Matthew 19 - Luaniua New Testament

Kipukipu kekiaꞌi keꞌavana

¹ Keualoko Jesus uoki kekakala, kama la uhaele ikaha ma Galilee nokae Judea i kelaa vahi ke{liva} Jordan.

² Ia naonohenua elahi ekaꞌa ma Jesus, kena kama la ekonaꞌi nakama lavea lakou la nokaualeꞌa.

³ Alakama naFarasi la uo aꞌe nokaiꞌi Jesus, kena ivasili aꞌe, “Nakuaa kakou eme pehe? Poi hekama hihai ikiaꞌi kehine aia, elavaa kanaka la keseꞌavana kehine aia la?”

⁴ Kena Jesus eme aꞌe, “Okou napau avale nakakala nei iloko kelauniu kapu. ‘Kulana Keakua nipena kemaalama nei la, kama la epena koꞌolua nakama; kanaka, kehine.’

⁵ Kena Keakua eme aꞌe, ‘Kela hea kaupeala la mekiaꞌi kamana ia ma kina aia la, kena ihanoa ma kaupu la. Ia kena koꞌolua na uo mai pela hekama hokahi.’

⁶ Seai koꞌolua. Keakua esuꞌui koꞌolua la, hokahi oia. Kena sehikama ekau kekuu keꞌavana koꞌolua la.”

⁷ Kena iko naFarasi la ime aꞌe, “Nakuaa Moses la emau iho ma kanaka ‘iꞌave kelauniu kela keseꞌavana imua aia ukiaꞌi keꞌavana aia la.’ Saika la, kama na elavaa kehaise kehine la ikaha.”

⁸ Ia Jesus eme aꞌe, “Moses ehakana okou ikiaꞌi naꞌavana okou, maikinimea okou ehakapanaka haeꞌo. Ia kulana Keakua nipena kanaka ma kehine, kama la sehaakana nakama la ikiaꞌi naꞌavana lakou.

⁹ Anau eme aku okou. Poi hekama ekiaꞌi kehine aia la, kena uꞌavana kelaa hine, ia kehine aia la sehai huli, kena kanaka la uhaisala i keꞌavana huli.”

¹⁰ Kena nakama kaukali Jesus la eme aꞌe, “Poi keꞌavana ekipu penei, kaualeꞌa pela sehikama meꞌavana.”

¹¹ Ia Jesus eme aꞌe, “Keakua ekonaꞌi alakama ihalono nakakala nei.

¹² Alakama sehihai iꞌavana, maikinimea lakou hanau mai pela lakou sehakekele keꞌavana. Alakama meseꞌavana ikaukali kehakaꞌoko alakama. Ia alakama sehihai iꞌavana, maikinimea lakou ehakaꞌoko maha kenoholana kevaelani. Halono, poi keaoaꞌo nei ekau ma okou, kena okou ukaukali.”

Jesus hihai nakamaliꞌi io aꞌe aia

¹³ Alakama eau aꞌe nakamaliꞌi lakou la ia Jesus, pela aia mehapili nalima aia iluna nakamaliꞌi la, kena iloku aꞌe Keakua ikonaꞌi nakamaliꞌi la. Ia nakama kaukali la ehai aꞌe nakama la.

¹⁴ Kena Jesus eme aꞌe, “Kiaꞌi nakamaliꞌi na io mai anau. Okou isepui nakamaliꞌi na. Maikinimea kenoholana kevaelani heꞌina nakamaliꞌi na.”

¹⁵ Kena Jesus ehapili nalima aia iluna nakamaliꞌi la. Iaoki, kena ihuli nohaele.

Kevasili kekama haiheaꞌu

¹⁶ Kela hekama ehaele nome aꞌe Jesus, “Rabai, anau ikaukali kipukipu pehe iko keola eola kahi?”

¹⁷ Kena Jesus eme aꞌe, “Aꞌoe isevasili mai anau pela nakipukipu kaualeꞌa. Keakua soia ekaualeꞌa. Poi aꞌoe hihai iola hamaoni ma Keakua, kena kaukali nakuaa aia la.”

¹⁸ Kama la eme aꞌe, “Nakuaa hee?” Kena Jesus eme aꞌe, “Sekaa kama, seꞌavana huli, seailalao, sekakala nukulaoi.

¹⁹ Hamaha kamana aꞌoe ma kina aꞌoe. Kena laoi alakama, ihau poi aꞌoe elaoi soꞌoe.”

²⁰ Kena kama la eme aꞌe, “Anau nakaukali avale nakuaa la hakoa. Ea? Anau ikaukali kelaa mea hoi?”

²¹ Kena iko Jesus ime aꞌe, “Poi aꞌoe hihai ikonu kahi, haele noko naheheaꞌu aꞌoe la hakoa. Au aꞌe namela i alakama isui. Kena uvavae aꞌe namoni la i nakama haaloha. Ia kena aꞌoe meiko namea kaualeꞌa i kevaelani. Kena aꞌoe uhamai nokaukali mai anau.”

²² Ia keualoko kama la elono nakakala Jesus, kama la ukipuaina haeꞌo, kena ihaele ikaha, maikinimea kama la hekama haiheheaꞌu.

²³ Jesus eme aꞌe nakama kaukali aia la, “Anau eme aku kehamaoni. Mehainakaa haeꞌo nakama haimoni la kekae kenoholana kevaelani.

²⁴ Anau eme aku okou hoi. Ehainakaa ke{kamelo} keulu iloko kelua kelina kela ekui pamalo. Ia hainakaa haeꞌo nakama haimoni la kekae kenoholana Keakua.”

²⁵ Keualoko nakama kaukali Jesus la nilono nakakala la, nakama la umasalo haeꞌo, kena ime aꞌe, “Kena oai kekama amekae na?”

²⁶ Jesus uꞌila aꞌe nakama la, kena ime aꞌe, “Ame hainakaa haeꞌo kekama, ia namea hakoa ehainahie Keakua.”

²⁷ Ko Peter ime aꞌe Jesus, “Makou ukiaꞌi namea hakoa, kena makou ukaukali aꞌoe. Ia hea makou meiko na?”

²⁸ Kena Jesus eme aꞌe nakama la, “Anau eme aku kehamaoni. Kulana okou meikae kelaa maalama, {kama ekipu kama} meinoho iluna kenoholana hananiu aia la. Ia kena okou nakama kaukali anau, meinoho iluna sehui ma lua nanoholana okou la, kena ihakonukonu sehui ma lua naꞌaha Israel.

²⁹ “Pena hekama ekiaꞌi nahale aia la, ia ma napaupaꞌu aia la, kena ukaukali mai anau, kena Keakua meihoꞌi aꞌe kama la, elaꞌa iluna ma namea aia ukiaꞌi la. Pena hekama ekiaꞌi nakaina aia, naꞌave aia, kamana aia, kina aia, ia ma nakamaliꞌi aia la, nokaukali mai anau, kena Keakua meiko aꞌe komaꞌi nakama mo haleaina kama la, elaꞌa iluna ma nakama aia nikiaꞌi la. Poi kama la ekiaꞌi kemea hokahi, kama la meiko huikalau namea la. Kena Keakua meiau aꞌe kama la keola eola kahi.

³⁰ Komaꞌi nakama hananiu meikeiho ilalo. Ia nakama moulalo meihananiu.