Matthew 14 - Luaniua New Testament

John Baptist ekaia nomake

¹ Keualoko la, kekuꞌu Herod ulono alakama ekakala aꞌe nakipukipu Jesus.

² Kena Herod eme aꞌe nakama heheaꞌu aia la, “Kena John Baptist uola muli na. Kela hea kama na elavaa kehuli aꞌe namahi aia.”

³ Kemenei esala mai imua, pela Herod eailalao noꞌavana Herodias, keꞌavana kaina aia la, Philip. Ia kena Herod ume aꞌe napulepule aia la ikaohi John nosaisai, kena ipono kama la iloko kelokapu.

⁴ Maikinimea John ekakala kahi aꞌe Herod ma, “Sekonu pela aꞌoe iꞌavana kehine la.”

⁵ Herod hihai ikaia John imake. Ia Herod emakaꞌu pela keonohenua la meloko. Maikinimea nakama la ehakina pela John ame hekama hakae nakakala Keakua.

⁶ Keualoko la Herod epena keꞌai imanaku keaho kela aia nimamaoha la. Kena kaupu Herodias la elulue aꞌe imua namaisu Herod ia ma nakama hamakua la. Ia kena Herod ehihia lo,

⁷ kena ime aꞌe nakama la, “Anau ekakala hamaoni imua namaisu okou hakoa pela anau meiau aꞌe kaupu nei hea aia eainoa mai.”

⁸ Kaupu la ekakala aꞌe kina aia la solaua, kena ime aꞌe Herod, “Pale mai vave pohoulu John Baptist la iloko {pesoni}.”

⁹ Niaina kekuꞌu la ualoha haeꞌo, kama la ehalono hea kaupu la eainoa aꞌe i aia, maikinimea aia nime aꞌe kehamaoni imua namaisu nakama la hakoa.

¹⁰ Kena Herod ehaunalia napulepule aia la iloko kelokapu nosepe keua John.

¹¹ Kena nakama la eko pohoulu la nohao iloko {pesoni}, nohoꞌi aꞌe kaupu la. Kena kama la eko noau aꞌe kina aia la.

¹² Nakama kela ekakaꞌa ma John la uo aꞌe noko kinokama kama la nokanu. Kena ikaꞌa nokakala aꞌe Jesus pela John umake.

Jesus hanai elima simaka nakama

¹³ Keualoko Jesus nilono pela John umake, kama la uꞌae kemonoui nohulo keꞌina sevaa. Ia kulana keonohenua la ulono pela Jesus uhulo, nakama la uo ikaha ma namakaꞌina lakou la, kena ikaukali Jesus vauka.

¹⁴ Kulana Jesus uhau iuka, kama la uꞌike keonohenua elahi la, kena ialoha haeꞌo nakama la, kena ikonaꞌi nakama lavea la nokaualeꞌa.

¹⁵ Keualoko kelaa la ukapili isulu, ko nakama kaukali Jesus la io nome aꞌe aia, “Keꞌina nei sehihale. Kelaa la ukapili isulu. Haunalia nakama la i namakaꞌina kapili mai nosui niꞌai ma lakou.”

¹⁶ Ia Jesus eme aꞌe nakama kaukali aia la, “Seai. Keonohenua la meseo ikaha. Okou iau aꞌe niꞌai ma nakama la iꞌai.”

¹⁷ Ia nakama kaukali la eme aꞌe Jesus, “Ia makou eisi kaulima nahalaoa, sakamaiꞌa oia.”

¹⁸ Kena Jesus ime aꞌe, “Au mai naꞌai na.”

¹⁹ Jesus eme aꞌe keonohenua la inoho i keꞌina naveve. Kena Jesus uko kaulima nahalaoa la ma sakamaiꞌa la, noꞌila iluna noloku. Kena kama la ekohi nahalaoa la, iau aꞌe naꞌai la i nakama kaukali aia la novavae aꞌe keonohenua la.

²⁰ Nakama la hakoa eꞌai nopohu. Kena nakama kaukali Jesus la uhaele hanaopo nohao sanahulu ma lua naꞌeke namuli halaoa.

²¹ Keꞌoina nakanaka eꞌai la ekae pela elima nasimaka. Ia nahaikina lakou la eꞌai hoi.

Jesus ehaele valuna kemoana

²² Jesus eme aꞌe nakama kaukali aia la iꞌae kemonoui la nohulo imua aia i kelaa vahi kemoana la, kena ime aꞌe keonohenua la ikaꞌa veihale.

²³ Kena iko Jesus ihaele iluna kemouna la soia noloku. Kulana keiahi, Jesus enoho soia iuka.

²⁴ Keualoko la, kemonoui la namao avale i lakonu kemoana. Ia kemonoui la ekuꞌi ma peau, maikinimea kemakani la epui mai imua.

²⁵ Keualoko keulu keaka, Jesus uhaele valuna kemoana hakapili nakama kaukali aia la.

²⁶ Ia keualoko nakama la niꞌike Jesus ehaele valuna kemoana la, nakama la ekipuaina haeꞌo, kena ime aꞌe, “Kena kipua.” Nakama la emakaꞌu, kena iapihi navalo lakou.

²⁷ Saika la oia, Jesus eme aꞌe nakama la, “Okou isehakekele. Kenei anau oia. Okou isemakaꞌu.”

²⁸ Kena Peter eme aꞌe, “Kealiꞌi, poi kena aꞌoe hamaoni, me mai anau ihaele aku valuna kemoana nei.”

²⁹ Kena iko Jesus ime aꞌe, “Hamai.” Kena iko Peter ikuu iho ikaha ma kemonoui la nohaele aꞌe valuna kemoana la ia Jesus.

³⁰ Ia kulana Peter niꞌike kemakani la, kama la umakaꞌu noapulu ilalo, kena ianaa aꞌe, “Kealiꞌi, konaꞌi mai anau.”

³¹ Saika la oia, Jesus ehalo aꞌe kanalima nokaohi Peter, kena ime aꞌe, “Aꞌoe ukau kehakina mahi. Ia aꞌoe sehakina oia?”

³² Koꞌolua la eꞌae iluna kemonoui la, kena kemakani la ukeiho nomalino.

³³ Kena nakama iluna kemonoui la ehamalu Jesus nome aꞌe, “Aꞌoe o kekama Keakua hamaoni.”

Jesus ekonaꞌi nakama lavea i Gennesaret nokaualeꞌa

³⁴ Nakama la uhulo i kelaa vahi kemoana la nokae Gennesaret.

³⁵ Nakama keꞌina la hakoa uili aꞌe nomake ia Jesus, kena ihaunalia alakama lakou ime aꞌe nakama alamakaꞌina nosausau iho nakama lavea lakou la io aꞌe Jesus.

³⁶ Nakama la eainoa aꞌe ma nakama lavea lakou la ihakili nalima lakou pamalo Jesus. Kena nakama kela ehakili nalima lakou pamalo kama la, ukaualeꞌa hakoa.