Matthew 16 - Luaniua New Testament

NaFarasi eainoa aꞌe Jesus ihuli aꞌe namahi Keakua

¹ NaFarasi ia ma naSatiusi la eo aꞌe nokaiꞌi Jesus. Kena nakama la eainoa aꞌe kama la ihuli aꞌe namahi Keakua.

² Ia Jesus eme aꞌe nakama la, “Keualoko kelaa nikapili isulu, ame okou eꞌike napuleulehu emea eꞌiva, okou ekakala ma, ‘Kaiao kemoana la memalino.’

³ Keualoko kelaa nisopo aꞌe, ame okou eꞌike napuleulehu emea, okou ekakala ma, ‘Keaho nei memaili.’ Okou emakino pela nahaꞌaku la ehuli aku nakipukipu naaho la. Ia niaina okou eꞌike anau ehuli aku namahi Keakua, okou oisemakino hea meiapihi mai imuli.

⁴ Nakama saꞌino ia ma nakama sehalono Keakua la hihai iꞌike nahaꞌaku. Ia Keakua meihuli aꞌe nakama la namahi aia poi aia nihuli aꞌe ia Jonah la oia.” Kena Jesus ukiaꞌi naFarasi la nohaele ikaha.

Lolosi hamakonu naaoaꞌo esala

⁵ Kulana Jesus ma nakama kaukali aia la nihulo i kelaa vahi kemoana la, nakama la usili keko aꞌe nahalaoa.

⁶ Jesus ekakala hamakaꞌu aꞌe nakama kaukali aia la ma, “Lolosi hamakonu ke{iist} kela naFarasi ia ma ke{iist} kela naSatiusi la.”

⁷ Ia kena nakama kaukali Jesus la ukakala solakou ma, “Halaoa kakou la usili mai iuka.”

⁸ Jesus namakino avale hea nakama la ekakala solakou, kena ime aꞌe, “Okou ikau kehakina hamaoni. Okea okou ekakala ma okou sehihalaoa?

⁹ Okou oisemakino hea anau ehuli aku. Okou usili keualoko anau nikohikohi elima nahalaoa nohanai lima simaka nakama. Kena okou usili hoi napunaꞌeke namuli halaoa okou nikoe la.

¹⁰ Ia okou usili keualoko anau nikohikohi ehiku nahalaoa nohanai haa simaka nakama. Kena okou usili hoi napunaꞌeke namuli halaoa okou nikoe la.

¹¹ Okou seailoa? Anau sekakala aku halaoa. Anau kakala aku ma okou ilolosi hamakonu ke{iist} naFarasi ma naSatiusi la.”

¹² Ia kena nakama kaukali Jesus uailoa pela kama la sekakala aꞌe ke{iist} kela epena halaoa ihuka. Kama la ekakala aꞌe lakou ilolosi hamakonu keaoaꞌo naFarasi ia ma naSatiusi la.

Peter eme aꞌe pela Jesus o keMesaea

¹³ Jesus ma nakama kaukali aia la ekaꞌa i keꞌina kapili aꞌe Caesarea Philippi. Kena Jesus evasili aꞌe nakama kaukali aia la, “Ea? Keonohenua la emakino oai ke{kama ekipu kama}? Nakakala lakou emea pehe?”

¹⁴ Kena nakama la eme aꞌe Jesus, “Alakama emea ma kama la John Baptist. Alakama emea ma kama la Elijah, alakama emea ma kama la Jeremiah, ia alakama ekakala ma kama la hekama i nakama hakae nakakala Keakua.”

¹⁵ Kena Jesus evasili aꞌe nakama kaukali aia la, “Ia okou emea ma oai anau?”

¹⁶ Kena iko Simon Peter ime aꞌe, “Aꞌoe o keMesaea, kekama Keakua eola kahi.”

¹⁷ Kena iko Jesus ime aꞌe, “Simon kama Jonah, aꞌoe ehakapu lia Keakua. Sehikama haꞌali aku i aꞌoe kehakaꞌoko la. Emeia Kamana anau i kevaelani ehuli aku imakino aꞌoe pela oai anau.

¹⁸ Kena anau eme aku i aꞌoe Peter, aꞌoe hakupaa. Anau meihakuu hale loku anau iluna hakupaa nei. Ia kemake seisi namahi aia i keseu hale loku anau la.

¹⁹ Anau meiau aku na{kii} kenoholana i kevaelani ilolosi aꞌoe. Namea kela Keakua epui i kevaelani, aꞌoe meipui i kemaalama nei. Ia namea kela Keakua mehaakana i kevaelani, aꞌoe meihaakana i kemaalama nei hoi.”

²⁰ Kena Jesus epui aꞌe nakama kaukali aia la, isehaꞌali aꞌe alakama pela aia o keMesaea.

Jesus ukakala kemake aia

²¹ Keualoko la, Jesus eꞌamaka nohaꞌali aꞌe nakama kaukali aia la pela aia meihaele i Jerusalem nokili komaꞌi nahalono lihu. Nakama hamakua na{Jiu} ma namaakua hamakua ia ma nakama epolopolo nakuaa la meimeme haeꞌo kia aia. Kena nakama la mekaa aia imake. Ia keaho kanahakolu, aia meiola muli.

²² Kena Peter uhakaꞌi Jesus ikaha ma nakama la, ihai aꞌe Jesus ma, “Seai Kealiꞌi. Namela meselavaa keapihi aku aꞌoe.”

²³ Jesus uhakiꞌe nome aꞌe Peter, “Haele ikaha manau Satan. Aꞌoe hihai ipui anau, maikinimea aꞌoe sehakaꞌoko nakipukipu Keakua, ia aꞌoe ehakaꞌoko nakipukipu nakama oia.”

²⁴ Kena Jesus ume aꞌe nakama kaukali aia la penei, “Poi hekama hihai ikaukali mai anau, kama na ikiaꞌi namea aia hihai, uhapili {kolosi} aia, kena ukaukali mai anau.

²⁵ Oai kekama ehakekele ilolosi kanaola, meilano keola hamaoni. Ia oai kekama eaunahie kekiaꞌi keola aia nokaukali mai anau, kama la meiko keola hamaoni la.

²⁶ Ame sekonu pela hekama ihakau namea hakoa i kemaalama nei, ia ulano keola hamaoni. Kama la selavaa kesui muli kanaola.

²⁷ “{Kama ekipu kama} meivaꞌai iho i namahi Kamana aia la, ia ma na{enselo} aia la. Kena kama la meivavae aꞌe nakuhana nakama hakoa, ikau ma hea kama ma kekama epena la.

²⁸ Anau eme aku kehamaoni. Imua okou hakoa meimake, alakama okou meiꞌike {kama ekipu kama} ehamai nohamakua i kenoholana aia la.”