Matthew 3 - Luaniua New Testament

John Baptist ekaukaꞌu

¹ Keualoko la, John Baptist ehaele i keꞌina kukuaha iloko Judea, kena keonohenua la uo aꞌe nohalono kekaꞌu aia.

² John eme aꞌe, “Kiꞌe ikaha ma nahaisala okou, maikinimea Keakua kevaelani mehamai nohamakua kenoholana aia.”

³ Isaiah nihaꞌali aꞌe nakipukipu keola John Baptist ma, “Kela hekama ekaukaꞌu i keꞌina kukuaha ma, ‘Kanakana keala Kealiꞌi ihamai valuna. Ia velevele keala aia la ikonu.’ ”

⁴ Napamalo John ehili nahuluhulu na{kamelo}. Kana kaukuu keꞌili kemanu. Naꞌai aia la nakama kelauniu ia ma na{hani}.

⁵ Komaꞌi nakama i Jerusalem, ia ma Judea ia ma namakaꞌina kapili aꞌe ke{liva} Jordan eo aꞌe nohalono kekaukaꞌu John.

⁶ Kena iko nakama la ihaꞌali aꞌe nahaisala lakou, kena John ehaauꞌau kapu nakama la iloko kevai ke{liva} Jordan.

⁷ John uꞌike komaꞌi naFarasi ia ma naSatiusi uo aꞌe, i keꞌina aia haauꞌau kapu alakama keonohenua la. Ia John ume aꞌe nakama la, “Okou niꞌaka. Keualoko Keakua meloko i okou, kena okou meselavaa kehulo ikaha ma kama la.

⁸ Penapena namea kaualeꞌa, ihuli aꞌe pela okou ukiꞌe ikaha ma nahaisala okou.

⁹ Ia okou iseahu pela okou emamaoha iho i keꞌaha Abraham, maikinimea Keakua elavaa kehuli nahaku nei ime mo kamaliꞌi Abraham.

¹⁰ Keakua ekanakana kehakonukonu okou, ehau poi hekama kela ekuu keunaloko kelaꞌau la. Nalaꞌau kela sehua nahua kaualeꞌa ekau kekuu imoe ilalo, kena ulaku iloko keahi.

¹¹ “Anau ehaauꞌau kapu okou i kevai, ihuli aꞌe pela okou ukiꞌe ikaha ma nahaisala okou. Ia kekama meihamai imuli anau la, ehananiu iluna anau. Anau sekau kesau nakapuae aia hahao la. Kama la meihaauꞌau kapu okou i Keanana Kapu ia ma keahi.

¹² Kama la uko kaikahi aia la nohakaa keꞌina aia ehapaa nahua. Kama la meihaꞌuku nahua la nololosi namela iloko hale kehale aia la, ia meilaku napenu la iloko keahi eula kahi.”

John ehaauꞌau kapu Jesus

¹³ Vahola oia, Jesus uhaele ikaha ma Galilee, nomaka John i ke{liva} Jordan, pela John amehaauꞌau kapu aia.

¹⁴ Ia John sehihai. Kama la eme aꞌe Jesus, “Okea aꞌoe hamai manau ihaauꞌau kapu aꞌoe? Aꞌoe ekau kehaauꞌau kapu anau avale.”

¹⁵ Kena iko Jesus ime aꞌe kama la, “Aꞌoe ihaauꞌau kapu anau. Kaua ikau kehuli aꞌe nakipukipu ekonu hakoa.” Kena John eaunahie,

¹⁶ ia kena ihaauꞌau kapu Jesus. Saika la oia, Jesus emasiꞌe iluna ikaha ma kevai la, kena kevaelani ukalaꞌi. Kena kama la uꞌike Keanana Kapu Keakua ulee iho iluna aia poi helupe.

¹⁷ Kena Keakua ekakala iho ikaha ma kevaelani ma, “Anau ehaikama laoi kaukama nei. Anau ehihai nakipukipu aia la hakoa.”