama la elavea kemahana eosooso haeꞌo iloko sehui ma lua nahekau. Kama la ehaele vamuli Jesus nohakili aꞌe keunuku naheheaꞌu kama la.

²¹ Kehine la ehakaꞌoko ma, “Pena anau ehakili aꞌe keunuku pamalo kama la, kena anau amekaualeꞌa muli.”

²² Jesus ehakiꞌe noꞌike kehine la, kena ime aꞌe “Kaukama, aꞌoe isemakaꞌu. Aꞌoe ehakina i anau, ia kena aꞌoe ukaualeꞌa.” Saika la oia, kehine la ukaualeꞌa.

²³ Kena kulana Jesus ekae aꞌe kehale kama hamakua la, kama la eꞌike nakama ehua saꞌa, ia elono kekanikani nakama la i kealahana.

²⁴ Kena Jesus eme aꞌe, “O ikaha. Kamaliꞌi hine na semake, kama na emoe oia.” Kena nakama la ekakala hasanosano aꞌe ia Jesus.

²⁵ Ia kulana nakama la ekaꞌa hakoa ikaha, Jesus uhaele iloko hale nokaohi kelima kamaliꞌi la, nohamasiꞌe iluna.

²⁶ Kena kelono la upalalaha naꞌina la hakoa.

Koꞌolua alemaka seni

²⁷ Kulana Jesus ehaele ikaha ma keꞌina la, sakanaka alemaka seni ekaukali vamuli aia, kena ianaa aꞌe hamaloa ma, “Kemopuna David, haialoha mai maua.”

²⁸ Kulana Jesus nihaele iloko hale, sakanaka alemaka seni la eo aꞌe hoi. Kena Jesus eme aꞌe koꞌolua la, “Olua ehakina pela anau elavaa kekonaꞌi olua?” Kena koꞌolua la eme aꞌe, “Ei Kealiꞌi.”

²⁹ Kena Jesus ehakili nalima aia iluna naꞌalemaka koꞌolua la, kena ime aꞌe, “Olua meꞌike, ehau poi olua ehakina na.”

³⁰ Vahola oia, koꞌolua la uꞌike. Kena Jesus ehamakaꞌu aꞌe koꞌolua la pela, “Olua isekakala aꞌe alakama.”

³¹ Ia koꞌolua la eo nokakala kelono Jesus i naꞌina hakoa.

Kekama kela selavaa kekakala

³² Kulana koꞌolua la nikaꞌa ikaha, alakama ehakaꞌi aꞌe kekama kela selavaa kekakala, maikinimea kama la eisi kipua saꞌino iloko aia.

³³ Keualoko Jesus ehakui kipua la ikaha, kama la ulavaa kekakala. Kena keonohenua la umasalo haeꞌo, kena ime aꞌe, “Sehikama ehuli aꞌe namahi penei iloko Israel imua.”

³⁴ Ia naFarasi eme aꞌe keonohenua la, “Kena kekuꞌu nakipua la eau aꞌe kama la namahi aia ihakui nakipua la ikaha.”

Jesus ealoha keonohenua

³⁵ Jesus uhaele hakiꞌe namakaꞌina hakoa, noaoaꞌo kelono kaualeꞌa kenoholana Keakua iloko nahale loku la, kena ikonaꞌi nakama elavea nokaualeꞌa hakoa.

³⁶ Keualoko Jesus eꞌike keonohenua la, kama la ealoha haeꞌo. Maikinimea nakama la ekipuaina nahalono lihu lakou la, ehau poi na{sipisipi} kela sehikama elolosi lakou.

³⁷ Kena Jesus eme aꞌe nakama kaukali aia la, “Ila aꞌe. Nalaꞌau la huhui, ia nakama meio nohaꞌi la emoisi.

³⁸ Kena ainoa aꞌe Kealiꞌi kela ehamakua huaka la ihaunalia komaꞌi nakama iheheaꞌu iloko paupaꞌu aia la.”