Matthew 18 - Luaniua New Testament

Oai kekama meihananiu

¹ Keualoko la, nakama kaukali Jesus la eo novasili aꞌe aia, “Oai kekama mehananiu i kenoholana kevaelani?”

² Jesus eanaa aꞌe kamaliꞌi holiliꞌi nohaele aꞌe. Kena ihakuu kama la imua nakama kaukali aia la.

³ Kena Jesus eme aꞌe, “Anau eme aku kehamaoni. Pena okou sehuli nahakaꞌoko okou imoulalo poi hakaꞌoko kamaliꞌi nei, okou selavaa kekae kenoholana kevaelani.

⁴ Ia poi hekama ekuu iho soia nomoulalo, ihau poi kamaliꞌi nei, kama na meihananiu i kenoholana kevaelani.

⁵ Poi hekama ekaukali nakipukipu anau, kena ehihai nakamaliꞌi penei, kama na ehihai anau hoi.

Kekaoleole kekama i sehakina

⁶ “Poi hekama ekaoleole nakamaliꞌi kela ehakina i anau la ihaisala, ekau pela alakama enoa hehaku elahi keua aia, kena ulaku kama na kemoana imalemo.

⁷ Komaꞌi nakama iloko kemaalama nei mehalono lihu, maikinimea nakama la ekaoleole alakama ihaisala. Nahalono lihu la amekae nakama hakoa. Ia nakama kela ekaoleole alakama ihaisala meihalono lihu haeꞌo.

⁸ “Pena kelima ma kevae aꞌoe emea aꞌoe ihaisala, kuu namea na nolakua ikaha. Ekaualeꞌa pela aꞌoe ukae keola iluna ma kevahi kinokama aꞌoe. Ia saꞌino pela aꞌoe sekuu kelima ma kevae aꞌoe, kena kinokama aꞌoe hakoa meilakua i keahi eula kahi.

⁹ Ia pena keꞌalemaka aꞌoe emea aꞌoe ihaisala, ape keꞌalemaka aꞌoe la nopesia ikaha. Ekaualeꞌa pela aꞌoe ukae keola iluna ma keꞌalemaka hokahi. Ia saꞌino pela aꞌoe seape keꞌalemaka aꞌoe, kena kinokama aꞌoe hakoa meilakua i keahi eula kahi.

Kakala hulihuli kemanu sili

¹⁰ “Lolosi hamakonu. Okou isehanaꞌino nakamaliꞌi nei. Maikinimea na{enselo} kela lolosi nakamaliꞌi nei enoho lakou ma Kamana anau i kevaelani.

¹¹ {Kama ekipu kama} uhamai nokonaꞌi nakama elano.

¹² “Hakaꞌoko okou la emea pehe? Kela hekama eisi huikalau napunua {sipisipi}, ia punua hokahi uhaele ikaha. Kama la mekiaꞌi kelaa kipu sivo ma sivo napunua {sipisipi} la iluna kuku la. Kena kama la meihaele nosee punua {sipisipi} aia elano la.

¹³ Anau eme aku kehamaoni. Kama la ehihia pela kipu sivo ma sivo napunua {sipisipi} aia la eselano. Ia kama la ehihia lo kulana aia nilave punua {sipisipi} aia nilano la.

¹⁴ Kamana okou i kevaelani eme pela hoi. Kama la sehihai hekama ilano.

Kaina ehaisala

¹⁵ “Amea kaina aꞌoe la nonoho haeꞌo maꞌoe, haele nokakala olua soꞌolua. Amea kama la ehalono aku, kena olua mehakonu hea esala la i lakonu olua.

¹⁶ Ia poi kama la sehalono aku, aꞌoe iko kelaa kama ihalono nakakala olua. Ia aꞌoe elavaa keko koꞌolua nakama ihalono olua hoi. Kena nakama la elavaa kehaꞌali aꞌe pela nakakala aꞌoe la ehamaoni.

¹⁷ Ia poi kama la sehihalono koꞌolua la, haꞌali aꞌe kevahi nakama keloku ihakonu. Amea kama la sehihalono nakama hale loku la, kena hevahi aꞌoe kenoho ma kama la, ehau poi kama la hekama enoho pouli, ma hekama aoao na{kakisi}.

Epui ia haakana

¹⁸ “Anau eme aku kehamaoni. Namea kela Keakua epui i kevaelani, okou mepui i kemaalama nei. Ia namea kela Keakua ehaakana i kevaelani, okou mehaakana i kemaalama nei hoi.

¹⁹ “Anau eme aku okou hoi. Poi koꞌolua nahakina ana i kemaalama nei enuu hakoa, kena loku aꞌe Keakua, kena Kamana anau i kevaelani la mehuli aꞌe nia koꞌolua la hihai.

²⁰ Amea koꞌolua ma koꞌokolu nakama eꞌuku noloku aꞌe Keakua i kemale anau, kena anau menoho ma nakama la.”

Kakala hulihuli kama heheaꞌu sehaialoha

²¹ Kena Peter ehaele novasili aꞌe Jesus, “Kealiꞌi. Kulana kaina anau la ehaisaꞌino mai anau, ehia naualoko anau mehaialoha kama la, kauhiku naualoko?”

²² Kena iko Jesus ime aꞌe, “Seai kauhiku. Haialoha aꞌe kama la kipu hiku liuna ma kauhiku naualoko.

²³ “Kipukipu kenoholana Keakua eme penei. Kela hekuꞌu eanaa aꞌe nakama heheaꞌu aia la ihuli aꞌe namoni aia niau aꞌe nakama la ilolosi.

²⁴ Kulana kekuꞌu la ehakau namoni aia la, napulepule kama la ehakaꞌi mai kelaa kama heheaꞌu. Komaꞌi haeꞌo namoni elano kama la.

²⁵ Ia kama la sehimoni kesui muli namoni kekuꞌu la. Ia kena kekuꞌu la ume aꞌe napulepule la, ‘Ko kama saꞌino la, ma haikina aia la, noau aꞌe alakama isui nakama la mo kama heheaꞌu lakou. Kena ko namoni la nosui mai namoni anau nilano la.’

²⁶ Ia kama saꞌino la ekoukuli imua kekuꞌu la noainoa aꞌe, ‘Seliloko mai anau. Hakali. Anau meisui muli aku namoni aꞌoe la.’

²⁷ Ia kena kekuꞌu la ualoha kekama saꞌino la, kena haakana kama la ihaele, ia isesui muli aꞌe namoni aia la.

²⁸ “Kena kama saꞌino la uhaele nolave kelaa kama heheaꞌu kekuꞌu la kela niko kama sileni aia. Kena kama saꞌino la ekaohi keua kama la, kena ime aꞌe, ‘Sui mai vave sileni anau niau aku la.’

²⁹ Kena kama heheaꞌu la ukoukuli imua kama saꞌino la noainoa aꞌe ma, ‘Seliloko mai anau. Hakali. Anau meisui muli aku sileni aꞌoe.’

³⁰ Ia kama saꞌino la sehaialoha aꞌe kama la, kena iko kama la nopono iloko kelokapu, ikae keualoko kama la isui muli aꞌe sileni aia la.

³¹ “Kulana alakama heheaꞌu kekuꞌu la niꞌike hea kama saꞌino la epena, nakama la umasalo haeꞌo. Kena ikaꞌa nokakala aꞌe kekuꞌu la hea kama saꞌino la epena.

³² Kena kekuꞌu la uanaa aꞌe kama saꞌino la, kena ime aꞌe, ‘Aꞌoe o kekama heheaꞌu saꞌino. Aꞌoe eainoa mai anau ihaialoha aku aꞌoe, kena anau ehaakana aꞌoe ihaele, sesui muli mai namoni anau la.

³³ Anau ealoha aꞌoe, ia kena aꞌoe ekau kealoha kelaa kama heheaꞌu anau la hoi.’

³⁴ Kena kekuꞌu la uloko haeꞌo. Kena ipono kekama saꞌino la iloko kelokapu, ikae keualoko kama la elavaa kesui muli namoni aia niko la hakoa.”

³⁵ Kena Jesus ehapaa aꞌe iluna nakakala aia la ma, “Kamana anau i kevaelani emea pela hoi. Amea okou sehaialoha hamaoni nakaina okou la, kena kama la mesehaialoha okou hoi.”