Matthew 24 - Luaniua New Testament

Keseu hale kapu

¹ Kulana Jesus ehaele ikaha ma hale kapu la, nakama kaukali aia la uo nome aꞌe aia iꞌila aꞌe nahale kela kehale kapu la.

² Ia Jesus eme aꞌe nakama la, “Okou eꞌike nahale la hakoa? Anau eme aku kehamaoni. Nahaku nahale la hakoa meimaoha ilalo. Selavaa hehaku emau iluna alahaku.”

Nahalono lihu meikae mai

³ Kulana Jesus enoho iluna kemouna esomo na{Oliv}, nakama kaukali aia la uo solakou nome aꞌe aia, “Me mai makou. Name nei hakoa meiapihi mai vahohee? Makou meiꞌike nahaꞌaku pehe imakino makou pela aꞌoe meivaꞌai mai muli, ia kemaalama nei meioki?”

⁴ Kena iko Jesus ime aꞌe, “Lolosi hamakonu, iselavaa hekama kehailavaꞌa okou.

⁵ Komaꞌi nakama meio aku i kemale anau, kena ime aku pela lakou niMesaea, kena mehailavaꞌa komaꞌi nakama.

⁶ Ia okou meilono nakaua, ia ma nakakala kaua meihamai. Ia okou isemakaꞌu. Namena meiapihi aku, ia sehuli aku kehaoki kemaalama nei.

⁷ Naonohenua meivuhu ma alaonohenua. Kenoholana meivuhu ma kelaa noholana. Ia keone la mekae aꞌe komaꞌi nahenua, kena naonohenua la meimake kehiꞌai. Ia komaꞌi naꞌina meilulu hia kelulu henua.

⁸ Ia kenei keꞌamaka nahalono lihu. Ehau poi kehine eisu imua aia memamaoha kamaliꞌi.

⁹ “Alakama meikaohi okou, ihai haeꞌo kia okou, kena ikaa okou nomake. Naonohenua hakoa meililoko okou, maikinimea okou ekapa kemale anau.

¹⁰ Keualoko la, komaꞌi nakama meikiaꞌi nahakina lakou. Nakama la meililoko nahakina ana, kena meihaꞌali aꞌe nakama la i nakama hamakua.

¹¹ Komaꞌi nakama nukulaoi meio mai nome aku okou pela lakou ehakae nakakala Keakua, kena meihailavaꞌa komaꞌi nakama.

¹² Ia kena komaꞌi nakama meinonoho saꞌino, kena meselavaa kelaoi alakama.

¹³ Ia poi hekama ehakina i anau nokae kehaoki, Keakua meikonaꞌi aia.

¹⁴ Nakama kaukali anau la meikaukaꞌu aꞌe kelono kaualeꞌa kenoholana Keakua i nakama kemaalama nei hakoa, kena nakama la hakoa meilono i anau. Kena kehaoki kemaalama nei mekae mai.

Keualoko kehalono lihu

¹⁵ “Okou meiꞌike hakipua saꞌino haeꞌo kela meseu komaꞌi namea. Kemela mekuu i keꞌina ekapu la, ehau poi Daniel, kekama hakae nakakala Keakua, nikakala mai imua. (Okou hakoa ikau kemakino laoi kehakaꞌoko nakakala nei.)

¹⁶ Keualoko la, nakama Judea mehulo i namouna iloko nomuni.

¹⁷ Nakama kela enoho iluna kauhu mehulo ikaha ma nahale lakou, ia seko namea iloko nahale lakou la.

¹⁸ Nakama kela enoho iloko napaupaꞌu lakou la isevaꞌai muli i nahale lakou noko niauꞌahu ma lakou.

¹⁹ Nahine haikama, ia ma nahine eisi nakamaliꞌi sasapai la mehalono lihu.

²⁰ Ainoa aꞌe Keakua pela okou meisehulo ikaha keualoko kelaꞌi maili, ma keualoko keaho kapu.

²¹ “Keualoko la, nakama hakoa meihalono lihu haeꞌo, elaꞌa iluna ma nahalono lihu hakoa i kemaalama nei. Ia naonohenua imuli mesehalono lihu pela hoi.

²² Pena Keakua sekuu keualoko saꞌino la nopopoko, selavaa hekama iola. Ia Keakua ealoha nokuu keualoko kehalono lihu la ipopoko. Maikinimea kama la ehilihili alakama iola.

²³ “Saika la alakama meme aku, ‘Ila aꞌe kela keMesaea! Kama la ukae mai!’ Ia okou isehakina nakama na.

²⁴ Alakama meinuku laoi ma lakou niMesaea, ia alakama meinuku laoi ma lakou ehakae nakakala Keakua. Nakama la meihuli aꞌe namahi hananiu ia ma nahaꞌaku lakou, pela ihailavaꞌa nakama kela Keakua ehilihili la.

²⁵ Lolosi hamakonu. Maikinimea anau namea aku avale pela namenei hakoa meapihi aku.

²⁶ “Hano poi nakama la eme aku, ‘KeMesaea la enoho iloko keꞌina kukuaha.’ Okou iseo i keꞌina la. Pena nakama la eme aku, ‘KeMesaea la emuni iloko hale la.’ Okou isehakina nakama la.

²⁷ {Kama ekipu kama} meihamai poi keꞌemo kela emasina kevaelani i keanaꞌe hanokae kelaꞌi.

²⁸ “Namanu melelele valuna keꞌina kela kekama emake emoe la.

{Kama ekipu kama} meihamai

²⁹ “Imuli nahalono lihu la, kelaa la meipouli, ia kemalama la mesekii. Ia Keakua meilulu kevaelani iseo konu namela naala lakou, kena nahekuu kevaelani la meimaoha ilalo.

³⁰ Vahola, kehaꞌaku kela {kama ekipu kama} meihuli aꞌe i kevaelani. Nakama i kemaalama nei hakoa meikani lakou makaꞌu, kulana lakou eꞌike {kama ekipu kama} ehamai iluna napuleulehu eꞌiva la i namahi Keakua.

³¹ Kama la meihaunalia na{enselo} aia i nahenua hakoa i kemaalama nei, iili kepuikili ekani vaa, nohaꞌuku nakama aia nihilihili la.

³² “Okou ihakaꞌoko kipukipu ke{fig} imakino kehakaꞌoko nakakala hulihuli nei. Kulana nalala kelaꞌau la meisomo nalaumea, okou umakino pela keualoko haaua ukapili.

³³ Kulana okou eꞌike namea nei hakoa ehuli mai, okou umakino pela {kama ekipu kama} ukapili ihamai, ehau poi hekama kela ekuu kokoꞌa.

³⁴ Anau eme aku okou kehamaoni. Kulana namenei hakoa meapihi aku, alakama kaukama nei meoiola.

³⁵ Kevaelani ialuna ma kemaalama nei meio nooki, ia nakakala anau selavaa keoki.

Sehikama emakino

³⁶ “Sehikama emakino keaho hee, ia ma keualoko hee nahaꞌaku la meihuli mai, niaina {kama ekipu kama} ia ma na{enselo} i kevaelani. Kamana soia emakino.

³⁷ Nakama kela enoho kulana {kama ekipu kama} mehamai, meikipu poi nakama kela enoho kulana Noah niola la.

³⁸ Keonohenua la eꞌai ia eunu. Nakama la eꞌavana, kena iau aꞌe nakaupu lakou la iꞌavana lia, nokae keualoko Noah niꞌae kevaꞌa hakua aia la. Kena kaiuu la ukae aꞌe nolohia nahenua kemaalama nei hakoa.

³⁹ Nakama la semakino pela kaiuu la mekae aꞌe noseu lakou. “Nakama la ehau poi nikama kela menoho kulana {kama ekipu kama} mehamai.

⁴⁰ Keualoko la, koꞌolua meiheheaꞌu iloko paupaꞌu. Keakua meiko kelaa kama, ia meikiaꞌi kelaa kama.

⁴¹ Poi sahine ekukuꞌi naꞌai, Keakua meiko kelaa hine, ia meikiaꞌi kelaa hine.

⁴² “Ia kena okou iala kahi. Okou semakino keaho hee Kealiꞌi okou la meihamai.

⁴³ Ia okou ikau kemakino laoi kemenei. Poi hekama hamakua kehale umakino pela kekama ailalao la mehamai, kama hamakua la melolosi laoi kehale aia la, aoki kama ailalao la mehaa kehale aia la noailalao.

⁴⁴ “Kena okou ikanakana pela hoi. Maikinimea {kama ekipu kama} mevaꞌai mai keualoko okou sehakaꞌoko pela aia meivaꞌai mai.

Oai kekama heheaꞌu ehalono hamaoni?

⁴⁵ “Pena hekama heheaꞌu eakamai, kama la mehalono nakakala kama hamakua aia la. Kekama hamakua la ehakina kekama heheaꞌu aia la ilolosi alakama heheaꞌu, novavae aꞌe naꞌai lakou keaho ma keaho.

⁴⁶ Kaualeꞌa pela kama hamakua aia la ehamai nolave kama heheaꞌu la elolosi nakama la.

⁴⁷ Anau eme aku kehamaoni. Kama hamakua la meikini kama heheaꞌu la nololosi namea aia la hakoa.

⁴⁸ “Ia pena kekama heheaꞌu la esaꞌino, kama la meihakaꞌoko pela kama hamakua aia la meinase.

⁴⁹ Kena kama saꞌino la meilili kia alakama heheaꞌu, kena meiꞌai, ia meiunu ma nakama eunuꞌunu vale.

⁵⁰ Kena kama hamakua aia la meihamai, kulana kama heheaꞌu saꞌino la seikanakana, ia seiailoa keualoko hee kama hamakua aia la meihamai.

⁵¹ Kena kama hamakua la meilili kia kama saꞌino la, kena ihaise kama la ikaha, nonoho i keꞌina halono lihu ma nakama kakala uhiuhi la. Kena nakama la meikanikani nohaꞌaki naniho lakou.