Matthew 13 - Luaniua New Testament

Kama ekoli nahua

¹ Keaho la oia, Jesus uhaele ikaha ma kehale la nonoho ikai.

² Kena komaꞌi naonohenua emumui aꞌe aia. Ia kena Jesus uꞌae iluna kemonoui nonoho ilaa, ia nakama la ekuu vauka.

³ Kena Jesus eaoaꞌo aꞌe nakama la i nakakala hulihuli. “Halono. Kela hekama ehaele laku nahua ma isomo.

⁴ Kulana kama la elaku nahua la, alahua emaoha i keala. Ia namanu la ulee iho noꞌai nahua la.

⁵ Alahua emaoha i keꞌina ehaku. Ia kaꞌele la epakaꞌe. Kamasaika oia, nahua la usomo, maikinimea kaꞌele la senoko.

⁶ Ia saika kelaa la nisopo aꞌe novela, nahua esomo la umake, maikinimea napakiaꞌa nahua la selavaa keulu iloko kaꞌele la nomau.

⁷ Alahua emaoha iluna keꞌina kiale. Kena kiale la usomo noꞌuhi valuna nahua la.

⁸ Alahua emaoha iluna kaꞌele kaualeꞌa nosomo laoi, kena nalaꞌau la uhua; alalaꞌau ehua huikalau nahua, alalaꞌau kipuono nahua, ia alalaꞌau kipukolu nahua.

⁹ “Pena okou hihai ailoa, kena halono mai.”

Hakaꞌoko kela nakakala hulihuli

¹⁰ Kena imuli, nakama kaukali Jesus uo novasili aꞌe kama la, “Aiea aꞌoe ekakala aꞌe keonohenua la nakakala hulihuli naea?”

¹¹ Kena iko Jesus ime aꞌe nakama la, “Keakua hihai okou iailoa nakipukipu kenoholana kevaelani kela ehunaa lia. Ia kama la sehuli aꞌe kehakaꞌoko la imakino lia alakama.

¹² Poi hekama eko namea Keakua eau aꞌe i aia la, kena Keakua meihapaa aꞌe alamea hoi. Kena keola kama na meꞌakoa. Ia poi hekama seko namea Keakua eau aꞌe i aia la, kena Keakua meiko muli namea la hakoa.

¹³ Kela hea anau ekakala aꞌe keonohenua la nakakala hulihuli. ‘Nakama la eꞌike, Ia semakino hea lakou eꞌike. Nakama la elono, Ia semakino hea lakou elono.’

¹⁴ Kena nakama la ehuli aꞌe pela nakakala kela Keakua nime aꞌe Isaiah la ehamaoni, ‘Okou elono kahi, ia semakino hea okou elono. Okou eꞌila kahi, ia semakino hea okou eꞌike.

¹⁵ Keonohenua nei ehakapanaka haeꞌo. Nakama la sehihalono, ia sehiꞌike. Poi nakama la hihai ailoa, kena lakou meiꞌike, meihalono, ia meimakino laoi, Ia mevaꞌai mai muli. Kena anau meikonaꞌi nakama la ikaualeꞌa.’

¹⁶ “Ia okou ehakapu lia Keakua, maikinimea naꞌalemaka okou la eꞌike, ia nakalina okou la elono.

¹⁷ Anau eme aku kehamaoni. Komaꞌi nakama hakae nakakala Keakua imua la, ia ma nakama akamai imua la hihai iꞌike hea okou eꞌike. Ia nakama la seꞌike namea la. Ia nakama la hihai ilono hea okou elono, ia nakama la selono namea la.

Kehakaꞌoko kakala hulihuli kekama haele laku nahua

¹⁸ “Halono halaoi kehakaꞌoko nakakala hulihuli kekama kela ehaele laku nahua.

¹⁹ Nahua emaoha i keala ehau poi nakama kela elono nakakala kenoholana Keakua, ia semakino laoi. Satan uhaele aꞌe nohakiꞌe nahakaꞌoko nakama la isili nakakala Keakua la.

²⁰ Nahua emaoha i keꞌina ehaku la, ehau poi nakama kela elono nakakala Keakua. Ia saika lakou nilono, nakama la ehakina nakakala la nohihia lo.

²¹ Ia nakama la sekaohi mau nakakala la iloko naola lakou. Kena nakama la ehihia kamasaika oia. Nakama la ehalono nakakala Keakua la, ia kena alakama ehai haeꞌo kia lakou. Vahola oia, nakama la ukiaꞌi hua hea lakou nilono la.

²² Nahua kela esomo i keꞌina kiale la ehau poi nakama kela elono nakakala Keakua, ia nakama la ehakekele maha naola lakou, kena imanaꞌo nasileni. Ia namea la epui nakakala Keakua isehuli aꞌe nakipukipu kaualeꞌa iloko naola lakou.

²³ Nahua emaoha i kaꞌele kaualeꞌa ehau poi nakama kela ehalono nakakala Keakua, kena iailoa laoi nakakala la. Ia kena nakakala Keakua ehuli aꞌe komaꞌi nakipukipu kaualeꞌa iloko naola lakou; alakama ekae huikalau, alakama kipuono, alakama kipukolu.”

Naveve saꞌino

²⁴ Jesus eme aꞌe kelaa kakala hulihuli. “Kipukipu kenoholana kevaelani eme penei. Kela hekama ehaele koli nahua kaualeꞌa na{uit} la iloko paupaꞌu aia.

²⁵ Ia kulana nakama heheaꞌu la hakoa nimoe kepo, kama haihai manava la uhamai nokoli naveve saꞌino iloko ma na{uit} la, kena ihaele ikaha.

²⁶ Kulana na{uit} la usomo nohua, naveve saꞌino la usomo hoi.

²⁷ “Kena nakama heheaꞌu paupaꞌu la uhaele aꞌe nome aꞌe kama hamakua lakou la, ‘Kakou ekoli nahua na{uit} la iloko paupaꞌu aꞌoe. Seai la? Naveve saꞌino la esomo naea?’

²⁸ Kena kama hamakua la eme aꞌe, ‘Ame hekama haihai manava ekoli naveve saꞌino la.’ Kena nakama heheaꞌu la evasili aꞌe, ‘Aꞌoe hihai makou iꞌuhu naveve saꞌino la ikaha?’

²⁹ Ia kama hamakua la eme aꞌe, ‘Seai. Pena okou eꞌuhu naveve saꞌino, okou ameꞌuhu na{uit} la hoi.

³⁰ Kiaꞌi namena isomo hakoa. Kulana na{uit} la mekae, anau meihaunalia alakama heheaꞌu anau nokuu naveve saꞌino la nosaisai nolakua i keahi. Ia nakama la meihaꞌuku na{uit} la nopono iloko hale kehale anau la.’ ”

Kehua soliꞌi

³¹ Jesus eme aꞌe kelaa kakala hulihuli. “Nakipukipu kenoholana kevaelani eme penei. Kela hekama ekoli nahua holiliꞌi iloko paupaꞌu aia la.

³² Kehua la eholiliꞌi ilalo nahua hakoa. Ia kulana meikoli, kehua la esomo nolahi iluna nalaꞌau iloko paupaꞌu la. Kena namanu la epena naohana lakou iluna nalala kelaꞌau la.”

Ke{Iist} ehilo iloko halaoa

³³ Jesus eme aꞌe kela kakala hulihuli. “Nakipukipu kenoholana kevaelani emea penei. Kela hehine ehilo ke{iist} iloko nahalaoa, kena ihamoe nohuka.”

Jesus ekakala nakakala hulihuli pehe

³⁴ Keualoko Jesus ekakala aꞌe keonohenua la, kama la eme aꞌe nakakala hulihuli oia, sehimea hoi.

³⁵ Ia kena nakakala kela nakama imua nihakae la ehuli mai nohamaoni, “Anau meime aꞌe nakama la nakakala hulihuli. Ihuli aꞌe kehakaꞌoko ehunaa lia i keꞌamaka kemaalama nei.”

Kehakaꞌoko kakala hulihuli naveve saꞌino

³⁶ Kena Jesus ukiaꞌi keonohenua la ihaele i hale. Kena nakama kaukali aia la uo nome aꞌe kama la, “Haꞌali mai kehakaꞌoko kakala hulihuli naveve saꞌino kela ekoli iloko paupaꞌu.”

³⁷ Kena Jesus eme aꞌe nakama la, “Kekama ekoli nahua kaualeꞌa la, kena o ke{kama ekipu kama}.

³⁸ Paupaꞌu la o kemaalama nei. Ia nahua kaualeꞌa la, ala nikama kenoholana Keakua. Naveve saꞌino la, ala nikama Satan.

³⁹ Kena Satan o kekama haihai manava kela ekoli naveve saꞌino la. Ia nakama heheaꞌu la, ala ni{enselo} Keakua. Keualoko nakama la meihaꞌuku nakama hakoa, kena kehaoki kemaalama nei.

⁴⁰ “Ia naveve saꞌino la mehaꞌuku hakoa nolakua i keahi novela. Kehaoki kemaalama nei mehau penei hoi.

⁴¹ {Kama ekipu kama} meihaunalia na{enselo} aia la hakoa iloko kemaalama nei. Na{enselo} la meihaꞌuku nakama kela ekaoleole alakama, ia ma nakama kela epena namea saꞌino la, kena ihavaꞌee nakama la ikaha ma kenoholana Keakua,

⁴² kena ilaku nakama la iloko keahi evela haimahi. Ia nakama la meikanikani, ia meihaꞌaki naniho lakou.

⁴³ Ia nakama ekonu kahi memasina poi kelaa i kenoholana Kamana lakou. Poi okou hihai ailoa, kena halono mai.

Nakama elave namea kaualeꞌa

⁴⁴ “Kipukipu kenoholana kevaelani eme penei. Kela hekama elave komaꞌi namoni ekanu lia iloko kaꞌele. Kena kama la ehuu namoni la halaoi, kena ihaele noau aꞌe namea aia la isui alakama. Kena iko namoni la isui paupaꞌu la maia.

⁴⁵ “Kipukipu kenoholana kevaelani eme penei. Kela hekama hihai isui napahaku nanaꞌohu.

⁴⁶ Kulana kama la eꞌike pahaku nanaꞌohu elahi la, kama la uhaele noau aꞌe namea aia la isui alakama. Kena iko namoni la isui pahaku la maia.

Nakama pupui keupena

⁴⁷ “Kipukipu kenoholana kevaelani eme penei. Kela nikama epupui keupena vakai nokau naiꞌa kaualeꞌa, ia ma naiꞌa saꞌino.

⁴⁸ Kulana keupena la upii, nakama la ualeko keupena la iuka nohavavaꞌee naiꞌa la. Nakama la elaku naiꞌa kaualeꞌa iloko naꞌeke, ia pesia naiꞌa saꞌino la ikaha.

⁴⁹ Kehaoki kemaalama nei mehau pela hoi. Na{enselo} meio iho nohavaꞌee nakama saꞌino ikaha ma nakama ekonu kahi,

⁵⁰ kena ilaku nakama saꞌino la iloko keahi evela haimahi. Kena nakama la meikanikani ia meihaꞌaki naniho lakou.”

Kehamaoni vahonei ia ma kehamaoni imua

⁵¹ Jesus evasili aꞌe nakama kaukali aia la, “Okou emakino kehakaꞌoko naaoaꞌo nei hakoa?” Kena nakama la eme aꞌe, “Ei, makou emakino.”

⁵² Kena Jesus eme aꞌe nakama la, “Pena hekama epolopolo nakuaa emakino laoi nakipukipu kenoholana kevaelani, kama la mehau poi hekama hamakua kehale. Kama la ehakau namea kaualeꞌa vahonei ia ma namea kaualeꞌa kuai iloko hale kehale aia la, ia kena ivavae aꞌe alakama.”

Nakama Nazareth sehihai Jesus

⁵³ Kulana Jesus nime aꞌe nakakala hulihuli nei nooki, kama la uhaele ikaha ma keꞌina la.

⁵⁴ Kena ivaꞌai muli i kemakaꞌina aia la noaoaꞌo keonohenua la iloko hale loku lakou la. Nakama ehalono la emasalo i nakakala Jesus, kena ivasisili solakou, “Kama nei eko kehakaꞌoko la ihee? Oai kekama eau aꞌe aia namahi elahi la?

⁵⁵ Kena hekama Mary laua ma Joseph, kama kela hakuku nahale la. Ia kama nei hekaina James, Joseph, Simon, lakou ma Judas. Seai la?

⁵⁶ Naꞌave aia la enoho ma kakou inei. Kama nei eailoa namenei pehe?”

⁵⁷ Kena keonohenua la emasalo haeꞌo i nakakala Jesus la. Kena Jesus eme aꞌe nakama la, “Nakama naꞌina hakoa ehamaha kekama kela ehakae nakakala Keakua. Ia alakama sehamaha i aia. Ala nikama kemakaꞌina aia la, ia ma alakama haleaina aia la.”

⁵⁸ Ia Jesus sehuli aꞌe namahi Keakua i nakama la hakoa, maikinimea nakama la sehakina.