Matthew 17 - Luaniua New Testament

Keakua uhuli aꞌe namahi aia i kinokama Jesus

¹ Imuli eono naaho, Jesus eko Peter ia ma haihanau James laua ma John nokaꞌa lakou iluna kemouna.

² Kena nakama la eꞌike namahi Keakua ehuli aꞌe iloko kinokama Jesus. Namaisu Jesus emasina poi kelaa, kena naauꞌahu aia la emaꞌini ivaꞌiva lo.

³ Koꞌokolu la uꞌila noꞌike Moses laua ma Elijah ilaa hoi, ekakala lakou ma Jesus.

⁴ Kena iko Peter ime aꞌe Jesus, “Kealiꞌi, kaualeꞌa pela makou inei. Poi aꞌoe hihai, anau meihakuu koukolu nakamahale ma okou; kamahale aꞌoe, kamahale Moses ia kamahale Elijah.”

⁵ Kulana Peter ekakala aꞌe nakama la, puleulehu eꞌivaꞌiva uꞌuhi nakama la, kena Keakua ekakala iho iloko puleulehu la ma, “Anau haikama laoi kaukama nei. Anau ehihai nakipukipu kama nei la hakoa. Okou ihalono aꞌe kama nei.”

⁶ Keualoko koꞌokolu nakama kaukali la ulono Keakua ekakala iho, nakama la umakaꞌu kena ikoukuli nohamalu.

⁷ Ia kena Jesus ehaele aꞌe nohapili nalima aia iluna nakama la, kena ime aꞌe “Masiꞌe iluna, okou isemakaꞌu.”

⁸ Kena nakama la uꞌila aꞌe, kela Jesus soia oia.

⁹ Kulana nakama la uo iho ilalo ma kemouna la, Jesus eme aꞌe, “Okou isehaꞌali aꞌe hea okou niꞌike la. Kali keualoko {kama ekipu kama} meola muli ikaha ma kemake.”

¹⁰ Nakama kaukali la evasili aꞌe Jesus, “Aiea nakama epolopolo nakuaa la ekakala ma Elijah meihamai imua keMesaea laea?”

¹¹ Kena iko Jesus ime aꞌe, “Ekonu pela Elijah meihamai imua keMesaea nohakonu namea hakoa.

¹² Anau eme aku okou, hekama ehau poi Elijah la nakae mai avale. Ia keonohenua la oisemakino oai kama la. Kena nakama la ekahao sala kama la, ikaukali nakipukipu saꞌino lakou la. Ia nakama la meikahao sala {kama ekipu kama} nohalono lihu pela hoi.”

¹³ Ia kena nakama kaukali la uailoa pela Jesus ukakala aꞌe nakipukipu John Baptist.

Jesus ehaise kipua saꞌino ikaha ma kaupeala

¹⁴ Kulana Jesus ia ma koꞌokolu la nivaꞌai iho nokili keonohenua la, hekama iloko keonohenua la uhaele aꞌe nohamalu imua Jesus.

¹⁵ Kena kama la eme aꞌe, “Kealiꞌi haialoha mai kaupeala anau nei. Kama nei elavea peupeu, kena esina kahi iloko keahi ia ma kelokai la nopole, kena ehalono lihu haeꞌo.

¹⁶ Kena anau ehakaꞌi aꞌe kaupeala anau nei i nakama kaukali aꞌoe la, ia nakama la selavaa kekonaꞌi kama nei ikaualeꞌa.”

¹⁷ Kena Jesus ehai aꞌe nakama la, “Kaukama okou na ikau kehakina, ia okou evale oia. Anau enoho ma okou saika loloa haeꞌo, ia okou sehakina anau. Ko mai kaupeala na.”

¹⁸ Kena iko Jesus ikakala hamakaꞌu aꞌe kipua saꞌino la, kena kipua la uhaele ikaha ma kaupeala la. Vahola oia, kaupeala la ukaualeꞌa.

¹⁹ Kulana Jesus ninoho soia, nakama kaukali aia la eo aꞌe nome aꞌe kama la, “Aiea makou selavaa kehaise kipua la ikaha laea?”

²⁰ Kena iko Jesus ime aꞌe, “Okou selavaa kehaise kipua la ikaha, maikinimea okou sehakina hamaoni. Anau eme aku kehamaoni. Niaina ma nahakina okou esoliliꞌi poi kehua ke{masika}, okou elavaa keme aꞌe kemouna la, ‘Ene pela,’ kena kemouna la meꞌene. Kena namea hakoa meihainahie okou.

²¹ Ia poi okou eloku mahi, ia ehasese hiꞌai, kena okou amelavaa kehaise kipua saꞌino na ikaha.”

Jesus ukakala hoi kanamake

²² Keualoko Jesus ma nakama kaukali aia la eꞌuku i Galilee, Jesus eme aꞌe nakama la, “Hekama meiau aꞌe {kama ekipu kama} i nakama haimahi

²³ nokaa kama la imake. Ia i keaho kanahakolu, kama la meola muli.” Kena nakama kaukali Jesus la ulono ualoha haeꞌo.

Jesus ehoꞌi aꞌe namoni hale kapu

²⁴ Jesus ma nakama kaukali aia la ukae Capernaum, kena iko nakama aoao namoni hale kapu la io aꞌe ia Peter, kena ime aꞌe, “Ea, keRabai okou la eaunahie kehoꞌi aꞌe sileni ikonaꞌi hale kapu?”

²⁵ Kena iko Peter ime aꞌe, “Ei.” Ia keualoko Peter eulu kehale Jesus enoho la, Jesus eme aꞌe kama la, “Simon Peter, aꞌoe ehakaꞌoko pehe? Nakuꞌu kemaalama nei meko nasileni lakou la ihee? Nakuꞌu la hihai iko nasileni keonohenua lakou la, ma iko nasileni naonohenua emao?”

²⁶ Kena Peter eme aꞌe, “Nasileni naonohenua emao la.” Kena Jesus eme aꞌe Peter, “Kena keonohenua nakuꞌu la meseau aꞌe nasileni.

²⁷ Ia kaua sehihai nakama aoao namoni la ililoko kaua. Kena aꞌoe ihaele nomakau. Keiꞌa amaka aꞌoe mehuki, ko sileni iloko puꞌua keiꞌa la. Haele nohoꞌi aꞌe sileni la ekau ma kaua.”