Matthew 28 - Luaniua New Testament

Jesus uola muli

¹ Imuli keaho kapu, kahaka po keaho kela kapu la, Mary Magdalene ia ma kelaa hine emale ma Mary uo nomaka kaluma la.

² Keualoko la, keꞌina la elulu henua, maikinimea ke{enselo} Kealiꞌi uhaele iho ikaha ma kevaelani. Kama la ehaele i kaluma la nohakaꞌape kehaku la ikaha ma kokoꞌa kaluma la, kena inoho iluna kehaku la.

³ Ke{enselo} la emasina poi heꞌemo. Ia naheaꞌu aia la emaꞌini lo.

⁴ Napulepule kela elolosi kaluma la epole nomakaꞌu haeꞌo, kena imoe poi nikama umake.

⁵ Ke{enselo} la ume aꞌe nahine la, “Okou isemakaꞌu. Anau emakino pela okou eo mai nomaka Jesus, kekama kela napulepule la nikii iluna {kolosi}.

⁶ Kama la useai inei. Kama la umasiꞌe ikaha ma kemake poi kama la nikakala aku okou imua. Omai nomaka keꞌina kama la nimoe.

⁷ Kena okou ikaꞌa vave nome aꞌe nakama kaukali aia la, ‘Jesus umasiꞌe ikaha ma kemake. Kena kama la uhaele imua okou i Galilee. Okou meiꞌike kama la i keꞌina la.’ Halono hea anau eme aku okou.”

⁸ Nahine la emakaꞌu, ia ehihia hoi. Kena nakama la uhulo vave ikaha ma kaluma la nome aꞌe nakama kaukali Jesus la hea lakou elono.

⁹ Vahola ia, Jesus ukili nahine la, kena ikakala hakaualeꞌa nakama la. Ia kena nahine la ukoukuli nokaohi nakapuae Jesus la, kena ihamalumalu kama la.

¹⁰ Kena iko Jesus ime aꞌe nahine la, “Okou isemakaꞌu. Okou io nome aꞌe nakama kaukali anau la io aꞌe i Galilee. Nakama la meiꞌike anau i keꞌina la.”

Nakakala napulepule la

¹¹ Keualoko nahine la uo ikaha, napulepule kela nilolosi kaluma la uo i Jerusalem nome aꞌe namaakua hamakua la namea hakoa lakou eꞌike la.

¹² Kena namaakua hamakua la uꞌuku ma nakama hamakua na{Jiu} la. Nakama la ehakaꞌoko keau aꞌe napulepule la komaꞌi namoni,

¹³ kena ime aꞌe, “Okou ime aꞌe keonohenua la pela nakama kaukali Jesus la eo aꞌe kuapo la, keualoko kakou nimoe la, noailalao kinokama Jesus.

¹⁴ Niaina Pilate amelono nakakala nei, okou isehakekele. Makou somakou eailoa kekakala aꞌe Pilate.”

¹⁵ Kena napulepule la uko namoni la, ia halono namaakua la. Kena nakakala nukulaoi lakou la ekoha i na{Jiu} la nokae keaho nei.

Jesus ehuli aꞌe aia i nakama kaukali aia la

¹⁶ Sehui ma kahi nakama kaukali Jesus la uo i kemouna i Galilee, i keꞌina Jesus nime aꞌe lakou ikaꞌa la.

¹⁷ Kulana nakama la eꞌike Jesus, nakama la ehamalumalu kama la. Ia alakama nakama la sehakina hamaoni.

¹⁸ Kena iko Jesus ihaele nome aꞌe nakama la, “Keakua uau mai namahi kevaelani ia ma namahi kemaalama nei la hakoa.

¹⁹ Ia kena okou ikaꞌa i naonohenua hakoa i kemaalama nei. Aoaꞌo nakama la ikaukali anau. Haauꞌau kapu nakama la i kemale Kamana ia ma Kanakama ia ma Keanana Kapu.

²⁰ Aoaꞌo nakama la ihalono namea hakoa kela anau nime aku okou. Kena anau meinoho ma okou naualoko hamau, hanokae kehaoki kemaalama nei.”