Mark 9 - Luaniua New Testament

Keakua uhuli aꞌe namahi aia i kinokama Jesus

¹ Kena Jesus eme aꞌe nakama kaukali la, “Anau eme aku kehamaoni. Imua okou hakoa meimake, alakama okou meiꞌike kenoholana Keakua ehuli mai i namahi elahi.”

² Imuli eono naaho, Jesus eko Peter, ia ma James lakou ma John, nokaꞌa solakou iluna kemouna. Kena nakama la eꞌike namahi Keakua ehuli aꞌe iloko kinokama Jesus.

³ Naauꞌahu aia la eꞌivaꞌiva, ia emaꞌini lo. Ia sehikama kemaalama nei elavaa kesolo keauꞌahu imaꞌini pela hoi.

⁴ Kena koꞌokolu la uꞌike Elijah laua ma Moses ilaa hoi, ekakala lakou ma Jesus.

⁵ Kena iko Peter ime aꞌe Jesus, “Rabai, kaualeꞌa pela makou inei, ihakuu koukolu nakamahale ma okou, kamahale aꞌoe, kamahale Moses, kena kamahale Elijah.”

⁶ Ia Peter semakino hea aia ekakala, maikinimea lakou makaꞌu.

⁷ Kena puleulehu la uꞌuhi nakama la, ia keleo Keakua ekakala iho iloko puleulehu la ma, “Anau ehaikama laoi kaukama nei. Okou ihalono aꞌe kama nei.”

⁸ Vahola oia, nakama la uꞌilaꞌila solakou, ia eꞌike Jesus soia.

⁹ Kulana nakama la nio iho ilalo kemouna la, Jesus epui aꞌe koꞌokolu la isekakala aꞌe alakama hea lakou eꞌike la, hakali keualoko {kama ekipu kama} meiola muli ikaha ma kemake.

¹⁰ Nakama la ehalono nakakala Jesus la, kena ivasisili solakou, “Kehakaꞌoko keola muli ikaha ma kemake la eme pehe?”

¹¹ Kena koꞌokolu la uvasili aꞌe Jesus, “Aiea nakama epolopolo nakuaa la ekakala ma Elijah meihamai imua keMesaea laea?”

¹² Kena iko Jesus ime aꞌe, “Ekonu pela Elijah meihamai imua keMesaea, nohakonu namea hakoa. Ia kelauniu kapu ekakala mai ma {kama ekipu kama} meihalono lihu, ia haiseise lia. Okou makino?

¹³ Anau eme aku, Elijah nahamai avale. Ia alakama ekahao sala kama la, ikau ma nahakaꞌoko saꞌino lakou. Ehau poi kelauniu kapu nikakaa mai.”

Jesus ehaise kipua saꞌino ikaha ma kaupeala

¹⁴ Keualoko Jesus ia ma koꞌokolu la nivaꞌai iho nokili alakama kaukali aia la, nakama la eꞌike keonohenua elahi emumui aꞌe nakama kaukali la. Ia nakama epolopolo nakuaa la ehakauoki lakou.

¹⁵ Ia saika keonohenua la eꞌike Jesus, nakama la umasalo, kena ihulo hihia aꞌe Jesus.

¹⁶ Kena iko Jesus ime aꞌe, “Hea okou hakauoki ma nakama la?”

¹⁷ Kena hekama iloko keonohenua la eme aꞌe, “Rabai, anau ehakaꞌi aku kama anau nei. Kama nei eisi kipua saꞌino kela epui puꞌua aia noselavaa kekakala.

¹⁸ Keualoko kipua la ekau iloko kaupeala nei, kama nei esiou ilalo, kealaꞌala uꞌo, naniho uꞌaki, ia kinokama kama nei umakauniki. Anau eainoa aꞌe nakama kaukali aꞌoe la ihakui kipua saꞌino la ikaha ma kaupeala nei. Ia nakama la selavaa.”

¹⁹ Kena Jesus eme aꞌe nakama la, “Kaukama okou na ikau kehakina. Anau enoho ma okou saika loloa haeꞌo, ia okou sehakina oia. Ko mai kaupeala na.”

²⁰ Kena nakama la uhakaꞌi aꞌe kaupeala la. Ia keualoko kipua saꞌino la eꞌike Jesus, kaupeala la usuꞌe nohakaꞌapeꞌape valalo kaꞌele. Kealaꞌala la uꞌo puꞌua.

²¹ Jesus evasili aꞌe kamana kaupeala la, “Kipua nei ekae aꞌe kaupeala nei saika hee?” Kena kamana kaupeala la eme aꞌe, “Saika aia nisoliliꞌi.

²² Kipua la elakua kahi kama nei iloko keahi ia iloko kelokai, ma ikaa kama nei imake. Pena aꞌoe elavaa kekonaꞌi, haialoha mai nokonaꞌi maua.”

²³ Kena iko Jesus ime aꞌe, “Aꞌoe sehakina pela anau elavaa kekonaꞌi kama nei? Poi hekama ehakina hamaoni, kena namea hakoa ame hainahie kama na.”

²⁴ Vahola oia, kamana kaupeala la ukakala kani aꞌe, “Anau uhakina; ia konaꞌi mai anau. Anau ehakina hamalie oia.”

²⁵ Keualoko Jesus uꞌike keonohenua la uhulo mai nomaka, kama la ekakala hamakaꞌu aꞌe kipua la. “Aꞌoe epui naakalina nakama la noselono, ia epui napuꞌua nakama la nosekakala. Anau eme aku aꞌoe, haele ikaha ma kaupeala na. Aꞌoe selavaa kevaꞌai muli aꞌe.”

²⁶ Kena kipua la uapihi kevalo aia usuꞌe haeꞌo nokele ikaha ma kaupeala la. Kama la umoe semuu, ehau poi hekama umake. Ia kena keonohenua la ukakala solakou, “Kaupeala na umake.”

²⁷ Ia Jesus ukaohi kelima kaupeala nohamasiꞌe iluna.

²⁸ Keualoko Jesus uhaele i hale, nakama kaukali la uvasili aꞌe kama la solakou, “Aiea makou selavaa kehaise kipua la ikaha laea?”

²⁹ Kena Jesus eme aꞌe, “Amea okou eloku mahi, kena okou amelavaa kehaise kipua na ikaha.”

Jesus ukakala hoi kemake aia

³⁰ Jesus ia ma nakama kaukali aia la ukiaꞌi kemakaꞌina la, kena ihasili nokaꞌa valoko Galilee. Jesus sehihai pela alakama iailoa keꞌina hee lakou eo nonoho,

³¹ maikinimea Jesus hihai iaoaꞌo aꞌe nakama kaukali aia la solakou penei, “Hekama meau aꞌe {kama ekipu kama} i nakama haimahi nokaa kama la imake. Ia imuli koukolu naaho, kama la meola muli.”

³² Ia nakama la seailoa kehakaꞌoko nakakala Jesus la, kena umakaꞌu kevasili aꞌe kama la.

Oai kekama meihananiu

³³ Jesus ma nakama kaukali aia la ukae Capernaum. Kulana nakama la enoho i hale, Jesus evasili aꞌe nakama la, “Kulana kakou nio mai valoko keala, okou hakauoki kea?”

³⁴ Ia nakama la enoho semuu oia. Maikinimea kulana nakama la nikaꞌa valoko keala, nakama la hakauoki ma oai kekama lakou mehananiu.

³⁵ Ia kena Jesus enoho ilalo, kena ianaa aꞌe sanahulu ma lua nakama kaukali aia la, kena ime aꞌe, “Pena hekama okou hihai ihananiu, kama na meihamai nohakaha ilalo, ime mo kama heheaꞌu nakama hakoa.”

³⁶ Kena Jesus uko kamaliꞌi holiliꞌi nohakuu ilakonu nakama la, kena isau kamaliꞌi la, kena ime aꞌe nakama la,

³⁷ “Poi hekama ekaukali nakipukipu anau, kena hihai nakamaliꞌi penei, kama na ehihai anau hoi. Ia poi hekama ehihai anau, kama na ehihai kekama kela haunalia iho anau la hoi.”

Hekama okou

³⁸ John eme aꞌe Jesus, “Rabai, makou uꞌike hekama ehaise nakipua i kemale aꞌoe. Kena makou epui kama la, maikinimea kama la sehikama iloko keukulana kakou.”

³⁹ Ia Jesus eme aꞌe. “Okou isepui kama na. Pena hekama ehuli aꞌe namahi Keakua iloko kaumale, kama la selavaa kekakala hamemea i anau.

⁴⁰ Pena hekama sehakauꞌaa ma kakou, kena hekama kakou.

⁴¹ Anau eme aku kehamaoni. Pena hekama ehoꞌi aku okou keupu vai kea nounu, maikinimea okou nikama kaukali keMesaea, Keakua meihoꞌi aꞌe kuhana kama na.

Namea emea kekama i haisala

⁴² “Pena hekama ekaoleole nakamaliꞌi kela ehakina i anau la ihaisala, ekau pela alakama enoa hehaku elahi keua aia, kena ulaku kama na kemoana imalemo.

^43-44 Pena kelima aꞌoe emea aꞌoe ihaisala, kuu kelima aꞌoe na ikaha. Kaualeꞌa pela aꞌoe ukae keola iluna ma kelima hokahi. Ia saꞌino pela aꞌoe sekuu kelima aꞌoe na ikaha, ia kinokama aꞌoe hakoa meihaele i keꞌina halono lihu, keꞌina keahi eula kahi.

^45-46 Pena kevae aꞌoe na emea aꞌoe ihaisala, kuu kevae aꞌoe na ikaha. Kaualeꞌa pela aꞌoe ukae keola iluna ma kevae hokahi. Ia saꞌino pela aꞌoe sekuu kevae aꞌoe na ikaha, ia Keakua melaku kinokama aꞌoe la hakoa i keꞌina halono lihu.*f10*

⁴⁷ Pena keꞌalemaka aꞌoe na emea aꞌoe ihaisala, ape keꞌalemaka aꞌoe na ikaha. Kaualeꞌa pela aꞌoe ukae kenoholana Keakua ma keꞌalemaka hokahi oia. Ia saꞌino pela aꞌoe ekaohi saꞌalemaka aꞌoe na, ia Keakua meilaku kinokama aꞌoe na hakoa iloko keꞌina halono lihu.

⁴⁸ Iloko keꞌina la, nalo la eꞌai nakinokama nakama la, ia selavaa kemake. Ia keahi keꞌina la meiula kahi.

⁴⁹ “Ia namalamala keahi la memaoha iluna nakama la hakoa.

⁵⁰ “Ke{solt} ekaualeꞌa. Ia ame ke{solt} la evaisaa, namea la amekaualeꞌa muli pehe? Keola okou ehau poi ke{solt} la. Ame okou ekaualeꞌa, okou menoho laoi ma alakama.”